Pahadar 100 thun Harei Bao chi Katmang Viet Nam (21/6/1925 – 21/6/2025), page ini, Po Negar Lương Cường taok gaok, pok meyaom dom Urang ngak mbao naih joi dalam taneh ia. Di var taom gaok Po Negar Lương Cường pandar dom jabat bao chi brei pambuak roh duah piah ba tabiak, salah co che, sarak, brei kein lagaih piah dom urang ngak bao chi meda diuk hu meng bruk ngak, anit ranam bruk ngak, sahnang ngak bruk. Gam haong nan, patui veik sangka pato pakai, pato megru, brei bruk ngak, pok meyaom dom urang ngak mbao abih tung tian, dom urang ngak bao chi sit thun umo, piah padang kapul dom urang ngak bao chi abih tung tian daong bruk ngak, njauk lac “bol lin katmang di jalan sahaneng – ilamo” yau panuac pato kakei di Wa Ho anit ranam.

Di var taom mbaok pahadar 100 thun Harei Bao chi cach mang Viet Nam  peih tabiak di page ini, ong Trương Cảnh Tuyên, Akok UBND ban Cần Thơ caong khin  dom urang ngak mbao oh padeih bac megru, pasram patia, hu pagap yau urang lin di mblang mesruh dalam bruk sahaneng diukrai, ilamo. Tapa nan, pathau khan hu siam jang ka jalan tacei ba di Ndang, hukum sarak di Karja, dom bruk naih gheih birau, urang gheih bruk siam dalam bac megru saong ngak tui jalan diukrai siam mekre di Ho Chi Minh. Bingun ini, Mban peih bruk Jao yai Bao chi Phan Ngọc Hiển ban Cần Thơ hu alin yai ka dom urang vak, kapol nyaom hu kadha vak gheih mek hu yai.

Tinh uy Soc Trang bahrau padang Nyaom biai kuhria iek veik 10 thun ngak Sarak 05 di Mentri Chinh tri mbang ka XII ka bruk “Jhul khang bac megru saong ngak tui jalan sahaneng, ilamo Ho Chi Minh”. Dalam 10 thun ngak sarak hu daong padang ndang, he thong chinh tri tantu hacih sa-at, karo kajap, jhul tagok kinh te – xa hoi di tinh patagok. Sarak 05 daok pambak dalam bol bhap rahra, rilo meng lac dalam mikva bangsa, agama. Tapa nan hu rilo urang naih gheih dalam mikva urang bangsa takik ngan haong bruk ngak pahla, jak ba padang tatua, alin brah ka baoh sang kathaot, kan kandah…; khik ramik saong patagok sap bahsa, akhar huroh cih vak mikva bangsa takik.

Tinh Ben Tre birau hu 5 huyen mek hu tanut chuan padang palei birau saong palei birau paglong. Mbiah tal ini, dalam tinh daok jaik 8.300 baoh sang kathaot, meblah labaih 2%;  hu 7 dalam 21 xa biak kan kandah bhum tapen tasaik hu tabiak truh sarak angan xa biak kan kandah saong 5 xã mek hu tanut chuan padang palei birau. Ben Tre urak ini hu 124 dalam abih tih 132 xa mek hu tanut chuan padang palei birau. Langiu di nan, hu 7 dalam 9 huyen, ban mek hu tanut chuan atau ngak siam bruk padang palei birau.

Hadah page ini, sa mbang hajan praong ngak sa jalan Võ Nguyên Giáp, phuong 12, ban Vung Tau njauk ia dauk trak, ngak gar jalan mbak trak dalam rilo mon, dui atah meng Canah klau Long Sơn tal tatua Cỏ May gah Vung Tau nao tal ban Ba Ria, ngak kanjah jhak trak tal bruk nao mai di rahra saong bruk pajeng ba ndap nda. Anak bruk nan, rahra brei thau dom so dom gah hu pambuak brei samar drah pasang iek gilac taong abih bruk taoh thuak ia di angaok jalan ini. Gam haong nan, brei hu jalan langyah pacang cakak ia dauk hu lagaih jang.

Trung Quoc birau ba tabiak tanut bhong - tanut kakei dahlau ka bruk ia ribuk sua hadei dom mbang hajan praong di ralo labik di taneh ia ini. Tanut bhong meriak nan hu ba tabiak kakei di 6 tinh lac An Huy, Hà Nam, Hồ Bắc, Hồ Nam, Quảng Tây saong Quý Châu. Panuac kakei dalam tuk rilo bhum di negar Trung Quoc daok hu hajan praong dui atah harei. Dom jabat dut iek langik tasik mboh lac dom mbang hajan nan lac kayua langik salih karei.

Harei kabruai, Negar Anh mboh lac sa harei pandiak abih dalam thun, tuk ơandiak dut iek hu di Kew, gah Pei London lac labaih 32oC. Kuhria langik kakei lac langik meda tagok glaong jang veik, tanut pandiak glaong abih lac 34oC dalam dom harei anak tal. Thun ini, negar Anh hu tapa dom harei akaok bilan 5 pandiak abih dalam sajarah tuk langik pandiak tagok glaong samar, ngak tagok dom bruk mbuan apui khuah glai saong dom bruk mbuan bala tui luai ia di danao kraong.

Urang danei angan Tom Cruise gah flim lac sa dalam 4 urang danei angan hu palih ruah piah taduan mek yai Oscar di bilan 11 thun ini. Ini lac bruk njauk meyaom kayua ngak biak rilo bruk halan hatian oh huac glah glar  daong ka gah ndien anh di dom urang naih gheih danei angan di Hollywood. Tui Vien Han lam Khoa hoc saong Nghe thuat Điện ảnh Mỹ, yai Oscar di bilan 11 anak tal piah meyaom taong abih bruk ngak di ong saong daong gah kong nghiep ngak flim pasiam veik hadei jit ruak praong COVID -19.