Meng harei 1/7 anak tal, danak dak ngak nong huu co, ngak nong vil paying hu masraiy phun jien 70% yaom kaom danak dak bo oh cang padang drap ar khik takai. Tui Sarak lek taka 156 di rajaei, tukvak bayar sraiy ngan haong tuai damuai gaok kan kandah kayua makna atah, kan si ngak jeng hu ngak gilac. Gam haong nan tui tame tanut lagaih di danak dak, jalan ngak mbang pablei salih, prein bayar sraiy di tuai damuai piah maong iek brei mesraiy piah daong rahra pasiam dom kan kandah, tani tanat bruk ngak mbang.

TPHCM daok tame bilan pablei trun yaom, alin ndap nda ralo abih dalam thun ngan haong rilo danak dak praong. Danak dak thun ini pachreih labaih 10.000 doanh nghiep tame bruk pachreih urang blei pandar, jaik 80.000 bruk pachreih urang blei hu peih pablei, trun yaom tal meteh. Njauk ndem tal lac bruk peih praong peih ngak pambak praong tal urang blei pandar di dom labik che xuat, KCN, labik hu rilo urang ngak bruk, ngak kong nan lac dom urang khin blei pandar rilo min kurang jien blei kayua ndap nda yaom chiat. 

Tal tukvak ini tinh Kon Tum hu salah blaoh dom bruk srap gap ka mbang pakacah tamat THPT hu padang meng harei 25-27/6. Mban Pati tacei mbang pakacah brei pagam haong bruk ngak cambaih laih ka yaok urang jakar meyah rah tabiak bruk chung dalam luac jalan ngak bruk di mbang pakacah. Mbang pakacah thun ini tinh Kon Tum hu labaih 5.300 anek saih tame pakacah. Tinh jak ba labaih 1.200 urang jakar, vien chuc ngak bruk pakacah, dalam nan urang jakar maong iek pakacah tapak jaik 630 urang.

Dom bilan akaok thun ini, bruk taong chap ikan kaya ia di urang tinh Tien Giang  gaok rilo kan knadah, abih di nyu nan lac abih rilo jien buh tame ngak, chap mek hu takik kaya ikan, yaom pablei oh hu tagok. Urak ini, dom ghe gilai taong  chap ikan  dalam tinh daok jaik 1.300 sruh, ralo meng lac nao ngak mbang di tasik atah, duah bruk ngak ka yaok ribau urang. Yau nan min, dom ghe gilai taong chap ikan ndih atah ar biak ralo kayua bruk nao tasik bhap bini khat lahik rilo phun jien, tavak sre saong oh daok phun jien piah ngak veik. Piah bruk taong chap ikan labik tasik atah hu karo kajap, urang nao ngak mbang di tasik khin taduan hu bruk daong meng dom gah, dom pakat, abih di nyu lac phun jien ramik pasiam veik ghe gilai saong jien daong yaok mbang tabiak tathik.

Piah patrun bruk mbuan gaok bala kayua langik, halak rầy nâu saong ruak kanyik hala – bilik gol hala ngak kanjah jhak ka phun padai, So Ngak ong saong Moi truong tinh Hau Giang padang tukvak trun pajaih padai Thu dong jeng 2 mbang. Mbang ka 1 meng harei 13/6- 19/6, mbang ka 2 meng harei 12 - 18/7. Ini lac tukvak ka taong abih dalam tinh, patui bruk rầy nâu pandaok tame dalam gom saong bruk rah tabiak di langik, kraong ribaong di yaok bhum, dom bhum palei tui iek saong mbaoh tangin piah ramik radak tukvak lagaih dalam bhum taneh pasang iek.

Jit COVID-19 di Malaysia daok rah tabiak sraw kadau kan thau dahlau, meng akaok thun mbiah tal ini hu jaik 22.000 mbang njom ruak COVID-19. Njauk ndem tal, adit blaoh, taneh ia ini hu jaik 3.500 mbang urang birau njom ruak saong 1 urang metai akok meti. Mentri Y te Malaysia mboh lac, yaom lac dom urang njom ruak  daok rilo  min biar jang ralo mbang bruk pakat negar  saong rajaei yaok kuhria min daok khik caga hu siam.

Danak dak Patagok di Lien hop quoc (UNDP) bahrau ba tabiak pathau khan Patagok Anek menuac thun 2025, dalam nan dak Campuchia tame kapul Patagok Anek meuac Kuhria rah tapa. Ini lac bruk taduan ka bruk patagok kinh te – xa hoi di Campuchia dalam bruk ini negar ini brei tabiak truh kapul negar “patagok biar abih” dalam puac thun 2029. Urak ini Campuchia dak di labik 151 dalam taong abih 193 negar saong bhum taneh hu ndom tal, ngan haong tanut patagok anek menuac di tanut 0,6 daok dalam kapul kuhria rah tapa dalam dunya.

Phuket lac sa labik rivang ma-in yulit danei angan di Thai Lan haong dom tapen tasik mekre, hu rilo bruk ngak brei chreih chrai sambai saong bhum palei biak gheih min birau ini patuh tabiak bruk pablei blei saong pandar can sa. Urak ini, hu tal jaik 1.500 kuan tadai pablei can sa. Rilo tuai damuai negar langiu pandar can sa rah bak di dom tapen tasik saong labik yulit  danei angan pak ini. Bruk ini ngak jhal tal bruk rivang ma-in di labik ini./.