Aguah 1/7, Êpul gơ̆ng bruă ƀuôn sang čar Gia Lai mrâo mkŏ mjing leh Klei bi kƀĭn tal 1, wưng thŭn 2021 - 2026. Anei jing klei bi kƀĭn mâo boh tŭ bruă kđi čar, djŏ hdră bhiăn yuôm bhăn, kruăk hƀuê ênuk hlăm hdră mkŏ mjing čar Gia Lai mrâo, mđing truh kơ hdră mđĭ kyar pral, hơĭt kjăp, kpưn đĭ hlăm krĭng lehanăn ala čar. Êpul gơ̆ng bruă ƀuôn sang čar Gia Lai mrâo gưl XII mâo 199 čô bi ala.

Ti anôk bi kƀĭn, Êpul gơ̆ng bruă ƀuôn sang čar Gia Lai mrâo hưn mthâo leh Hdră mtrŭn mơ̆ng Dhar bruă gĭt gai Anôk bruă kƀĭn ala kơ bruă ruah phung khua hlăm Êpul gơ̆ng bruă ƀuôn sang čar Gia Lai mrâo. Hluê anăn, Rah Lan Chung, kơiăng khua bruă Đảng čar dưi ruah păn ngă Khua Êpul gơ̆ng bruă ƀuôn sang čar Gia Lai mrâo, wưng thŭn 2021–2026; Trương Văn Đạt, Khua hlăm Anôk bruă Đảng čar lehanăn aduôn Huỳnh Thúy Vân, Khua hlăm Anôk bruă Đảng čar dưi ruah păn ngă Kơiăng khua Êpul gơ̆ng bruă ƀuôn sang čar Gia Lai mrâo. Dhar bruă gĭt gai Anôk bruă kƀĭn ala ruah aduôn Đinh Ly An păn ngă Khua Anôk bruă hluê ngă hdră bhiăn, Phạm Tấn Thành păn ngă Khua Dhar bruă Duh mkra – Ngăn prăk; aduôn Huỳnh Ngọc Hà păn ngă Khua Dhar bruă Dhar kreh – yang ƀuôn mơ̆ng Êpul gơ̆ng bruă ƀuôn sang čar Gia Lai mrâo wưng thŭn 2021-2026. Blŭ hrăm tŭ mă bruă klam, Rah Lan Chung, Khua Êpul gơ̆ng bruă ƀuôn sang čar Gia Lai mrâo brei thâo, hŏng kơhưm lehanăn bruă klam mrâo, ñu srăng lŏ čuê boh tŭ mơ̆ng wưng păn bruă êlâo, duh myơr jih klei thâo pô čiăng mkăp ngă bruă kơ mnuih ƀuôn sang, năng jing pô bi ala mnuih ƀuôn sang ruah leh, gĭr bi leh jih bruă klam mâo kčah jao./.