Urang dang kaok nyaom biai pakat negar ka bruk ramik caga Mbang pakacah tamat THPT thun 2025, Thu tuong Rajaei Phạm Minh Chính khan cambaic laic, khol drei peih bruk pakacah tuk daok karja 3 pakat min pasang kadha pakacah, brei thau tanut pakacah gam haong tuk karja bhum palei 2 pakat. Thu tuong Rajaei mboh lac “ Anek saih lac pasak, ngak po – Gru pato lac pabak prein khang – Sang bac lac labik padaong- Baoh sanag lac labik pambak tame - Xa hoi lac labik dang kajap”. Bruk pakacha tamat THPT lac harei di taong abih bhap bini, taong abih manuac sia, di taneh ia, di yaok baoh sang, yaok anek saih. Tui nan, ba mbuan lagaih ka yaok anek saih brei mboh prein bac di drei hu siam abih; brei mboh njauk tapak, njauk haong bruk pato saong bruk bac. 

Di mbang nyaom peih ngak Danak buh jien tame padang ngak Mblang kapal haok dunya Long Thanh tukvak ka 1, Pho Thu tuong Trần Hồng Hà taong yaom glong, thau dhar phol dom jabat, po tacei pato, po buh jien tame ngak jeng yau dom don vi pambuak bruk. Yau nan min, bruk daok biak ralo, rilo bruk peih ngak sumu gauk; dom bruk praong, hu makna daok suai ngak. Yau nan ye,  Pho Thu tuong caong khin tukvak anak tal, Mentri Padang ngak pambuak haong dom po buh jien tame ngak pasang iek brei cambaic laic, ginup abih dom bruk, dom bruk nan ngak brei salah di harei 31/12/2025.

Huyen Hoc Mon, TPHCM birau mek hu angan palei pala birau paglong thun 2024. Mbiah tal ini, huyen Hoc Mon ngak salah bruk padang palei pala birau paglong; taong abih 10 xã mek hu tanut chuan tui sarak ba tabiak, ban sit Hoc Mon mek hu angan ilamo birau hu bhap bini njauk hatai meng 95% tagok. Huyen mek hu 9 kadha di Sarak dom tanut chuan huyen palei pala birau paglong vaktu 2021-2025…

Pachreih tui Adit Tasik saong Kapok pulao Viet Nam, Harei Tasik Dai duong Dunya thun 2025, So Ngak nong saong Moi truong tinh Ninh Thuan pambuak haong dom don vi karei saong Hiep hoi pajaih Kaya ia  ba palao 500.000 drei hadang pajaih saong 1.000 drei ikan cim sauk kanyik pajaih tabiak tasik. Ini lac bruk rik tame pasiam parilo veik ikan hadang tasik, lac bruk ngak piah khik caga “ kaya kan raong diuk manuac sia harei hadei”. Gah kaya ia tinh Ninh Thuan brei peih ngak rilo jalan  sumu gauk piah khik kaya tasik, khik hacih alam tasik, sumu kaya tasik di bhum tasik di tinh hacih hijao, kaya meda.

Meng yaom tagok, phun cacao daok hu jeng bruk ngak mbang birau di rilo po bein di  huyen Trà Ôn, tỉnh Vĩnh Long. Urak ini baoh cacao tagok yaom glong 3 mbang, meng 5.500 dong tagok 17.000 dong sa kilo, duah jien tame tani tanat ka urang pala. Urak ini, huyen Tra On hu labaih 300 ha pala cacao. Gah ngak nong huyen Tra On pachreih  peih praong bruk pala cacao hacih sa-at pambuak bruk pablei, piah patagok kinh te bein tui jalan lagaih, khang kajap.

Jabat chuc nang Thai Lan chap mek kol pachot pagat negar langiu, pamong tame bhap bini Australia, tui chap mek 13 urang negar langiu. Dom urang ngak bruk padauk lakuh sa kong ty jien padai njauk hukum saong pandar rilo jalan iew phone ka bhap bini Australia piah pagat jien trai phieu haong jien laba tagok meng 7 tal 10%.

Tui harak pathau khan di UBS - sa gilang pariak praong di Thụy Sĩ, thun blaoh hu 379 ribau urang hu jeng urang kaya meda, sumu labaih 1 ribau urang hu jeng urang kaya meda yaok harei di My kaya meda samar. Harak pathau  brei mboh, My meblah jaik 40% urang kaya meda di dunya thun 2024. Gilang Thuy Si kuhria thun anak tal, drap ar kuhria rah tapa di yaok urang umo ngak mbang meda tagok  veik di My, blaoh tal Trung Quoc.

Harei 17/6, Phan Lan pakauk  uranaih umo ala 15 thun pandar radaih ndien scooter. Langiu di nan, dom kong ty pabak jitvu pah radaih  nan njauk brei hu harak adat ngak bruk kayua karja  mbaoh tangin. Radaih scooter brei peih samar tal 25 km sa mon. Urang jakar Phan Lan kuhria yaok thun hu labaih 1.600 urang njauk rambuac trak kayua bala radaih scooter điện.