Mmao kmrăm dưi dlăng jing sa hlăm dŭm mta mnơ̆ng jăk mơ̆ng čư̆ dliê brei kơ anak mnuih hlăm yan hjan grăp thŭn. Anei jing mnơ̆ng jăk yâo mâo mta jăk. Mmao kmrăm knŏng mâo hlăm yan hjan ti dŭm anôk mâo hruh muôr.

Amai H’Lươm Buôn Krông, ti ƀuôn Alê B, ƀuôn hgŭm Ea Tam, ƀuôn prŏng Ƀuôn Ama Thuôt, čar Dak Lak brei thâo: êjai nao duah mmao kmrăm, čiăng mâo klei thâo kral kơh hŭi djŏ pĕ mmao ruă.

“Hluê si phung hiu duah pĕ mmao, mmao kmrăm knŏng mâo ti dŭm anôk mâo muôr. Buh djŏ amâodah hơăi čiăng dlăng amâodah kuai djuê anăn, tơdah ƀuh muôr, anăn jing mmao kmrăm yơh”.

Mao kmrăm mâo asei dlông mơ̆ng 3 – 10cm. Đuôn mmao wil, ti dlông dap, êjin. Phŭn mmao čiăng bi kñĭ. Êjai mrâo buč mơ̆ng lăn, mmao ka blang, đuôn mmao ka blang dlăng msĕ hŏng êbung. Ƀiădah knŏng dua tlâo mmông êdei, mmao blang msĕ hŏng dŭ leh anăn mlih jing êa kô̆. Mmao kmrăm ƀơ̆ng jăk hĭn êjai mrâo čăt leh anăn čăt lu ti anôk mâo wăt êa hjan leh anăn mđiă.

Čiăng krơ̆ng kơ klei jăk mơ̆ng mao kmrăm, amai H’Lươm brei thâo:

“Čiăng kơ mmao dôk klei bâo mgưi, mmih, lĕ buč mmao srăng tŭk mtam mâo dah lui anôk thu huĭdah jhat hĕ, bi luč mta jăk.

Mmao mnâo mmih, mnâo bâo mngưi, mao kmrăm kreh yua tŭk mkra lu mta mnơ̆ng ƀơ̆ng msĕ si đeh, tŭk, tŭk djam êa, riă bur…jih jang nao đŏk kƀông leh anăn jăk kơ asei mlei. Hlăm anăn, mao kmrăm đeh jing ênưih mkra, mâo lu phung khăp sơnăk. Amai Nhung Đặng, ti ƀuôn hgŭm Ea Tam, ƀuôn prŏng Ƀuôn Ama Thuôt, čar Dak Lak brei thâo kơ klei đeh mmao kmrăm.

“Leh buč mmao, kuêh hĕ bi doh lăn ti agha mmao, rao hŏng êa hra leh anăn brei thu, tuh ƀiă êa prăi hlăm gŏ, đeh plăng bi bâo mngưi leh anăn dưm mmao, čiăng adôk mnâo bâo mngưi leh anăn  klei mmih mơ̆ng mmao knŏng dưm ƀiă mnơ̆ng bi ƀăt.

Hŏng lu gŏ sang mnuih Êđê, mao kmrăm tŭk hŏng trŏng phĭ ăt jing sa hlăm dŭm mta mnơ̆ng ƀơ̆ng jăk hlăm yan mmao kmrăm. Bi kơ klei tŭk djam trŏng hŏng mmao kmrăm, Aduôm Yuôm, ti ƀuôn Alê B, ƀuôn hgŭm Ea Tam, ƀuôn prŏng Ƀuôn Ama Thuôt brei thâo:

“Leh mâo djăp mta mnơ̆ng, pô tŭk trŏng phĭ, amrêč, klang ŭn brei êih. Leh anăn dưm mao kmrăm thu hlăm gŏ, lŏ tŭk bhiâo leh anăn mdjiê pui. Leh anăn jê bi lik, lŏ dưm êa hlăm gŏ tŭk, bi ƀăt djŏ đŏk kƀông, dưm ƀiă hla êč, mâo yơh djam ƀơ̆ng kơ gŏ sang”.

Djam trŏng phĭ tŭk hŏng mao krăm mâo klei phĭ mơ̆ng trŏng, mmih mơ̆ng mao, mbĭt hŏng klei hăng mơ̆ng amrêč, boh nik jing mnâo ƀâo mgưi mơ̆ng êč Êđê srăng bi mâo sa mta mnơ̆ng ƀơ̆ng jăk êdi.

Mao kmrăm jing sa mta mnơ̆ng jăk kơ čư̆ dliê brei kơ anak mnuih Lăn Dap Kngư bŏ hŏng mđiă leh anăn angĭn. Ară anei, êjai dliê ƀrư̆ luč ram, bruă ngă lŏ hma ăt mrâo mrang hĭn, kyuanăn bruă duah mao kmrăm ăt dleh mơh. Kyua klei hin, ênoh mao mkrăm mâo mơ̆ng 300 – 500 êbâo prăk hlăm sa kg, hluê si mao blang amâodah ka, ƀiădah đa đa mâo prăk kăn dưi mâo lei. Tơdah mâo wưng hriê čuă krĭng lăn anei hlăm yan hjan, mâo klei myun kơ dưi mâo ƀơ̆ng dŭm mta djăm mơ̆ng mao kmrăm, čiăng dưi thâo klă mnâo mnañ jăk yâo mơ̆ng čư̆ dliê.