Ngak bruk haong Tinh uy Dong Nai ka bruk bangsa, agama, ong Nguyễn Trọng Nghĩa, UV Mentri Chinh tri, Bi thu T.Ư Đảng, Akok mban Tuyen giao saong Dan van pakat Negar, tacei pato Ndang bo, karja, Mat tran Negar Viet Nam tinh, dom gah chinh tri - xa hoi tinh Dong Nai patui sangka raidiuk urang bangsa takik, urang tui agama,  kham merat ba dom baoh sang kathaot, jaik kathaot. Tui nan, pathau khan, jak ba, meriak gauk, khan veik, oh brei kol kanjiak jhak nyu neh rabha bruk jum pataom bangsa, pambuak agama.

Hadei 5 thun pato saong bac tui danak tapuk pho thong 2018, ngan haong rilo bruk ngak jaik haong raidiuk, thun 2023, Cần Thơ hu ba tabiak truh sarak angan “bhum kurang gah pato megru” di dalam negar. Thun bac 2024-2025, hu 358 dalam 449 sang bac mek hu tanut chuan pakat negar. Cần Thơ tuk halei ba kaok nao dahlau di Bhum taneran kraong Cuu Long ka bruk anek saih pakacah naih joi pakat negar, dunya jeng yau pakacah tamat THPT. Thun 2024, Mentri Pato megru taduan Cần Thơ mek hu tanut pato bac tieu hoc dalam bhap bini pakat 3, pato bac THCS dalam bhap bini pakat 2.

Hadei mien jien bac ka anek saih THCS di karja, tinh Long An daok kuhria  caga peih praong bruk ngak tui sarak ini di taong abih dom labik pato bac langiu karja. Ini lac bruk pachreih bhap bini bac megru. Long An nan lac tinh akaok meti di bhum ĐBSCL ba tabiak saong ngak tui sarak oh mek jien bac ka anek saih THCS di karja. Langiu di nan, tỉnh daok hu sarak daong ka gru pato mam non di dom sang bac langiu karja di labik ngak kong nghiep saong anek bik di urang ngak kong.

Tinh Ca Mau mboh tangin ka 473 urang padeih huu dahlau thun umo, padeih bruk kuhria jien bayar labaih 476 ti dong. Urang jakar, kong chuc, vien chuc, urang ngak bruk di tinh padeih huu dahlau thun umo atau padeih bruk mboh cambaic laic, abih di nyu nan lac ralo di pakat huyen saong xa dalam mbang ramik pagam tame pakat xa, padeih ngak bruk pakat huyen. Mbiah tal ini, dom urang hu brei padeih huu dahlau thun tui Sarak 178, urang taduan hu jien ralo abih lac 2 ti dong.

Harei 23 atau 24 bilan 6 anak tal, Binh Thuan ba tame ngak iek dahlau bruk ngak di phuong birau Phú Thủy saong xã Hàm Thuận. Ini lac bruk caga dahlau hu makna praong dalam ka bruk pagam tame 3 tinh lac Lâm Đồng, Bình Thuận, Đắk Nông jeng tinh Lâm Đồng birau, hu ba tame ngak bruk meng harei 1 bilan 7 anak tal. Dahlau di nan, Mban Padang bruk Tinh uy Lam Dong ba tabiak caga urang jakar ngak bruk ka tukvak anak tal. Dalam nan hu bruk ba urang jakar tagok ngak bruk tinh Lam Dong (birau) hu peih ngak tui jalan lagaih.

Anak bruk mesruh metak catang oh ka bhian mboh di bhum Trung Dong, bhap bini dunya iew dua gah brei padeih patuh phao, duah jalan ginum biai ba siam. Tong thong Prang iew brei padeih dom mbang taong tame labik bhap bini di Iran saong Israel, gam brei thau dahlau duah jalan ngak tableik karja di Tehran meda lac suan jalan ngak. 20 taneh ia dalam saong jaik bhum taneh Trung Dong jeng hu tabiak sarak haong gauk iew dom gah padam trun bruk mesruh metak, padang sa Trung Dong oh hu vu khi hat nhan. 

Jien padai lac bruk kan kandah praong rik tame ngak diuk pasang methao gauk, klak gauk di Trung Quoc. Tui dom urang roh duah gah manuac sia, bruk klak klaoh gauk di labik tapen tasik kaya meda takik jang saong di dom labik ban raya saong gah Barak negar kathaot rilo jang. Piah langyah bruk diuk pasang klaoh gauk, sa diuk pasang payua harak likau klak gauk tagok toa an meda hu 30 harei piah langyah ba siam. Dom diuk pasang nan brei tame blah web di So Noi vu dua mbang – dahlau saong hadei sa bilan piah pagol harei mai tut angan klak gauk. 

Ha Lan kakei dom amaik ame juai brei uranaih umo ala 15 thun pandar dom ung dung mang xa hoi yau TikTok saong Snapchat. Tui sarak tacei pato nan, uranaih umo 15 thun oh pandar  mang xa hoi, min uranaih  umo 12 thun tagok brei pandar ung dung piah payua panuac. Rajaei Ha Lan brei mboh lac: “Jalan pandar meda hu lagaih nan lac: dahlau abih bac ndem meyai, hadei nan ngak randap haong mang xa hoi”./.