Thủ tướng đơs ngan, do là tŭ nàng jờng rơ ală bơta tă pơgồp kuơmàng bơh ùr kwang bàng tàm gah cribơyai broă mờ lơgar ndai dê, mờ kung pơn jat tai đơs sùm jơnau hơ pơrgon pràn kơldang bơh lơgar Việt Nam dê tàm broă lơh geh ring bal ùr klau mờ sơlơ tơnguh tai bơta tus bal bơh cau ùr dê tàm bơt bơtàu dùl dunia ring lơngai, lơh broă bal mờ bơtàu tơnguh kơ̆ kơljap jŏ jòng sùm. Tàm broă lơh tam lơh mờ bơt bơtàu, sền gàr dà lơgar geh bơta phi să, pơnđơl pràn, tă pơgồp kuơmàng ngan bơh cau ùr Việt Nam dê, ală cau ùr cribơyai broă mờ lơgar ndai ai lơngăp lơngai is, khat gơboh, hờm ram dà lơgar mờ làng bol dê in.

Thủ tướng sồr Ƀộ Cribơyai broă mờ lơgar ndai lơh gơlik bơta niam rlau tai ai ală ùr kwang bàng cribơyai broă mờ lơgar ndai in lơh niam kơnòl broă he dê, lơh gơlik bơta kah kơlôi niam bơnĕ tus mờ gơp bơyô ală lơgar bè nùs nhơm, plai nùs, huềng nùs bơh cau ùr lơh broă cribơyai mờ lơgar ndai dê; bal mờ hơ̆ tơl nă cau ùr cribơyai broă mờ lơgar ndai kờñ pal ai tơnggŏ bơta chài, nùs nhơm he dê nàng bal mờ gơp pơgồp bơnah ai dunia cơnđuà kơ̆ tàm gơl gùng ring lơngai, lơh broă bal mờ bơtàu tơnguh kơ̆ kơljap jŏ jòng sùm.