Tui kuhria, harei ini 16/6, taong abih 36 xa, phuong birau di tỉnh Binh Duong meda tame ngak iek dahlau bruk ngak hadei ramik pagam tame. Dalam 5 harei akaok, 8 phuong, xa birau pagam tame di Binh Duong taduan saong langyah labaih 6.000 harak gal ho so karja. Langiu di bruk ngak hu siam camereip, bruk ngak iek dahlau daok hu rilo tavak tavaiy kan kandah. Yau ye, ndap nda ngak bruk di dom labik oh lagaih haong bruk ngak yau urak ini. Bruk parabha bruk ngak ka urang jakar  daok lahik rilo tukvak saong dom urang birau oh ka randap haong bruk ngak.

Dalam tinh Dak Lak urak ini hu 38.800 ha durien, dalam nan hu 22.600 ha daok brei paik baoh. Tinh ini hu labaih 260 labik pala kuhria hu 7.400ha brei ma so pablei tabiak negar langiu meblah jaik 33% taneh pala. Tui ong Lê Anh Trung, akok Kapol durian Dak Lak, piah pablei tabiak negar langiu hu khang kajap, oh daok jalan ngak halei karei langiu bruk pasang iek duah thau taong abih gah saong ngak brei cambaic laic. Yaok bein phun pala brei pasang iek dahlau tani tanat dahlau tuk paik baoh di bein tabiak piah baoh durian Viet Nam hu pablai tabiak negar langiu khang kajap.

Urak ini, arieng janih praong 2- 3 drei trak sa kilo hu urang blei yaom meng 200 – 250 ribau dong sa kilo, daok arieng hu gạch yaom meng 400 – 450 ribau dong sa kilo, tagok meng 20 -30 % dut saong tukvak ini thun dahlau. Meng nan, yaok hecta danao raong arieng, urang ngak nong meda laba labaih meng 160 tal 180 trieu dong. Tinh Trà Vinh hu labaih 23.000 ha taneh raong arieng, ralo lac raong tui jalan langiu langik. Yaok thun, tinh pabak labaih 6.500 tấn arieng pablei tabiak darak pasar.

Dalam dom harei jiak ini rilo po bein pala pa-ok di tinh Dong Nai gaok kan kandah , tuk baoh pa-ok laik yaom biar, gaok mai tok meng 1.000 tal 1.500 dong sa kilo, biar abih kuhria meng dom thun tapa. Bruk nan kayua ngak tabiak rilo jang urang blei. Anak bruk nan, muk Nguyễn Thị Hoàng, Pho Akok UBND tỉnh Đồng Nai caong khin gah ngak nong brei caik hatai ralo tal dom bruk pala gam haong kuhria ramik veik bruk ini. Tui nan, jhul pakhang dom bruk pala hacih sa-at, pandar kong nghe glong.

Lien hiep dom gah pambuak bruk di TPHCM birau peih ngak danak dak “Pataom mbaok  thun 2025”, pataom tame biak ralo urang lambaok di dom negar langiu saong kapol nghe thuat dalam saong langiu negar.  Danak dal ini pathau khan asar kadha siam, padang thaot binguk, taneh ia Viet Nam saong pambuak talei rohim haong bhap bini negar langiu daok diukrai saong ngak bruk di TP.HCM. Ini lac bruk lagaih piah pambak praong ilamo siam gheih di Viet Nam saong jhul pakhang thaot binguk  di sa ban raya sami samar, anit ranam, yam tame dunya.

Nyaom roya UB bhum paphia negar hon hop (JBC) Campuchia - Thái Lan tamat blaoh hadei dua harei ngak bruk di ban ine Phnom Penh, negar Campuchia. Campuchia caong khin Thai Lan ba tabiak bruk meblah taneh di taphia negar do bhum Mom Bei, kalan Ta Moan Thom, kalan Ta Moan Tauch saong kalan  Ta Krabei tabiak Toa an Cong ly Dunya, tui nan mboh lac: “ meng tukvak ini nao, 4 bhum taneh ini oh lac kadha gheih bo daok ginum biai saong langyah dalam bruk Campuchia - Thái Lan”.

Rajaei Indonesia brei atah klak adat bruk blei tame athur diuk. Bruk di srak ini lac pabak ginup rilo saong ia tasau ka bhap bini. Langiu di nan, sarak ini caong khin daong gah kong nghiep ngak ia tasau dalam negar patagok rilo saong patagok asar siam di kaya. Dahlau di nan, Thu truong Mentri Ngak nong Indonesia Sudaryono jeng khan brei ka rajaei taneh ia ini hu bruk ba tabiak dua trieu drei athur diuk dalam 5 thun anak.

Takik di nyu 6 tuai damuai metai, rilo urang karei ia theik nao saong medil lac blung ia metai tuk tatua tapa ban Pune, bang Maharashtra di Ấn Độ jaoh glut jaleih  di harei 15/6. Tui dom khaw tin khan brei thau  hu labaih 100 tuai damuai hu mbaok  di tatua tuk glut jaleih. Rilo urang laik trun kraong  tuk ia tagok glong saong ba theik. Urang jakar An Do daok pasang iek ngak brei cambaic laic ka bala nan.