Ră ruai tom mơak hăng mơnuih ƀôn sang pơ tač rơngiao, Khua dêh čar lăi: Việt Nam pơhmư̆ hrŏm jơnum khua mua pơprong tui tơđar hăng ƀing ba jơlan hlâo tal 16 mơ̆ng Jơnum pơčrong sai bơwih ƀong huă rŏng lŏn tơnah ƀơi Thiên Tân hăng bruă mă glăm ba “Hơmâo lu tơlơi kiăng lăi nao, hơmâo lu mơta anŏ kiăng pơ-ư ang”, mơ̆ng anun, lăi pơtong kơnuih hing ang hăng anŏ đăo kơnang prong tui mơ̆ng lŏn ia ta.

Kơ tơlơi rô nao rai dua bơnah dêh čar, Khua dêh čar lăi rơđah, Việt Nam hăng Khač lir hơbit tong ten hơdôm rơbâo rơnuk truh ră anai, yua kơ anun, pơtrut bruă ngă pŭ ƀăn hăng dêh čar Khač sa bruă mă khom ngă baih lah. Anai lĕ tơlơi ruah mă yom yua dêh čar Khač lŏn ia prong, mơnuih lu, dêh čar jĕ giăm ha mơguai, tơlơi bơwih ƀong huă prong dong tal 2 ƀơi lŏn tơnah. Khua dêh čar rơkâo ƀing khua anih jưh pơ ala dêh čar hăng mơnuih ƀôn sang Việt Nam ta dŏ ƀơi dêh čar Khač khom pơbŭ tui bruă ngă giăng mah hiam klă anai, kiăng jai hrơi pơđĭ kyar hloh, hiam klă hloh, pơđĭ kyar na nao “jing gơyut gơyâo rah, adơi ayong rah”. Čang rơmang mơnuih ƀôn sang ta ăt gir run djru hrŏm akŏ pơdong bruă ngă giăng mah pŭ ƀăn anun kiăng “Na nao mơtah mơda hơđong kơjăp”.