Klei bi mguôp: Klei djŏ mơ̆ng grăp ênuk, hdră êlan sa hnơ̆ng mơ̆ng   Đảng

“Bi mguôp, bi mguôp, bi mguôp prŏng – Tŭ jing, tŭ jing, tŭ jing prŏng”- Jing klei blŭ yuôm bhăn mơ̆ng khua gĭt gai Hồ Chí Minh mơ̆ng krah ênuk gưl tal 20, truh ară anei ăt dôk jing yuôm bhăn. Êjai kluôm ala ngă leh lehanăn hlăk dôk ngă hdră êlan dăp wĭt bi khuăt êpul bruă kiă kriê hlăm jih bruă kđi čar, dăp wĭt êpul mă bruă, "jing dăp wĭt jih lăn ala êa djuh" mkŏ mjing anôk mđĭ kyar kjăp lăn čar, hŏng klei thâo bi mguôp, knư̆ hĭn mơh dưn yua prŏng hĭn.

Hlăm hƀuê ênuk mkŏ mjing lehanăn răng mgang lăn čar mơ̆ng djuê Việt Nam, ai tiê klei thâo bi mguôp knư̆ hĭn mơh dưi lŏ bi êdah, lehanăn hlŏng jing leh knhuah bhiăn yuôm bhăn. kyua klei thâo bi mguôp, drei dưi mjing leh mơ̆ng klei amâo mâo jăk jing klei jăk, dưi ruh mtlaih jih mnêč jhat bi kah ana mbha djuê mơ̆ng phung bi roh.

Mơ̆ng hrue mkŏ mjing, Đảng Cộng sản Việt Nam tă leh êlan nao hlăm klei thâo bi mguôp prŏng jih jang djuê ana, yap anăn jing mta kñăm phŭn, jing ai ktang ba wĭt klei dưi mơ̆ng bruă cách mạng. Mơ̆ng thŭn 1943, Đảng čoh čuăn leh kơ klei bhiăn dhar kreh Việt Nam tui tiŏ 3 êlan knơ̆ng hlăm klei mtrŭt mjhar, anăn jing, sa ai hrăm mbĭt hŏng jih jang yang ƀuôn – jih jang bruă mă kñăm ba wĭt klei tŭ dưn kơ mnuih ƀuôn sang, iêo jak jih jang mnuih bi mguôp.

Đảng mtrŭn leh lu hdră êlan čiăng dưn yua jih ai ktang kơ klei thâo bi mguôp. Mâo hdră mtrŭn mrô 23 thŭn 2003 tal êlâo mâo klei čoh čuăn “dưn yua jih ai ktang klei thâo bi mguôp jih jang djuê ana kyua mnuih ƀuôn sang mdrŏng sah, lăn čar ktang kjăp, yang ƀuôn mtăp mđơr, hnŭk êngiê, dhar kreh”.

Leh 20 thŭn êgao truh thŭn 2023, Đảng lŏ dơ̆ng mâo hdră mtrŭn mrô 43 dưn yua jih knhuah gru klei thâo bi mguôp hlăm ênuk gưl mrâo.

Klei năng ngă hlăm klei bi mlih mrâo

Lăn čar drei hlăk ktuh êyuh dôk mlih mrâo, bi mlih ktang bruă mkŏ mjing êpul ngă bruă kđi čar; dăp wĭt êpul ngă bruă, lehanăn ngă dŭm bruă bi hmô bruă sang čư̆ êa dua gưl. Mta kñăm kơ klei bi khuăt êpul ngă bruă, mđĭ boh tŭ dưn hlăm klei mă bruă, klei tŭ dưn hlăm bruă kiă kriê mơ̆ng knŭk kna, lehanăn hlue ngă klei mbha gưl, mbha klei dưi  ktang hĭn kơ alŭ wăl.

Hdră mă bruă anei, amâo mâo djŏ khăt bi hrŏ anôk bruă dôk krah wah ôh, ƀiădah yuôm bhăn hĭn lŏ mkŏ wĭt hdră mă bruă mrâo kjăp hĭn, čiăng kơ bruă sang čư̆ êa thâo jĕ giăm mnuih ƀuôn sang, mă bruă kơ mnuih ƀuôn sang bi jăk hĭn. Gưl dlông ăt bi mklă klei dưi, lehanăn jao klei dưi lu hĭn kơ bruă sang čư̆ êa alŭ wăl, čiăng kơ grăp anôk mă bruă pral hĭn, thâo hĭn, bi djŏ hŏng klei năng kơ bruă knuă pô.

Siămdah, bruă bi khuăt êpul mă bruă hlăm anôk bruă kđi čar, klei dăp wĭt anôk mă bruă, ăt mâo mơh klei hmăi tuôm hŏng đa đa knuă druh, đảng viên, mnuih mă bruă... klei anei brei bi mâo klei mtăp mđơr, klei bi tŭ ư, lehanăn klei kut kat prŏng hlăm bruă kđi čar, lehanăn klei săn asei mlei jih klei tŭ dưn kơ pô. Kyuanăn, klei thâo bi mguôp hlăm jih jang bruă kđi čar jing kliăng kơ klei tŭ jing mơ̆ng hdră bi mlih anei.

