Sir jos cxiv uô tsêr cơưv ntơưr nhoz ntus đriv Sơn La

Côngz trinhx Tsêr cơưv ntơưr Phôv thông nội trú Cxênhx iz-Cxênhx oz Chiềng Khương, xar ntus đriv Chiềng Khương, tỉnh Sơn La tsênhv tâu sir jos uô. 400 ntâu công nhân lox tôngv lênhx tưs cux sir jos uô sêi zuk têx hâux lưv. Zơưv Trần Văn Quyền, giám đốc xí nghiệp cxiv tsa, Tổng Công ty yưv pênhr huôv tsar tsêr nhoz thiêz đô thị, Bôv Côx phax – taz viv uô côngz trinhx puz pâuz, côngz trinhx tâu cxiv tsa ntơưv jok Búa, xar Chiềng Khương đar muôx 5 héc ta, muôx tsêr lớp cơưv ntơưr, qơư nhoz nội trú, tsêr nhoz uô hâux lưv, tsêr uô jâuz mor nox trâu shux xênhz thiêz têx côngz trinhx txơưr… txâuk trâu xar muôx 1.000 lênhx shux xênhz zos têx tuz nhuôs cxuô mênhx cxưx nhoz thax tsav ntus đriv nox nhoz cơưv ntơưr. Đhâu 6 luz hli cxiv tsa, txos nhiv no, côngz trinhx tưz uô tâu tiêr xar muôx 60% thiêz tsênhv sir jos uô têx kror txơưr:“Phiv liv tiv zix zos gri cxuô zav txơưr txar. Nhiv no gri chor chuôz lov tsênhv ndê siêz lok six ntâu, co zos iz kror phiv liv lox trâu taz viv. Taz sik, cux tsuv zuôr têx chuôz lov lok chiê uô, tas nro viv tsơưr lươngv thiêz uô cov tiêr côngz trinhx trơưk tsưr ziv tưz tso tơưv”.

Tix lâus Nguyễn Nhật Tân, chỉ huy trưởng côngz trinhx cux hêik pâuz, chiê uô cov tâu tiêr txos hli 8 choz zok côngz trinhx chiê kriz cơưv shông cơưv yiêz zuôr txos no, taz viv tưz chox kriê chor tôv, đôiv uô 3 ca, 4 kíp; uô thâuv đruôz hnuz thiêz hmo ntux hur si. Jiês so ntênhk 30/4, 1/5 nhiv kruôr đhâu, taz viv cux tsik so mak sir jos uô têx hâux lưv; 100% canr bôv, công nhân thiêz lox tôngv puôr lênhx thôngx ziv thiêz truôx siêz uô cov tiêr cxuô kror:“Sơưr đơưk puôr lênhx xav tiêk tưz uô côngz trinhx zov chênhr li no mak tsuv uô yênhx hnuz hmo, phêiz uô 3 ca. Txơưv chor hnuz so ntênhk, sơưr đơưk cux tsik so thiêz sir jos uô têx hâux lưv cov tiêr. Cov txos hnuz 30/6 no uô tâu muôx 80%, choz zok côngz trinhx trâu tsưr yưv pênhr huv li zos tsưr ziv tưz tso tơưv”.

Ntơưv côngz trinhx Tsêr cơưv Phôv thông nội trú 2 cấp Chiềng Khoong, xar Chiềng Khoong, tỉnh Sơn La, zơưv Đỗ Trường Sơn, Phưv Giám đốc Công ty Cổ phần Việt Dũng – taz viv uô côngz trinhx puz pâuz, txơưv njiz tsik tsơưs phiv liv tiv muôx yar ntux cuz sor, lok nas; gri chuôz lov, nênhs uô lox tôngv tsar ndê siêz… taz sik, tas nro viv jênhv vưv chinhr triv, zuôr xar 500 canr bôv, công nhân thiêz nênhs lox tôngv sâuv công trường puôr lênhx sir jos, txơưv chor hnuz so ntênhk lok cux tsik so chiê uô cov tiêr têx hâux lưv thiêz uô tâu jông tsơưr lươngv côngz trinhx:“Hnuz 30/4, 1/5 nhiv kruôr đhâu, sơưr đơưk cux sir jos uô têx hâux lưv li cxiê hnuz, tsik so hlo. Chiê cxơưz cxiz sơưr đơưk uô hâux lưv, pêz tưz muôx hêik kriê, chox kriê thiêz paz nzir trâu sơưr đơưk”.

