Pơlê ôm hyô pơlê pơla Ta Lang, cheăm Avương, pơlê kong kân Đà Nẵng ối a kĭng troăng kân Hồ Chí Minh ki ai sap ing ton nah troh nôkố. Tơmối troh a kố châ xah hêi rơtế kuăn pơlê lăm tung kong krê kơchâi drêh, đôu tơpăng, chu a têa plông rup ká, tơná pế xêh mâu kơchâi kâ tiô khôi vâi krâ nah ƀă ngăn mâu tơdroăng mơđah tơbleăng kế xah hdroâng kuăn ngo, rơhdruê, rơngêi, axoâng chal nếo Cơ Tu pá kơdâm hngêi Gươl.

Ngoh A Lăng Mít, ối a cheăm Avương tối ăm ‘nâi: Kuăn pơlê mơngế Cơ Tu mâu hơnăm hdrối bu pêi to chiâk deăng, tơdroăng kơtiê, kơklêa ti tiô tê. Sap ing pơlê ôm hyô pơlê pơla Ta Lang mơjiâng, rơpŏng ngoh Mít xuân môi tiah kuăn pơlê tung thôn pơlê pơxiâm veăng pêi. Hơnăm 2018, ngoh Mít châ tơnêi têa tŏng gum 40 rơtuh liăn, rơpŏng mung tơ’nôm rơnêu toăng hngêi pêi ôm hyô homestay. Tơmối troh lăm xah hêi tâng ai kal vâ, rơpŏng ngoh Lăng Mít ai pế ăm tơmeăm kâ, tơmối ối pơtê kơmăng a homestay yă 100.000 liăn/môi ngế.

‘’Tung pơla tơmối troh kuăn pơlê phiu ro ‘nâng , hngêi á hiăng ai tơmối troh ối. Rế hía rế mơnhông ôm hyô pơlê pơla kuăn pơlê xuân kơdroh pá. Tơmói troh ai pế kâ ăm tơmối, kuăn pơlê tung pơlê kơdroh pá puât. Hdrối nah pêi chiâk deăng lup mê ôh tá ai kế kâ, nôkố pêi ôm hyô tơdroăng rêh ối hiăng chía tâ hdrối nah’’.

Pơlê ôm hyô pơlê pơla Ta Lang, cheăm Avương châ Viê̆n Phát triển châu Á, Tơdroăng tơkêa bro Trường Sơn Xanh xua kơ koan mơnhông Mih tŏng gum ƀă Khu pơkuâ Ôm hyô Việt Nam tŏng gum păng ‘nâng châ pơcháu ăm pơlê pơla xúa ƀă kum tơdah tơmối hơnăm 2019. Sap ing pơxiâm pêi ôm hyô, kuăn pơlê Cơ Tu tíu kố hlê plĕng hên tâ tơdroăng rak vế kong prâi vâ pro lĕm ƀă tơmối.

Pơlê hiăng mơjiâng hngêi Gươl, hnê mơhno rak tơniăn krúa lĕm kế kâ, mơjiâng mâu tôh tê mơdró kơchâi kâ pro mâu kơchâi kâ tiô khôi vâi krâ nah dêi mơngế Cơ Tu, vêh pro tơdroăng teăn tơmeăm, ếo pơtâk ...Môi tiah mâu tơdroăng axoâng tân tung, da dá, tơpui leăng, rơhdruê leăng, mơđah tơbleăng kế xah dêi kuăn pơlê djâ mơđah ăm tơmối ngăn châ tơmối hâk vâ păng ‘nâng. Tơmối ối châ ngăn loăng pơlái kong kế Pơ Mu, kong lim, kong đỗ Quyên ton hơnăm ối ai môi tiah kong ton nah dêi ngo ngối kong kế. Pôa Mạc Như Phương, Kăn hnê ngăn Viƀan cheăm Avương tối:

‘’Ôm hyô tung pơlê apoăng nếo mơjiâng, tung tơdroăng pêi pro mơdêk châ hlê plĕng dêi kuăn pơlê. Ing mê, tơdroăng rêh ối dêi kuăn pơlê pêi ôm hyô châ mơdêk, kum tơdjuôm tung mơnhông cheăng kâ xăm kơklêa kơdroh kơtiê tung cheăm’’.

Pơlê ôm hyô pơlê pơla ĐhRôồng a cheăm Đông Giang ai 35 rơpŏng veăng ƀă 82 ngế pêi cheăng đi đo. Nâ Briu Thị Hạnh, ngế ối tung Tôh teăn ếo pơtâk, pơlê ôm hyô pơlê pơla ĐhRôồng tối ăm ‘nâi, hâi hdrối, ếo pơtâk ki châ teăn bu xúa tung rơpŏng, nôkố tơmeăm teăn tê ăm tơmối ôm hyô rôe pro tơmeăm tơbâ xua mê tơdroăng rêh ối dêi kuăn pơlê hiăng pơhlêh. Tiô nâ Hạnh, môi kơpĕn teăn tê tung kơchơ mơdró ai yă sap ing 800 troh 1 rơtuh liăn, pơtâk ‘nâng ‘nâi 500 rơpâu liăn, kên pâng ki tơpéa 1.200.000 liăn. Pakĭng mê veăng tôh teăn ếo pơtâk, nâ Hạnh ối cho ngế ki veăng pêi tung khu pế kơchâi kâ ƀă khu rơhdruê xoâng tơdah tơmối ôm hyô.

‘’Tơmối ôm hyô troh kơ-êng rôe mê ngin tê, kơbố kal pơtâk ếo vâi mot tung hngêi ngin vâi rôe. Khu ai 35 nâ o. Pơtih kên pâng rơnŏng tê 250 rơpâu liăn môi to, tơmeăm kố châ mơnhên cho tơmeăm OCOP, ngin xuân teăn mâu tơmeăm ki ê nếo pro tơmeăm tơbâ môi tiah kơtong tâ tơmeăm, kơtong tâ phôn, kơtong tâ loăng chêh, tối tơdjuôm cho hên tơmeăm’’.

Hiăng ai chât pơlê, kơtâu a mâu cheăm kong ngo a pơlê kong kân Đà Nẵng mơnhông troăng pêi ôm hyô pơlê pơla, ôm hyô ngăn loăng pơlái kong kế, ôm hyô pơlê pêi cheăng tiô khôi vâi krâ nah. Pơlê kong kân Đà Nẵng  ai hên troăng hơlâ tŏng gum mâu pơlê ôm hyô môi tiah: Thăm tơdjêp mâu khu tê mơdró, kŏng ti pêi ôm hyô, ngế hnê djâ ôm hyô, mơdêk tơdroăng mơhnhôk mơđah tơbleăng tung mâu um tơvi, phôn, măng pơlê pơla vâ mơhnhôk tơmối lăm ngăn, ôm hyô kum tăng cheăng pêi ăm kuăn pơlê, mơdêk pêi lo liăn tơniăn tơdroăng rêh ối, kơdroh kơtiê krá tơniăn./.