Đơ đam tơring čar Dak Lak hơmâo 33 bit anih pơplông hăng 22.500 čô mơnuih nao pơplông. Anom bruă Pơtô hăng Pơjuăt tơring čar ngă hrŏm djop sang bruă kơnuk kơna, pok pơhai lu hơdră pơhlôm rơnuk rơnua, ngă gêh găl brơi kơ čơđai sang hră mut pơplông, biă mă ñu ƀing čơđai sang hră kual ataih, kual tơnap tap hăng sang anŏ ƀun rin. Jơlan hơdră “Djru pran bơyan pơplông” ƀơi Dak Lak hơmâo 1000 čô hlăk ai tơdăm dra pơyơr pran jua. Ƀing nao djru hrŏm anai, hyu pơtô lăi, pơčrâo brơi jơlan glông, anih nao pơplông, hơdră ngă hră pơar, mut pơplông; pơpha brơi gêt ia mơñum, mơnong ƀong huă, wai lăng brơi gơnam hăng rơdêh kơ ƀing nao pơplông; tơlơi djru anun soh sel đôč ƀu apah prăk ôh....hrŏm hăng anun, djru hrŏm pơgang tơlơi rơnuk rơnua hơđong jơlan glông, anih dŏ, pơdơi pơdă, kiăng huăi lŭk pŭk ƀơi anih dŏ pơplông. Jơlan hơdră anai, hơmâo jak iâu djru 1.500 anung asơi brơi kơ čơđai sang hră pơplông huă ƀong ƀu apah prăk hăng 50 kơthung ia tơsâo rơmô, hăng hơdôm hơpluh gêt čai ia mơñum brơi đôč kơ čơđai sang hră nao pơplông; laih anun iâu pơčruh prăk ƀơk prăk hrăm hră kơ 4 čô amăng bruă ngă “Djru pran bơyan pơplông” rơnoh prăk hơmâo 2 klăk prăk sa anung, brơi kơ čơđai sang hră tơnap tap, sang anŏ ƀun rin hloh.

Tơring čar Kon Tum hmâo rơbêh kơ 5.300 čô čơđai pơplông mă ƀăng gưl 3. Đơ đam tơring čar pơpha 14 bôh anih anom pơplông hăng 244 bôh anih pơplông hăng 28 bôh anih dô̆ tơguan. Rơngiao kơ anun, gơnong bruă pơtô pơhrăm hơdôm anih anom plơi pla ăt hmâo pơpha dong mơn 9 bôh anih anom pơhlôm hlâo tơdah hmâo tơlơi ayuh hyiăng ƀu klă ngă. Kiăng pơhlôm tal pơplông mă ƀăng gưl 3 pơphun pơhlôm klă, tơpă, djơ̆ tơlơi pơkă, tơring čar Kon Tum iâo pơhrui rơbêh kơ 1.200 čô mơnuih apăn bruă, mơnuih mă bruă čar ngă bruă wai lăng čơđai pơplông. Hơdôm anih anom amăng tơring čar hmâo iâo pơhrui rơbêh kơ 600 klăk prăk djru rơbêh kơ 1.800 čô čơđai tơnap tap. Hrŏm hăng anun, hơdôm bôh sang hră ăt prăp lui laih tŏng ten anih ƀong huă, anih dô̆ kơ čơđai sang hră djuai ania ƀiă mơ̆ng anih ataih nao pơplông.

Thun anai, tơring čar Gia Lai hơmâo rơbêh 16.200 čô mơnuih čih anăn pơplông. Đơ đam tơring čar pơphun 42 bit anih pơplông hăng 718 boh naih mut pơplông. Gia Lai hơmâoiâu pơtum 4.500 čô khua mua, nai pơtô, mơnuih apăn bruă djru ĕp lăng tal pơplông. Bruă ngă “Djru pran bơyan pơplông” ƀơi tơring čar hơmâo pơgang hơđong djop anih nao pơplông. 2.400 čô čơđai sang hră tơnap tap ƀơi tơring čar hơmâo djru prăk huă ƀong, anih dŏ hăng rơnoh truh kơ 940 klăk prăk. Kơnong ƀơi plơi prong Plei Ku hơmâo djru ba anih dŏ, anŏ ƀong huă, pơdơi pơdă kơ ƀing čơđai nao pơplông.

Đơ đam tơring čar Dak Nông hmâo rơbêh kơ 8.500 čô čơđai ngă hră nao pơplông mă ƀăng gưl 3. Tơring čar pơpha 23 boh anih anom pơplông sit nik hăng abih bang mrô 380 bôh anih pơplông, dưi pơpha dưm kơnar ƀơi hơdôm bôh tơring glông, plơi prong, kiăng gal brơi đut hlah kơ bruă nao rai mơ̆ng čơđai, biă ñu ƀơi kual asuek, ataih.

Tal pơplông thun anai, tơring čar Lâm Đồng hơmâo giăm 17.000 čô čih anăn pơplông. Tơring čar dăp brơi 40 bit anih pơphun pơplông hăng 719 boh anih mut pơplông. Mơnuih djru amăng bruă pơphun hăng ĕp lăng tal pơplông lĕ 2.500 čô. Hăng anŏ prăp lui tong ten, dăp hlâo, jao bruă, prăp lui gơnam yua mă bruă, hơdai gum hrŏm djop sang bruă ngă hrom tong ten amăng Gơnong bruă Pơtô hăng Pơjuăt laih anun sang bruă kơnuk kơna, tơring čar Lâm Đồng khut khăt pơphun tal pơplông rơnuk rơnua, tơpă hơnơ̆ng, djơ̆ tơlơi phiăn hăng tŭ mă boh tơhnal hiam klă hloh.