So Bangsa saong Agama tinh Dong Nai bahrau peih Nyaom pataom “Pok meyaom, alin kaya ka Baoh sang bangsa takik naih gheih thun 2025”, ngan haong kadha “Baoh sang haniem phol – Negar ginup meda”. Nyaom pataom hu mbaok di 200 ribau urang dalam 50 bangsa takik daok diuk rai di tinh Dong Nai. Ini lac dom baoh sang naih gheih ka bruk chreih chrai tari taring dalam bruk ngak mbang, padang baoh sang haniem phol, kinh te tani tanat, chreih chrai hu mbaok tame dom danak dak ilamo rahra, khik ramik ilamo bangsa…

Tinh uy Kon Tum birau patabiak Sarak ka 30-NQ/TU ka bruk padang kapol urang jakar ranaih umo, urang jakar kumei lac urang bangsa takik vaktu 2025 -2030 saong pamong tal thun 2045. Sarak ba tabiak rilo jalan ngak sangka njauk bruk quy hoach, pato pakai, pabak ilamo, pandar dom urang jakar daok ranaih, urang kumei, urang jakar bangsa takik piah khik ginup urang jakar ngak bruk naih joi, piah caga kuhria hu dahlau urang jakar palih ruah tame ngak bruk.

Tui pathau khan di UB Bhap bini tinh Dong Thap, cakrok kinh te (GRDP) di 6 bilan akaok thun ini di bhum palei kuhria hu 6,98%; taong abih jien mek tame meng bruk  pablei ndap tabiak negar langiu kuhria hu labaih 1 ty USD, tagok 18%. Gam haong nan, dui pachreih buh jien tame hu salih mboh cambaih laih, ngan haong rilo danak dak dalam gah ngak nong, pablei salih saong patagok ndo thi. Dong Thap hu dom patagok khang kajap di rilo gah, dalam nan jalan mbak, gom truac, balai, sang bac hu buh jien tame samu gauk ngan haong asal kadha “jalan mbak ngak dahlau, peih jalan”, ngak lagaih dom gak gar tavak tavaiy, brei kein lagaih ka bruk patagok kinh te, xa hoi.

UBND TPHCM birau ba tabiak sarak angan, dom jalan saong dom mbang srong hareik di dom kraong ribaong  piah thuak ia njauk brei srong ramik njam hang, nyei, phun hareik, patau kayau. Tui sarak nan, hu 21 jalan kraong, ribong piah tathuak ia brei srong hareik tagok, ramik patau kayau, phun njam hang, nyei, hareik sa adat sa mbang. Pasak Khik iek ha tang ky thuat TPHCM yaok thun brei ba tabiak bruk srong ramik hareik, kayau patau angaok kraong ribaong piah tathuak ia.

Dalam adit puac bilan 6, Ban raya Ho Chi Minh saong rilo tinh ban Meraong Negar hu veik dom mbang hajan praong dui atah, rilo labik meda rah tabiak hajan praong pagam tui bruk meda mbuan njauk ia dauk praong. Labik hajan gah Pei Barak – Pur Meraong daok rah tabiak khang brei patui veik ngak mbuan hajan praong di labik ini dalam dom harei anak tal. Rahra brei caga tuk nao mai di langiu langik, njauk ndom lac di dalam biar harei mesup mbuan gaok ia dauk saong bhian ngak gar jalan.

       Page ini, sa urang jakar pakat glong Iran khan haong hang tin Reuters di Anh bruk Iran saong Israen brei padeih cuh tui bruk khan di Tong thong My. Urang jakar Iran khan lac bruk khin padeih patuh phao kayua My ba tabiak  saong Cata pambuak bruk jhul pakhang. Ini lac adat padeih cuh di taong abih gah mesruh metak oh ka bhian mboh dui atah 12 harei dak gauk di dua taneh ia khang gah bol lin di bhum taneh ini.

Trung Quoc tame padang dua kareih thien van hadah krah di tinh Thanh Hải, dalam kham merat pamaong tal jalan jeng sa negar khang meda ka gah lavang langik taneh riya. Kareih thien van ini kuhria salah blaoh dalam thun 2027 saong jeng sa kereih thien van dut iek njauk abih ngan haong dom thien the dalam hệ Ia Harei. Jalan ngak ilamo khoa hoc di kareih lac duh dom hatai caong jalan ngak di negar praong yau ye khik brei salamat mbaok  Baoh Taneh, Ia Harei saong pacang khik drap ar di mbaok taneh.

Dalam tuk kong nghe so dak harei hu pandar tame ralo dalam raidiuk, daok mbuan lahik du lieu di urang dak harei dak trak jang, urang pandar njauk thau khik caga siam tai khoan khaw tin di drei. Sa roh duah birau hu khan brei mboh hu tal 16 tik khaw tin njauk kol bleik co klaik ngaok mang tame tavak. Tui dom urang roh duah di Cybernews, duah mboh hu 30 katap du lieu praong hu pagam phan mem tavak du lieu manuac pandar./.