Tix lâus Bạc Cầm Căm nhoz jok Muôn, xar Mường Hung, tỉnh Sơn La – công nhân lox tôngv tsênhv uô côngz trinhx tsêr cơưv Phôv thông 2 cấp Chiềng Khoong puz pâuz:“Zos chor nênhs uô hâux lưv ntơưv no pêz xav jênhv tsuv sir jos uô cov uô tâu tiêr côngz trinhx li tsưr ziv tso tơưv thiêz uô cov huv zos tsơưr lươngv côngz trinhx”.

Txơưv njiz ntâu kror phiv liv, taz sik chor côngz trinhx tsêr cơưv ntơưr tsênhv tâu sơưr đơưk sir jos kriz uô. Chor tsêr cơưv lox jông tsênhv jux juk tâu uô cov tiêr ntơưv chor xar ntus đriv tưz tsik zos hêik txos Đảng, Têz qơưk têx sir jos paz trâu chor thax tsav txov nhêv, mak tsênhv zos kror zov chênhr paz trâu Sơn La thiêz chor thax tsav ntus đriv huôv tsar kinh têr-xar hôiv hâur ntu huôv tsar yiêz./.

                                                                                           Tuyết Lan, Thu Thùy-Lik Thox cxêik nhênhv

Taz por truôx tuk zav nox têx pluôk nox hâur tsêr cơưv niêv txir zus mor nhoz tox siêz Lai Châu

Xã Nậm Sỏ nhiv no muôx 2.500 ntâu lênhx shux xênhz nhoz cxuô cấp cơưv, hâur co zuôr xar 2 cxênhz lênhx nox nhoz hâur tsêr cơưv, cơưv ntơưr niêv txir zus mor. Xav tinhv taz por zav nox hâur têx qơư uô jâuz mor nox ntơưv tsêr cơưv niêv txir zus mor zos hâux lưv zov chênhr, hâu nov ntơưv qơư tưz heik cxuô luz tsêr cơưv fuô uô jông hâux lưv qênhz yuôx shuôs; bax phax tir thêir, qênhz shuôs đrux ntov têx jâuz zuôr saz đrâuv lok txos trâu tsiv uô. Ntơưv tsêr cơưv cxênhx 2 Nậm Sỏ-iz hâur têx tsêr cơưv muôx ntâu lênhx shux xênhz đuô hur si nox nhoz hâur tsêr cơưv, cơưv ntơưr niêv txir zus mor-đros thiêz 600 lênhx, cưk kriê Lê Đức Mạnh, Phưv thơưx seiz car tsêr cơưv heik pâuz:“Lok sâuv chor nhuôs shux xênhz têx pluôk nox thâuv tưs tưz muôx txâuk cxuô zav jâuz mor. Truôx tuk zav nox mak tưz tâu tsêr cơưv fuô uô trơưk ntâuz ntơưr thiêz uô cxix cxuô lơưr cui tinhv chiê shux xênhz muôx pluôk nox truôx tuk”.

Tix lâus Lò Văn Lả, uô jâuz mor nox hâur tsêr cơưv heik, têx hâux lưv uô jâuz mor nox trâu shux xênhz puôr lênhx tâu qênhz shuôs jông, txix lênhk txeik têx jâuz txos trâu nzuôr hur, tsiv uô thiêz pheiz pluôk nox trâu shux xênhz. Qơư uô jâuz mor tâu qêz suô, tu đu lus, hur si, chor jâuz mor siêr thiêz nhôngk mak nhiêk tso nhiêk iz kro, tsi tso uô cê, chiê txo grêk tsơưs têx tsi hur, vuôz tsuôz. Niêx hnuz, cux khơưk tsês iz kro mê njik têx jâuz mor nox chiê qênhz njuôk shuôs sêz chor jâuz mor ntơư pok truôx tuk zav nox.“Uô ntêx thâuv zuôr lênhk txeik têx zav nox, pêz thâuv tưs tưz qênhz yuôx, pâuz tsênhz qơư uô. Đhâu txeik, gra tâu zav nox mak pêz nzuôr hur thiêz thâuv tsiv uô, thâuv tưs tưz uô cov siêr jông chiê taz por truôx tuk zav nox trâu shux xênhz”.