Leh klei bi mŭt alŭ wăl, dŭm klei dleh kơ anăn pia mrâo, kơ anôk mă bruă mrâo, thâodah bruă tiŏ nao mbha knuă druh mă bruă, ênưih ba klei amâo mâo thâo bi djŏ mơh hlăm ai tiê klei mĭn. Mbĭt hŏng anăn, klei mdê kơ dhar kreh, klei bhiăn mưng, lehanăn hnơ̆ng thâo săng plah wah dŭm anôk bruă ăt jing sa klei lông dlăng prŏng mơh. Klei bi mŭt plah wah krĭng čư̆ čhiăng hŏng krĭng dap mnai, thâodah plah wah čar mdrŏng hŏng čar ƀun, snăn bi mâo phung knuă druh mâo ai tiê thâo bi mguôp, klei mĭn ênuah, thâo ƀuh kbưi, rơ̆ng bi kna jih jang bruă hŏng klei tŭ dưn pioh kơ klei mđĭ kyar.

Tơdah kƀah klei thâo bi mguôp, klei bi sa ai srăng ngă kpleh jih hdră êlan mă bruă, dleh hlăm klei thâo kiă kriê. Kyuanăn, păn kjăp klei thâo bi mguôp jing kliăng yuôm bhăn tal êlâo, mjing knơ̆ng kơ jih jang bruă srăng dưi mă hŏng klei tŭ dưn. Dưi bi kriê pioh djă yua hdră êlan thâo bi mguôp hlăm klei mđĭ kyar mrâo, snăn brei tui ngă dŭm hdră êlan snei:

Sa jing: Bi sa ai hlăm klei kiă kriê, lehanăn gĭt gai. Jih jang hdră êlan leh mâo mkŏ mjing, lehanăn hlue ngă brei mdưm klei tŭ dưn kơ mnuih ƀuôn sang jing phŭn, mâo klei thâo bi mguôp kjăp plah wah Đảng hŏng mnuih ƀuôn sang, čiăng kơ jih jang mnuih ƀuôn sang thâo săng, đăo knang, lehanăn sa ai, lehanăn jih ai tiê hlue gưt.

Dua lĕ, Mâo bruă klam prŏng, thâo bi hmô mơ̆ng phung knuă druh, đảng viên, boh nik jing khua kiă kriê. Grăp čô knuă druh, đảng viên brei klă sĭt jing phung thâo bi hmô kơ klei thâo bi mguôp hdơ̆ng pô, mdưm klei tŭ dưn mbĭt jing prŏng hĭn kơ klei tŭ dưn kơ pô.

Tlâo jing: lŏ dơ̆ng bi leh hdră êlan, hdră bhiăn kñăm rơ̆ng dưi mâo klei tŭ dưn, lehanăn klei mtăp mđơr hlăm yang ƀuôn. Lŏ dơ̆ng mkŏ mjing, mtrŭn lehanăn hluê ngă dŭm hdră êlan djŏ guôp, klă mngač hŏng grăp alŭ wăl lehanăn phung knuă druh djŏ tuôm, mơ̆ng dŭm hdră êlan đru ba hlŏng truh kơ klei hdĭp mda ala ƀuôn, klei duh bi liê bruă nah gŭ hlăm dŭm alŭ wăl bi mŭt mbĭt.

Pa jing: Mđĭ hĭn bruă kčĕ kơ klei mĭn, hâo hưn truh hŏng jih jang mnua druh, đảng viên lehanăn jih jang mnuih ƀuôn sang kơ klei yuôm bhăn, klei tŭ dưn mơ̆ng bruă bi mŭt mbĭt, bi khuăt êpul mă bruă, đru kơ jih jang mnuih thâo săng anei jing hdră êlan djŏ, năng ngă lehanăn tŭ dưn kơ bruă mđĭ kyar mgi dih kơ lăn čar, mơ̆ng anăn bi sa ai, čŏng mđrăm mbĭt hlue ngă.

Êma jing: Dưn yua jih klei ktang mơ̆ng “Đảng” lehanăn knhuah bruă kđi čar hlăm grăp êpul bruă Đảng lehanăn grăp čô đảng viên. Knŏng leh mâo klei sa ai hlăm klei mĭn lehanăn ba ngă, mơ̆ng dlông kơ nah gŭ, mơ̆ng êngao hlŏng hlăm lam, mâo klei thâo bi mguôp hlăm kluôm Đảng lehanăn jih jang mnuih ƀuôn sang, snăn kơh klă sĭt srăng kjăp, mjing klei ktang čiăng bi leh bruă čuăn lŏ dăp wĭt êpul mă bruă, atăt lăn čar čhuang nao hlăm sa wưng ênuk mđĭ kyar mrâo.

Ti gŭ klei gĭt gai klă mngač mơ̆ng Đảng, hŏng klei jhŏng lehanăn klei mĭn kjăp mơ̆ng jih jang, nao hlăm klei thâo bi mguôp prŏng jih jang djuê ana, sĭt nik klei bi khuăt êpul mă bruă hlăm jih bruă kđi čar, dăp wĭt êpul ngă bruă lehanăn kiă kriê bruă sang čư̆ êa alŭ wăl dua gưl sĭt nik srăng mâo boh tŭ dưn jăk, mjing knơ̆ng atăt lăn čar čhuang nao hlăm wưng mlih mrâo mđĭ kyar msĕ si hdră mtrŭn mơ̆ng klei bi kƀĭn prŏng Đảng gưl 13 mtrŭn leh. Klei ktang mơ̆ng klei thâo bi mguôp lŏ sa blư̆ dơ̆ng srăng đru drei dưi hgao jih klei gun kpăk, mjing klei lông dlăng jing klei găl, atăt lăn čar čhuang nao hlăm ênuk gưl mrâo, ênuk kơ klei mdrŏng sah, ñŭ kma lehanăn mđĭ kyar kjăp kyua klei hdĭp trei mđao, jăk mơak kơ mnuih ƀuôn sang./.

Tô Lâm - Khua gĭt gai Đảng Cộng sản Việt Nam