Tung hâi ki apoăng xiâm tơ’mot kong pơlê, mâu kăn, mâu khu râ, kơvâ cheăng ối tung Khu ngăn ‘na Chiâk deăng ƀă Kong prâi Dak Lak (ki nếo) hiăng pơkuâ tơdjuôm roh hôp vâ xing xoăng, pơcháu tơdroăng cheăng, môi tuăn tung tơrŭm mâu tơdroăng cheăng.

Mâu tơdroăng ki xiâm tung pêi pro mê cho vêh séa ngăn ‘na mâu kơvâ cheăng ki u ối, ta hâi teăm kêi, kơjo mơnhên, pêi pro mâu hnoăng cheăng ki kal thâ rĕng klêi tơdrêng, pơtối tŏng gum ăm ‘na pêi cheăng, pêi chiâk pêi deăng, pơkuâ ngăn tơmeăm khoăng tung kong, tung kơdâm tơnêi, a kroăng têa ƀă a tơnêi tíu, kong prâi ki hiăng châ pơkâ pêi pro, vâ ga tơniăn ăm hneăng ki pêi cheăng châ tơ’lêi hlâu, ôh tá kreăng tơvâ ki kố ki mê.

Pôa Mai Vũ Quốc Bảo, kăn ƀô̆ Ngăn ‘na pơkuâ ngăn ki Dâi lĕm dêi Chiâk deăng, Pêt kong, Păn tơnăng Ká xixôŏng, hdrối nah pêi cheăng a kong pơlê Phú Yên (hdrối nah) ai tối tiah kố:

“Ƀă hiâm mơno hbrâ rơnáu hnoăng cheăng. Hâi apoăng lăm pêi cheăng a môi tíu ki nếo, kơnôm hiăng hbrâ rơnáu ahdrối, tŏng gum ăm mơngế ki cheăng mê rơxế prôk lăm, kâ ối, mâu tơdroăng cheăng, troh a chôu phut kố, á xuân chiâng pêi hlối mâu tơdroăng cheăng ăm ga i tro ƀă mâu tơdroăng cheăng ki khu râ kăn pá pêng hiăng pơcháu, mâu tơdroăng hmâ pêi rêm hâi”.

Pôa Đỗ Tuấn Hưng, Ngăn ‘na Pơkuâ tơmeăm ki Dâi lĕm ‘na Chiâk deăng, Pêt kong, Păn tơnăng ká xixŏng kong pơlê Phú Yên tối ăm ngin ‘nâi, klêi kơ’nâi tơ’mot kong pơlê, kơvâ cheăng ngin hiăng ai tơ’nôm 8 ngế kăn ƀô̆ ing kong pơlê Phú Yên lăm a Dak Lak pêi cheăng. Troh nôkố, mâu vâi ngoh nâ o ki mê hiăng tơniăn ‘na tíu kâ koi, ối pơtê, hbrâ rơnáu tŭm têk hiâm tuăn mơno, hbrâ ăm tơdroăng cheăng a chal ki nếo.

“Ngin hiăng hôp vâ pơkâ pêi pro, xing xoăng i nhên tơrêm ngế cheăng tung kơvâ cheăng ki nếo, thâ rĕng pêi pro tiô dêi hnoăng cheăng tơná, vâ rêm tơdroăng châ rĕng pêi pro tơniăn, malối mâu hnoăng cheăng tung 6 khế mơ’nui hơnăm ôh tá hrá ah lơ ôh pa teăm klêi”.

Jâ Đặng Thị Thủy, Phŏ Ngế ngăn ‘na Chiâk deăng ƀă Kong prâi Dak Lak vêh mơnhên, kơvâ cheăng kố kô tơrŭm dêi pó i tơniăn, rĕng teăm mơjiâng khu kăn hnê ngăn, pơtối rak vế tơdroăng cheăng ăm i tơniăn ƀă tơkŭm pêi pro tro tiô hnoăng pá pêng hiăng pơcháu, pêi pro tro tiô pơkâ cheăng tung mơnhông pêi cheăng kâ-rêh ối pơlê pơla, klêi kơ’nâi 2 kong pơlê tơ’mot dêi pó.

“Ngin hiăng hbrâ vâ veăng mơ’no dêi hnoăng cheăng tung mơnhông hnoăng cheăng mơnhông hên tâ nếo kơvâ pêi chiâk pêi deăng, tơkŭm pêi pro mâu tơdroăng ki tơ’lêi hlâu ing kong kế, nhâ loăng, tơnêi tíu vâ mơdêk kơvâ chiâk deăng ƀă tơnêi tíu châ mơnhông rế hên, krá tơniăn ăm kong pơlê ki nếo châ mơjiâng kố. Ƀă ki kố, cho roh ki tơ’lêi hlâu vâ vêh mơnhông ăm kơvâ pêi chiâk pêi deăng, tơnêi tíu, kong kế, nhâ loăng tro tiô khôi túa ki nếo ƀă tơro ƀă hyôh kong prâi, tơnêi tíu”.