Têx pluôk nox muôx txâuk cxuô zav jâuz mor tsi tiêk uô trâu chor shux xênhz nox kaz lok, truôx tuk đas jos, tsênhv gra cêr shir phaz, jông siêz, paz hu zâuv shux xênhz tox siêz gruôs tuôx cơưv txux chi. Nhiêx Xênhv Vax, shux xênhz lớp 8A1, tsêr cơưv cxênhx 2 Nậm Sỏ heik:“Tuôx tsêr cơưv cur tâu nox têx pluôk nox muôx cxix cxuô jâuz mor. Iz hnuz nox 3 pluôk, ntơư zos nox yêik, nox suk, nox hmo. Cur pov têx pluôk nox hâur tsêr cơưv lok six kaz”.

Nhoz cxênhx cơưv nhuôs zâu, luôs hâux lưv taz por vêv xênhz truôx tuk zav nox ziv tâu moz siêz txos. Tsêr cơưv cxênhx nhuôs zâu Nậm Sỏ muôx 500 ntâu lênhx shux xênhz, 100% puôr lênhx nox nhoz hâur tsêr cơưv, cơưv ntơưr niêv txir zus mor tưz yưv pênhr uô qơư nox mor, uô jâuz mor hur si, muôx txâuk đêx hur zôngv, zav nox tâu qênhz shuôs jông hâur yênhx hnuz. Cưk kriê ntơưr Trần Thị Thu, Thơưx seiz car tsêr cơưv heik pâuz:“Pêz uô jông trơưk cui tinhv truôx tuk zav nox. Qênhz yuôx têx jâuz zuôr saz đrâuv lok, tsiv uô thiêz qênhz shuôs uô ntêx thâuv zuôr pheiz trâu shux xênhz nox. Pêz cux xeir zuôr chor qơư txâuk njênhs, muôx suôz bê têx zav nox, muôx cxix ntâuz ntơưr thiêz tsuv chos luk, chor jâuz mor gra lok hâur tsêr cơưv tsuv muôx ntơưr qênhz shuôs truôx tuk zav nox”.

Lok sâuv hâu nov ntơưv qơư, zơưv Trương Thanh Hiếu, Phưv Chủ tịch Ủy ban xã Nậm Sỏ heik pâuz, luôs hâux lưv qênhz yuôx, seiz kaz têx qơư uô jâuz mor nox hâur tsêr cơưv niêv txir zus mor thâuv tưs tưz tâu xã moz siêz txos, lar heik zos hâur têx hnu cuz sor, ntux txơưr txar, muôx nas chuô li nhiv no:“Hâur ntu zuôr txos, Ủy ban xã zuôr chox kriê qơư Y tế hux jos đros chor nênhs lês uô hâux lưv qênhz yuôx, qênhz shuôs tsi so têx qơư tsiv uô, zuôr muôs zav nox thiêz qơư uô jâuz mor nox hâur tsêr cơưv. Chor tsêr cơưv ntơưr mak zuôr seiz car đrux ntov têx qơư muôs zav nox trâu tsêr cơưv co”.

Txix cấp ủy, hâu nov ntơưv qơư thiêz Ban giám hiệu, cux li chor nênhs buôk ti uô jâuz mor sik côngv têk, siz paz chiê uô thiêz muôx tâu têx pluôk nox truôx tuk hâur tsêr cơưv trâu shux xênhz tưz muôz cêr njênhs njôngr trâu shux xênhz niêv txir tso siêz chiê zuk têx tuz nhuôs tuôx nox, nhoz cơưv txux chi hâur tsêr cơưv thiêz no cux zos tsưr ziv jông tsiv nhos trâu ntâu thax tsav qơư cơưv shâuv, uô trơưk hâur tsưx phưv truôx đas jos trâu sơưr đơưk hâur tsêr cơưv ntơưr.

                                                                                                            Khắc Kiên-Riê Lâux cxeik, nhênhv