Quoc hoi brei tapa Sarak di Quoc hoi ramik pasiam, pabak dom asar kadha di Hukum negar thun 2013. Tui Sarak ini, dom jabat karja dalam negar CHXHCN Viet Nam  hu padang dua pakat, dalam nan hu tỉnh, ban di pakat negar saong dom jabat karja dalam tinh, ban  di pakat negar tui hukum ba tabiak. Sarak hu ndem cambaic laic, padeih ngak bruk di jabat pakat huyen meng harei 1 bilan 7. Jeng tui Sarak ini, Cong ndoan Viet Nam, Kapol urang ngak nong Viet Nam, Kapol Dam dara CSHCM, Kapol urang kumei  Viet Nam, Kapol Urang dahlau diah ngak bol lin Viet Nam lac dom gah chinh tri - xa hoi di Mat tran Negar Viet Nam.

Harei ini, UB bhap bini TPHCM, Binh Duong saong Ba Ria – Vung Tau peih nyaom biai ramik pagam jabat, so dom gah saong dom jabat karja piah peih ngak tui sarak di Quoc hoi ka bruk ramik pagam don vi hanh chinh pakat tinh. Di nyaom biai, Akok UBND TPHCM Nguyễn Văn Được kakei lac, piah bruk ngak sumu tukvak ba tabiak, pagam tame, ramik jabat karja dom pakat lagiah ngak bruk, dalam sron mbon, UBND 3 tỉnh  ban brei pambuak samar tame ngak rilo bruk njauk padrah. Hadei harei 1 bilan 7, TP.HCM tame ngak bruk patui veik ngak brei patagok  kinh te - xa hoi, kuhria sangka raidiuk  mbang ngui saong jalan sahaneng di bhap bini.

Po negar Lương Cường mbaok harak brei alin pandap pahadar 78 thun  harei Thuong binh – Liet si (27/7/1947 - 27/7/2025). Tui nan, alin pandap ka urang hu ngak bruk daong taneh ia ngak cach mang tui dua pakat lac 600.000 dong saong 300.000 dong. Dalam negar hu jaik 1trieu 6 rituh ribau urang dahlau diah hu ngak bruk daong taneh ia hu mbang tui sarak yau angaok nan, kuhria abih tih labaih 480 ti dong.

UBND tinh Gia Lai caong khin Đảng ủy UBND tỉnh pasang iek ba tabiak Sarak daong jien sa mbang  ka urang jakar, kong chuc, vien chuc saong urang ngak pakat tinh nao ngak bruk di pasak Hanh Chinh birau hadei pagam tinh Binh Dinh. Tui nan, jien daong sa mbang, yaok urang lac 23 trieu dong, sumu 10 mbang jien bilan co so. Sarak nan piah daong ka urang ngak kuhria bruk mbang huak ndih daok blei ndap pandar di labik daok birau.

UBND tinh Tien Giang birau likau Trung uong daong jaik 300 ti dong piah peih ngak mamar 2 danak dak labik daok di bhap bini mbuan gaok bala rah tabiak, di xa Xuan Dong, huyen Cho Gao saong xa Tan Phong, huyen Cai Lay. Dalam nan brei panduan ba sang rahra dalam labik glut jaleih nao labik karei, padang ngak ar pacang taneh pala drak di bhap bini saong jalan nao mai dalam palei.

Hang kapal haok Air India gam ngak po Tata Group brei thau paok jien daong yaom 150.000 USD ka yaok baoh sang urang gaok bala ahaok laik di harei 12 bilan 6. Langiu di paok jien bayar nan, hãng kapal ahaok oh bayar jien k bruk taong iek ruak ka dom urang njauk rambuac saong daok diuk, dalam nan hu sinh vien y khoa  di labik bala. Urak ini hop nden di ahaok gaok bala nan hu mek veik saong daok pasang iek duah thau ngak brei cambaic laic.

Dah page ini 16 bilan 6 tui mon pak nan lac 8 tuk page mon Viet Nam, rilo sap patuh khang di grauk labik pasak Israel. Dom ten lua cuh tame ngak metai takik abih di nyu 12 urang njauk rambuac. Ini lac mbang taong cagar gauk ka 3 di Iran tuk melam. Mentri Y te Iran khan lac dom mbang cuh tame di Israel tame taneh ia Cong hoa Islam dalam 3 harei tapa ba tal 224 urang metai saong labaih 1.200 urang karei njauk rambuac. 

Sa mbang megei tayun baoh taneh khang 4,8 saong dalam trun 10km rah tabiak di huyen Củng, ban Nghi Tân, tỉnh Tứ Xuyên, Trung Quốc di biar harei sup 15/6, ngak khut tayak sang danaok, min oh thau hu manuac halei metai saong njauk rambuac. Hadei tuk megei baoh taneh rah tabiak samar, karja bhum palei  peih bruk pacang caga samar, gam ngak pasang iek yaok kuhria bruk khat lahik jeng yau daong duah urang gaok bala dalam huyen./.