Hơnăm kố, mơhé hiăng vâ chê 70 hơnăm, pôa K’ Keo krâ pơlê đi đo djâ troăng lĕm tung tơdroăng pêi pro “Tơpui tơdrêng ƀă pêi”. ‘Na mơnhông cheăng kâ tung rơpŏng hngêi, rơpŏng hngêi krâ pơlê ai 2 ha tơnêi chiâk pêt kơphế, rêm hơnăm châ xo lối  8 tâ̆n kloăng hiăng uâ lĕm; 8 sào klâng, ai 2ha klâng pê péa rơnó, rêm hơnăm châ xo dâng 8 tâ̆n báu. Pakĭng mê, rơpŏng hngêi pôa ối pêt mâu loăng plâi ki ê a chiâk kơphế mê cho sầu riêng, mắc ca, bơr, plâi mit... Kơnôm ing mê rơpŏng hngêi pôa K’Keo ôh tá xê to ai kế kâ kế ‘măn mê ối kum kuăn pơlê tung thôn. Pôa ăm ‘nâi:

“Hdrối nah kuăn pơlê a tung pơlê hâi ‘nâi xúa khoa hok kih thuât tung pêi chêak, pêt báu klâng, pêt kơphế hâi ‘nâi túa rơvât phon, rak ngăn. Rơpŏng hngêi pôa hiăng pêt apoăng, drêng rơpŏng hngêi pêi tơƀrê mê kuăn pơlê nếo troh hriâm ƀă pêi ƀôi, ing túa pêi cheăng mê, krâ pơkê xuân hnê ăm vâi krâ nhŏng o tung pơlê, púi vâ kuăn pơlê xuân chiâng pêi môi tiah tơná”. 

Thôn Hàng Làng ai 384 rơpŏng (ki hên cho mơngế K’Ho), nôkố bú ai 4 rơpŏng kơtiê. Tơdroăng rêh ối tơmeăm khoăng rế mơnhông, túa lĕm tro tuăn tơmiêt dêi kuăn pơlê rế hên. Jâ  Ka‘Lèm, ối a cheăm Di Linh ăm ‘nâi, kơnôm ai hnoăng veăng ‘no dêi pôa K’Keo krâ pơlê, mê thôn Hàng Làng chiâng  pơ’lêh xông tơƀrê:

“Pôa K’Keo krâ pơlê cho ngế kuăn pơlê pâ nhoăm, ai rơkong tơpui pro kuăn pơlê akố vâ hmâng tung hnê mơnhông cheăng kâ rêh ối pơlê pơla, rak túa lĕm tro ton nah dêi kuăn ngo tơná. Pôa đi đo kơhnâ hnê ăm kuăn pơlê ‘na troăng hơlâ dêi Đảng luât Tơnêi têa, hnê kuăn pơlê túa pêi cheăng ki vâ châ tơƀrê, mơhnhôk kuăn pơlê môi tuăn dêi pó tơniăn kring vế dêi pơlê”.

Tiô tơdroăng mơhnhôk dêi pôa K’Keo krâ pơlê, hên rơpŏng kuăn pơlê hiăng tah lôi túa pêi cheăng ton nah ki ôh pá tro, tá kâi xông tơƀrê, kuăn pơlê rơtế ƀă dêi rơpó mơjiâng tơdroăng rêh ối rơkê plĕng, pôa tối:

“Tơdrêng ƀă hô̆i đong krâ pơlê mơngế kuăn pơlê pâ nhoăm dêi thôn, kâ pơlê đi đo pơchân rơpŏng hngêi nhŏng o xiâm, mơhnhôk kuăn cháu thế hriâm tơdroăng ki lĕm tro, ki nếo vâ mơnhông tơƀrê, ôh tá chiâng pêi pro tơdroăng ki ‘mêi ki pro tơ’nhiê pơlê. Ối ai ivá kâi pêi thế pêi ‘nôi, veăng ‘no hnoăng ƀă Đảng Tơnêi têa, rơtế ƀă pơlê hnê kuăn cháu pro ti lâi vâ mơnhông cheăng kâ dêi rơpŏng hngêi, rak túa lĕm tro ton nah dêi kuăn ngo, thôn pơlê tơniăn  hơniâp ro, môi tuăn tiô Đảng, tiô Tơnêi têa.

Pôa K’Keo krâ pơlê  ối cho ngế ki hlê hên tơdroăng ‘na túa lĕm tro ton nah dêi kuăn ngo K’Ho. Tung mâu tơdroăng mơhno túa lĕm tro a kơpong kuăn ngo a Lâm Đồng, pôa xuân djâ mâu ngê̆ nhân veăng lăm mơđah a hên tíu hlối châ kâ hên pri. Tơná pôa K’Keo hiăng hnê ăm 5 lâm hriâm tŏn chêng hnê ăm vâi hdrêng ƀă mâu phô̆m xông rơtăm a pơlê.

Pôa Phạm Văn Linh, Kăn hnê ngăn cheăm Gung Ré, nôkố cho cheăm Di Linh, kong pơlê Lâm Đồng ăm ‘nâi, pôa K’Keo krâ pơlê hiăng veăng ‘no hnoăng tung mơjiâng tơdroăng rêh ối nếo kơpong kuăn ngo a pơlê:

“Pôa cho ngế rơkê, chiâng vâ tơpui tơno xuân môi tiah vâ hnê kuăn pơlê tung tơdroăng cheăng Đảng ƀă Tơnêi têa vâ hnê kuăn pơlê tah lôi túa tơlá ton nah ki oh tá tro  ƀă tơdroăng rêh ối nếo, ‘nâi hnê pơtối rak túa lĕm tro ton rôh nah dêi mơngế K’Ho... Pôa K’Keo krâ pơlê pêi pro tro tơdroăng  mê”.