Bi hmô, nao êlâo hlăm klei mđĭ kyar bruă duh mkra, đảng viên Tòng Văn Lải, anôk bruă đảng ƀuôn Co Phung, să Hua La, ƀuôn prŏng Sơn La, čar Sơn La ruah klei klei bi hmô pla kphê, rông mnơ̆ng bi hmô kơ mnuih ƀuôn sang hlăm ƀuôn hluê ngă, mđĭ kyar klei hdĭp mda gŏ sang.

Kyua dưn yua hdră mnêč msĕ si hbâo pruê, khăt adhan djŏ wưng hŏng ana pla mjing, tlŏ vaccine leh anăn djăp mnơ̆ng ƀơ̆ng kơ mnơ̆ng rông, truh kơ ară anei klei bi hmô bruă duh mkra 1,5 ha mơ̆ng gŏ sang grăp thŭn ba čhĭ êbeh 40 drei ŭn, 15 tôn kphê mtah, mă hĕ ênoh bi liê, mâo mnga 300 êklăk prăk.

 Đảng viên Tòng Văn Lải brei thâo, mơ̆ng boh tŭ dưn klei bi hmô, ñu pô jêñ jêñ đru kơ dŭm gŏ sang hlăm ƀuôn, hlăm să kơ hdră pla mjing, rông mnơ̆ng, ana mjeh čiăng mđĭ kyar bruă pla mjing, mkŏ wĭt ana pla mjing, mđĭ hnư hrui wĭt:

Pô ăt mđĭ ai ayŏng adei ngă msĕ hŏng pô, ya bruă pô dưi ngă srăng lač kơ diñu hluê ngă. Ayŏng adei kƀah prăk pô srăng brei čan, msĕ si čiăng blei ŭn mjeh, êmô mjeh pô srăng bi mguôp mbĭt hŏng ayŏng adei.

Hluê ngă hdră mkŏ mkra krĭng ƀuôn sang mrâo, anôk bruă đảng ƀuôn Co Phung, să Hua La, ƀuôn prŏng Sơn La, čar Sơn La mtrŭt mjhar leh dŭm gŏ sang bi trông, bi tŭ ư ngă tŭ dưn dŭm hnơ̆ng čuăn, boh nik jing bruă mkra êlan ƀuôn, rơ̆ng kơ êpul čŏng răng mgang klei êđăp ênang, mkŏ mjing klei hdĭp dhar kreh…

Mơ̆ng thŭn 2021 truh kơ ară anei, anôk bruă mtrŭt mjhar mnuih ƀuôn sang bi mguôp 650 êklăk prăk, myơr êbeh 500m2 lăn, giăm 2.000 hruê ai, lu gŏ sang ruh leh anăn mđuê sang čiăng mkra 1,6 km êlan bê tông, 4km anôk ala mkra êlan hlăm ƀuôn, đru kơ klei êrô êbat, čhĭ mnia mnơ̆ng dhơ̆ng. Lèo Thị Tiển, êpul čŏng kriê dlăng mrô 5, ƀuôn Co Phung brei thâo:

Êlâo dih êlan điêt, ară anei mâo knŭk kna mkra êlan mrâo brei kơ mnuih ƀuôn sang êrô êbat găl ênưih, gŏ sang kâo bi tŭ ư mbĕ hĕ kmeh sang pô.

Hluê si Lò Văn Hội, Khua ƀuôn Co Phung, giăm 10 thŭn êgao, anôk bruă bi klă dŭm mta phŭn kdlưn hĭn mâo: mđĭ hnơ̆ng tŭ jăk klei bi kƀĭn anôk bruă, mlih mrâo hdră êlan gĭt gai, mkŏ mjing klei hdĭp dhar kreh, mtrŭt mjhar mnuih ƀuôn sang mkŏ wĭt ana pla mjing, mnơ̆ng rông găl guôp…Truh kơ ară anei, ƀuôn mâo 240 gŏ sang, êbeh 1.100 čô mnuih ƀuôn sang, hlăm anăn knŏng adôk 5 gŏ sang giăm ƀun, amâo mâo gŏ sang ƀun, hnư hrui wĭt kah knar mâo 50 êklăk prăk sa čô sa thŭn, hlăm ƀuôn mâo dŭm klei bi hmô mâo hnư hrui wĭt dŭm êtuh êklăk prăk hlăm sa thŭn:

Hlăm wưng kơ anăp, anôk bruă ăt msĕ mơh phung đảng viên srăng lŏ dơ̆ng hluê ngă gru mngač Hồ Chí Minh, mtrŭt mjhar mnuih ƀuôn sang lŏ dơ̆ng mđĭ kyar bruă duh mkra, bi doh wăl hdĭp mda, mđĭ kyar krĭng ƀuôn sang mrâo. Kñăm kơ klei mđĭ kyar bruă duh mkra gŏ sang, dưn yua klei kreh knhâo, hdră mnêč rông mnơ̆ng, pla mjing dŭm mta ana mâo ênoh.

Lò Văn Chính, khua hlăm bruă Đảng să Hua La, ƀuôn prŏng Sơn La brei thâo, hluê ngă asăp mtrŭn mrô 05 mơ̆ng Phŭn bruă kđi čar, klam bruă hlăm grăp êpul. 40 čô đảng viên hlăm anôk bruă jing mnuih Thái, mâo nanao klei bi hmô bi leh bruă klam dưi jao, rơ̆ng kơ bruă klam gĭt gai mơ̆ng anôk bruă, dŭm mta bruă mơ̆ng ƀuôn, dŭm êpil bruă dưi rơ̆ng kjăp leh anăn ngă djŏ hdră:

Boh nik hĭn jing đảng viên hlăm anôk bruă mâo bruă klam mkŏ mjing hluê ngă truh kơ dŭm êpul msĕ si êpul ƀuôn sang pô kơ hdră mtrŭn, hdră êlan mơ̆ng Đảng, klei bhiăn lăn čar, boh nik jing hdră mtrŭn mơ̆ng anôk bruă ba mdah grăp mlan čiăng mđĭ kyar bruă duh mkra ala ƀuôn, ăt msĕ mơh klei hdĭp dhar kreh mơ̆ng ƀuôn anăn. Mơ̆ng anăn mnuih ƀuôn sang thâo săng, leh anăn hrăm mbĭt bi mguôp, mkŏ mjing, mâo dŭm klei blŭ mguôp, hdră êlan čiăng mđĭ hĭn klei hdĭp mda mơ̆ng mnuih ƀuôn sang.

Hriăm leh anăn hluê ngă Awa hŏng dŭm bruă ngă klă klơ̆ng, bi lar klei bi guôp, ai tiê thâo khăp, thâo pap, kreh kriăng hlăm klei mă bruă knuă, ƀuôn Co Phung dưi leh anăn dôk bi mlih hlăm grăp hruê, ƀô̆ mta krĭng ƀuôn sang mrâo mlih mrâo, dŭm klei bhiăn amâo mâo lŏ djŏ hlăm klei bi kuôl ung mô̆, klei djiê brŭ dưi lui jih, lu knhuah siam dhar kreh dưi kriê pioh leh anăn bi lar. Lu thŭn dơ̆ng, anôk bruă đảng ƀuôn Co Phung jing anôk bruă êdah êdi mơ̆ng ƀuôn prŏng Sơn La.