Đảng viên H’Đàn Niê (45 thŭn, djuê ana Êđê) ti ƀuôn Sŭt Hluôt, să Čư̆ Suê, kdriêk Čư̆ Mgar, mrâo lŏ djŏ ruah Khua bruă Đảng ƀuôn wưng thŭn 2025 – 2027. Amai H’Đàn brei thâo, anei jing klei kdrưh, ktưn hưn, bi êdah klei đăo knang mơ̆ng đảng viên hlăm ƀuôn, ƀiădah ăt bŏ hŏng klei đua klam hlăm wưng ară anei. Êngao kơ hdră dlăng kriê 1,2 ha pưk hma, kphê, tiu, dŭm hruê anei, mbĭt mbĭt hŏng knuă druh să, alŭ nao ti grăp boh sang čiăng mă klei blŭ kơ bruă đru mguôp hlăm klei mkra mlih Hdră bhiăn, mblang kơ dŭm hdră êlan mtrŭn mơ̆ng Đảng, Knŭk kna čiăng kơ mnuih ƀuôn sang thâo săng lehanăn sa ai hlăm bruă bi mŭt să, čar, amâo lŏ dôk gưl kdriêk. Amai H’Đàn brei thâo: “Kâo nao ti grăp boh sang hlăm ƀuôn ktrâo lač, hlak mblang kơ bruă bi mŭt să, mkŏ mjing să, ƀuôn hgŭm mrâo. Ară anei mtô mblang kơ mnuih ƀuôn sang kơ bruă mkra mlih Hdră bhiăn phŭn, čiăng kơ mnuih ƀuôn sang thâo klă kơ hdră êlan jing djŏ guôp hŏng klei đĭ kyar mơ̆ng lăn čar wưng ară anei.

Đảng viên mda asei H’Wêm Aliŏ, ti ƀuôn Sŭt Hluôt, să Čư̆ Suê, brei thâo amai H’Đàn Niê jing gru mngač kơ phung hđeh tui hriăm. “Amai H’Đàn hưn mthâo brei kâo mŭt Đảng lehanăn êdei anăn kâo dưi mŭt. Jih jang klei đru, klei ktrâo lač mơ̆ng amai H’Đàn yuôm êdi. Kâo srăng gĭr mă bruă mđĭ kyar hdră duh mkra čiăng mâo hnư hrui wĭt hơĭt, rơ̆ng hdră mă bruă ti să, ti ƀuôn.

Ti ƀuôn Sŭt Mđưng, să Čư̆ Suê, kdriêk Čư̆ Mgar, đảng viên H’Đao Êban (38 thŭn, djuê ana Êđê) mrâo dưi ruah ngă Khua bruă Đảng. Tuôm păn ngă Khua bruă Đoàn, khua ƀuôn, amai thâo kơ dŭm klei dleh dlan lehanăn tui duah hdră đru kơ mnuih ƀuôn sang kpưn đĭ. Thŭn 2018, amai mkŏ mjing leh Êpul bruă pơ̆k mñam ƀuôn Sŭt Mđưng, jak iêu 35 čô nao hgŭm. Kyua rơ̆ng kjăp hdră mă bruă, mnuih hlăm êpul mâo hnư hrui wĭt hơĭt mơ̆ng 3 – 6 êklăk prăk/mlan. Mđrĭng hŏng anăn, amei lŏ bi hgŭm hŏng anôk bruă dhar kreh să mkŏ mjing êpul tông čing êbeh 15 čô, mdah nanao kơ mnuih ƀuôn sang dlăng.

Mniê khua bruă Đảng H’Đao brei thâo snei: Kâo iêu mthưr amai adei, ayŏng adei, phung êkei êdam, mniê êra hlăm ƀuôn mkŏ mjing êpul bruă pơ̆k mñam lehanăn êpul tông čing. Grăp čô nao hgŭm jăk sơaĭ. Kâo čang hmăng hluê hdră anei, dhar kreh Êđê srăng dưi kriê pioh lehanăn mđĭ lar truh kơ gưl hđeh ară anei.

Să Čư̆ Suê, kdriêk Čư̆ Mgar mâo êbeh 220 čô đảng viên, hlăm anăn mâo 71 čô đảng viên jing mnuih djuê ƀi ti 2 Anôk bruă Đảng mnuih Dao lehanăn 4 Anôk bruă Đảng mnuih Êđê. Hlăm anăn mâo 2 čô Khua bruă Đảng mnuih Êđê jing amai H’Đàn Niê lehanăn H’Đao Êban.

Phan Xuân Lực, Khua bruă Đảng să Čư̆ Suê lač, dua čô khua bruă Đảng anei mđĭ lar nanao bruă klam “Đảng viên ngă êlâo, ƀuôn sang hluê êdei”, msĕ si klei Awa Hô mtô mtă. “H’Đàn Niê jing sa čô thâo mbruă êdi, kreh mtô mblang kơ mnuih ƀuôn sang hlăm ƀuôn ba yua kdrăp mrâo hlăm hdră mđĭ kyar bruă rông mnơ̆ng, pla kphê, tiu lehanăn dŭm mta ana boh kroh mâo hnơ̆ng tŭ yuôm. Bi hŏng amai H’Đao Êban, anei jing sa čô thâo êdi hlăm hdră kriê pioh knhuah dhar kreh. Amai mtrŭt mjhar mnuih ƀuôn sang hlăm ƀuôn kriê kjăp bruă pơ̆k mñam, mkŏ mjing êpul tông čing čhar, mơ̆ng anăn đru kriê pioh kjăp hdră dhar kreh – kdŏ mmuñ mnuih Êđê ti alŭ wăl. Diñu jing khua bruă Đảng thâo mbruă êdi ti ƀuôn sang, jing kdrông mkŏ plah wah Đảng hŏng mnuih ƀuôn sang.

Hlăm êpul êya mnuih Êđê, phung mniê amâo djŏ knŏng jing pô dlăng kriê gŏ sang ƀiădah lŏ đru bi lar bra bruă ngă tŭ dưn hlăm ƀuôn sang. Khua mniê bruă Đảng msĕ si H’Đàn Niê, H’Đao Êban lŏ ba klei khăp mơai, jing gru mngač hlăm hdră mđĭ kyar bruă duh mkra – ala ƀuôn, đru krơ̆ng kjăp hdră mđĭ kyar dhar kreh djuê ana đưm, đru mkŏ mkra ƀuôn sang jăk siam.