Pasak Salih lek taka so Ban raya Ho Chi Minh hu salih he thong, kareik Blah website Jitvu karja online Ban raya, pagam Blah website Jitvu karja paket negar meng harei 19/6. Dalam tukvak anak tal, Pasak Salih lek taka so ba tame pagam Ban raya Ho Chi Minh, tinh Binh Duong saong tinh Ba Ria – Vung Tau pandar di angaok sa nen tang langyah harak gar karja di Ban raya Ho Chi Minh. Piah khik kajap prein saong ilamo ngak bruk ngan haong urang jakar, kong chuc di 3 bhum palei, Pasak Salih lek taka so Ban raya brei peih ngak bruk ba tame mngak iek dalam harei 21 saong 22/6 ka taong abih 168 phuong, xa, dac khu.

Piah bruk ngak iek dahlau bruk ngak di UB bhap bini xa, phuong tui jalan karja 2 pakat, UB bhap bini tinh Ba Ria – Vung Tau caong khin dom bhum palei brei dak ramik, parabha bruk ngak, labik ngak, ndap nda ngak bruk, pandar kong nghe khaw tin; patui veik khik labik ngak bruk di Pasak ngak bruk hanh chinh karja pakat tinh yau urak ini tal hu tacei pato ba ngak tui sarak birau. Tỉnh brei peih bruk ngak iek di dom xa, phuong, dac khu birau meng harei 21/6 tal 22/6.

Di bingun pahadar 100 thun Harei Bao chi Katmang Viet Nam, Mban Tuyen giao saong Dan van Trung uong pambuak haong dom mentri dom gah peih padang Harei ba tabiak paok tem buu chinh “Pahadar 100 thun Harei Bao chi Katmang Viet Nam (1925-2025)”. Paok tem oh lac ndap nda buu chinh bo daok lac sa thaik thaot daong prein hatai piah pachreih dom urang ngak harak mbao dalam bruk ngak chinh tri saong patagok bao chi bahrau, siam mekre.

Viettel brei peih radaih 5G tal bhap bini di 6 tinh gah Pei Meraong negar. Radaih 5G meda dui atah jaik 2 bilan, vaih tame labaih 160 labik padeih di 6 tinh, ban: Cần Thơ, Vĩnh Long, Cà Mau, Đồng Tháp, Kiên Giang saong An Giang caong khin hu jeng labik sạc kong nghe labik ini labik diah, pambak praong bruk pandar taka so saong caik veik dalam hatai manuac sia ka bilan hè 2025 chreih chrai di bhum Pei negar. Ini lac bruk ngak dalam danak dak pambak praong mang 5G di dunya piah daong bhap bini daok grauk labik hu pandar, oh abih jien saong mbuan abih di Viettel.

Mbang pakacah tamat THPT thun 2025 rah tabiak meng harei 25 tal 28/6. Ban raya Can Tho hu labaih 13.700 anek saih tut angan tame pakacah tui 2 danak dak pato megru pho thong 2006 saong 2018. Piah srap gap siam ka mbang Pakacah, dom sang bac THPT di dalam bhum peih bruk bac megru pataom saong tacei ba anek saih ta-eng bac megru…So Pato megru Ban raya Can Tho hu padang jalan langyah bruk oh yau bhian piah khik kajap karo salamat Mbang pakacah tui njauk adat.

Bol lin Han Quoc birau khan brei thau, Trieu Tien cuh labaih 10 ten lua meng mac cuh rilo phao di page harei 19 bilan 6, meng Sunan jaik ban ine Bình Nhưỡng nao gah Tay Bac. Janih ten lua ini oh ka thau cambaic laic. Bruk cuh ten lua  di Trieu Tien rah tabiak sa harei hadei tuk Han Quoc tame pasram lin kapal ahaok di My haong Nhat Ban, jeng yau hadei ndem puac ka Mỹ saong negar Tay daong Israel taong Iran.

Thu truong Ngoai giao Iran kakei dahlau, negar ini brei taong pacang bruk pambuak tapak halei di My tame mbang mesuh metak di Israel saong Iran, Iran hu taong abih dom bruk pilih ruah njauk ngak. Tong thong Mỹ Donald Trump, urang kamlah dom bruk pambuak di Mỹ dalam mbang taong tame dahlau di Israel tame Iran di page harei 13/6, meng di nan brei mboh ka bruk hu mbaok tame praong jang di negar ini tame dalam mbang mesuh metak. My hu ba dom ndap nda piah mesuh metak tak Trung Dong dalam dom harei tapa, dalam nan hu kapal gilai ahaok par USS Nimits.

Dalam sarak angan birau khan blaoh hu rilo sang bac dai hoc di Australia dang ala. Australia tok hu dua sang bac dai hoc dalam angan 20 sang bac dai hoc dang akok nan lac Đại học Melbourne saong Đại học New South Wales saong hu labik dang ka 19 saong 20. Labik dang di dom sang bac dai hoc di Australia kadun trun  kayua angan je  bruk bac da-a saong khik iek urang ngak di dom sang bac trun gam gam dalam 5 thun tapa./.