Amăng kơčăo bruă mơ̆ng Kông ang tơring čar Dak Lak kơ pơdŏng 4.285 bôh sang brơi kơ sang anô̆ ƀun rin, sang anô̆ tơnap tap, tui Jơlan hơdră lŏm lui sang tơ̆i, sang răm, Truh ră anai, Kông ang tơring čar Dak Lak hmâo pơphun pơdŏng laih 3.014 bôh sang, dưm dưm hăng 71% mrô bruă. Amăng mrô rơbêh kơ 3.000 bôh sang hmâo pơdŏng, hơdôm bôh anom hmâo jao laih 1.517 bôh sang pioh hơdôm bôh sang anô̆ mơnuih ƀôn sang mă yua, hrŏm hăng anun glăk pơdŏng giong 676 bôh sang pioh jao dong amăng rơwang hrơi tơjuh anai.

Khă jê̆ hăng anai tơlơi kơƀah gơnam man pơdŏng hai, hăng tơlơi pơphun bruă khut khăt hăng ha amăng plĕ, bruă lŏm lui sang tơ̆i tui tơlơi črâo ba mơ̆ng Ding jum kông ang ƀơi Dak Lak ăt pơhlôm mơn rơnoh bruă ba tơbiă, pơkă hlâo pơdŏng giong abih bang sang pơkă amăng lơ 31/10/2025. Yap truh lơ 18/6, hmâo pơphun pơdŏng năng ai ñu 5.150 bôh sang tui Jơlan hơdră lŏm lui sang tơ̆i, sang răm mơ̆ng Gong gai. Amăng anun, hmâo 4.174 bôh sang pơdŏng phrâo hăng 970 bôh sang pơkra glăi; hmâo pơdŏng giong 3.025 bôh sang (amăng anun 2.182 bôh sang pơdŏng phrâo hăng 843 bôh sang pơkra glăi). Kiăng pơdŏng giong tui tơhnal ba tơbiă lŏm lui sang tơ̆i, sang răm ƀơi tơring čar, Dak Lak pơkă hlâo amra pơdŏng phrâo hăng pơkra glăi dong 2.150 bôh sang mơ̆ng ră anai truh abih blan 10/2025./.