Akaok Quoc hoi Trần Thanh Mẫn ba tabiak 34 sarak ka bruk ramik dom jabat karja pakat xa dalam negar. Dom labik karja pakat xa dalam negar hu ba tame ngak meng harei 1/7 anak tal. Taong abih jabat karja pakat xa di 34 tinh, ban hadei tuk ramik lac 3.321 jabat (dahlau tuk ramik lac labaih 10.000 jabat). Dalam nan, Ban raya Ho Chi Minh lac labik hu rilo abih jabat karja pakat xa haong 168 jabat. Takik abih lac tinh Lai Chau, tok hu 38 jabat karja pakat xa. Daok dac khu , hadei ramik, dalam negar hu 13 dac khu. Dalam nan, tinh An Giang hu 3 dac khu dalam nan hu: dac khu Kiên Hải, dac khu Phú Quốc, dac khu Thổ Châu. Ban raya Ho Chi Minh hu dac khu Côn Đảo.

So Khoa hoc saong Kong nghe tinh Dong Nai peih bruk pasram ngak He thong khau tin di tinh tui bruk padang karja palei 2 pakat ngan haong 5 xa, phuong ngak iek dahlau di Dong Nai blaoh tal dom xa, phuong ngak iek dahlau di tinh Binh Phuoc. Tapa bruk ngak iek ye hu duah mboh saong pasiam dil samu dom tavak tavaiy ka gah ky thuat, bruk karei dalam bruk ngak iek dahlau, brei kein lagaih ka bruk ngak biak meng harei 1/7 anak tal.

Tinh Soc Trang srap gap raok Sarak mbaoh tangin brei angan drap ar ilamo oh mboh di meta pakat negar ka Raya adat Thắk Côn (Cũng Dừa) di urang Khmer di xa An Hiệp, huyen Châu Thành. Raya adat brei mboh caong takre ka bruk sron mbon, haniem phol, likau angin siam hajan lagaih, ngak hagait hu nan, raidiuk trei sir haniem phol. Gam haong nan brei mboh ka hatai thau ka phol ka dhar, hatai gul pataom dalam bol bhap rahra, ba mai sa ilamo karei di urang bangsa Khmer di gah Meraong Negar dalam nan hu tinh Soc Trang.

Urak ini, rilo janih baoh kayau di Tien Giang daok trun yaom rilo. Abih di nyu nan lac, baoh uas daok dalam tukvak kan kandah, yaom trun “biak biar”, daok meng 500 dong tal 1.700 dong/kg, ngak ka po bein khat lahik praong. Urang ngak nong Tien Giang hu patagok bruk pala phun uas dalam yaok pluh thun tapa ngan haong taneh pala tagok tal yaok ribau hecta. Kayua yaom biak biar saong pablei tabiak biak kan, urak ini oh takik bein baoh aus urang ngak nong “klak saoh”, oh paik baoh.

UB Bhap bini xa Thanh Tùng, huyen Đầm Dơi, tinh Ca Mau brei thau, dalam bhum bahrau rah tabiak mbang glut jaleih taneh ngak kan kandah tal labik Danaok amuk Thủy Long. Mbang glut jaleih dui tal ar atah 55m, praong 15m trun dalam ribaong, kuhria khat lahik labaih 750 trieu dong. Glut jaleih jeng ngak ka danaok ong Hổ dalam mblang Danaok amuk Thủy Long laik trun kraong. Danaok amuk Thủy Long daok di puk palei Thanh Tùng bahrau hu pasiam padang labaih 2,5 ti dong saong ba tame pandar labaih 3 bilan ye rah tabiak glut jaleih.

Yaok ribau rahra di ban ine Tehran di Iran daok tabiak truh sang danaok, pataom pandap mbang saong ndap nda karei, tuk bol lin Israel kakei caga ka rahra brei nao daok labik karei piah khik kajap bruk karo salamat, ngak parilo bruk duh hatai ka bruk Israel meda peih praong mbang taong tame meng jalan ahaok par. Tui kuhria tal harei 15/6, labaih 100.000 urang hu tabiak truh Tehran. Dom sang iek ruak di dom tinh gah barak Iran hu pathau khan bruk tagok rilo dom mbang tame sang iek ruak taong ruak hu pambuak tal bruk srau kadau ini. Mesuh metak di Iran saong Israel hu yam tame harei ka 4, hu yaok rituh urang metai saong yaok ribau urang njauk rambuas.

Dom urang njom ruak COVID-19 di Thai Lan hu tagok rilo dalam harei 13/6 hu labaih 12.000 urang njom ruak bahrau saong klau urang metai. Tui kuhria meng Mentri Y te Thai Lan, tan suat duah mboh bien the XEC hu tagok rilo dalam dua bilan akaok thun 2025. Anak bruk ngak nan, dom jabat y te pachreih rahra brei paglaong hatai caga, tui iek tani tanat dom ruak hu medil, khik tani tanat bruk randap rao tangin saong cuk pandap padang idung pabah di dom labik hu rilo urang piah patakik bruk mbuan njom mbak.

Dom urang roh duah daok dalam sang bac Dai hoc Kong nghe Sydney di Australia daok roh duah pandar tri tue nhan tao piah puac hu hatai sahaneng di menuac urang. Dalam bruk roh duah ini, urang hu mbaok tame cuk iek dahlau 1 baoh talmo hu pagam 128 ndien cuc hu pambuak haong computer. Ndap nda ini ngak bruk yau sa mac bac, nyu duah mboh dom xung ndien dalam te bao glo saong kanal gilac. Dom urang ilamo caong takre, ilamo kong nghe ini brei hu patagok jang veik piah daong dom urang ruak dot quy hu pasiam veik glo tapa bruk bac megru gam gam.