Giăm jơlan čơlah 3 rơnuč ƀuôn Trum, să Tâm Thắng, tơring glông Čư̆ Jŭt, jing sang phrâo pơdŏng prong 90m2 klă hiam mơ̆ng ơi Y Tem Kpơr. Amăng đang sang, hơdôm glông phun kơphê mơtah hlê̆ glăk hơdai bôh. Ơi Y Tem ruai glăi, sang anô̆ ñu hmâo ha tal lĕ sang anô̆ tơnap tap hloh ƀuôn, hăng 7 čô ƀong huă, pơhrui glăi biă ñu kơnang kơ hơdôm ar đang kơphê hăng hyu mă bruă arăng. Kơnang kơ jơlan hơdră pơkă mơ̆ng lŏn ia kơ hrŏ trun ƀun rin, pơhrui glăi hăng tơlơi hơdip mơda mơ̆ng sang anô̆ hmâo pơplih amăng ƀrư̆. Dong mơ̆ng akô̆ thun 2022 truh ră anai, sang anô̆ ñu amăng ƀrư̆ jao rơmô rông, djru pla glăi kơphê, hăng jê̆ hăng anai hloh lĕ pơdŏng sang dô̆. Abih bang jing pran pơtrut pioh sang anô̆ ơi Y Tem hrưn đĭ:

 “Hlâo kơ hmâo tơlơi gum djru mơ̆ng kơnuk kơna, tơlơi hơdip mơda mơ̆ng ƀing gơmơi glêh tơnap biă, sang dô̆ ăt pơdŏng mă tŭ mơ̆ng hmâo mơn, amăng sang hnal kyâo sô hơđăp. Ră anai tơtlaih mơ̆ng ƀun rin, sang kâo dưi djru sa drơi rơmô pioh rông 20 klăk prăk hăng 70 klăk prăk pơdŏng sang, ră anai ƀu dô̆ huĭ kơ hơjan angin dong tah, tơlơi hơdip mơda hơđong laih. Ră anai kâo rông rơmô pioh rơmô tuh rai lu hăng bơwih brơi kơ phun kơphê, ră anai sang anô̆ kâo tơtlaih mơ̆ng ƀun rin. Kâo bơni kơ Ping gah hăng kơnuk kơna lu biă”.

Mơ̆ng ƀuôn Trum ƀu ataih mơn, buôn Ea Pô ăt glăk pơplih rim hrơi mơn kơnang kơ hơdôm hơdră bruă hrŏ trun ƀun rin. Yă H’Buan Kƀuôr, djuai ania Êđê, mơ̆ng sang anô̆ ƀun rin hloh ƀuôn, kơnang kơ dưi gum djru rơmô rông hăng 70 klăk prăk pơdŏng sang, hrŏm hăng gir run mơ̆ng sang anô̆, ñu hmâo laih sang dô̆ kơjăp, hmâo bruă mă hơđong. Sang phrâo pơdŏng giong, rơmô ăt glăk mơkian mơn, hăng bruă tơtlaih mơ̆ng ƀun rin pơphun mơ̆ng hơdră bruă sit nik mơ̆ng Ping gah, Kơnuk kơna. Yă H’Buan mơ-ak brơi thâo:

“Sang kâo hmâo 4 ara lŏn hăng apah dong 2 ar lĕ 6 ar, yua kơ ngă ƀu hmâo pơhrui glăi lu anun kâo kơnong kơ pơhrui glăi 40 klăk prăk. Hlâo adih sang anô̆ tơnap tap biă, samơ̆ dưi hmâo kơnuk kơna gum djru pơdŏng sang, ră anai tơlơi hơdip mơda hơđong. Kâo bơni lu biă”.

Tâm Thắng lĕ să juăt ngă đang hmua, ataih mơ̆ng kual krah tơring čar Dak Nông năng ai ñu 119 km hmâo 15 bôh plơi hăng 1/3 mrô mơnuih ƀôn sang lĕ djuai ania ƀiă. Ơi Trần Thế Quang – Khua git gai Ping gah să brơi thâo, rơwang 2021-2025, să dưi pha brơi giăm truh 3 klai prăk mơ̆ng jơlan hơdră hrŏ trun ƀun rin pioh djru djơ̆ mơnuih kơ sang dô̆, hlô rông, gơnam mă yua ngă đang hmua. Kơnang kơ anun, mrô sang anô̆ ƀun rin hrŏ trun mơ̆ng 5,3% trun dô̆ 1,9%, djru să truh akô̆ plơi pla phrâo thun 2024 hăng jing anih bơngač hrŏ trun ƀun rin kual ataih ƀơi tơring čar. Ơi Trần Thế Quang lăi pơthâo sa dua tơlơi găn rơgao amăng ngă tui lơm tŭ mă ngăn rơnoh hrŏ trun ƀun rin mơ̆ng Dêh čar kơ să:

“Lơm pok pơhai, ƀing gơmơi lăng yôm na nao bruă mă mơ̆ng plơi pla hăng mơ̆ng tơlơi pơphun bruă mơ̆ng mơnuih ƀôn sang dưi tŭ mă hơdră gum djru. Hluai tui anun, tơdơi kơ mơnuih ƀôn sang tŭ mă prăk djru mơ̆ng Kơnuk kơna, mă yua djơ̆ bôh than, dưi ngă tui ba glăi bôh tơhnal. Hrŏm hăng anun, ƀing gơmơi ăt kơtưn đĭ mơn bruă lăng tui mơ̆ng jơnum min hăng khul grŭp pioh pơhlôm bruă pok pơhai jơlan hơdră pơkă huăi ngă rơngiă đôč, khưi khai, khom dưi pơjing bôh tơhnal ƀơi anăp”.

Jơlan hơdră pơkă mơ̆ng dêh čar pơđĭ kyar bơwih ƀong-mơnuih mơnam kual neh wa djuai ania ƀiă hăng kual čư̆ siăng, rơwang 2021-2025, dưi pok pơhai ƀơi tơring glông Čư̆ Jut, hmâo ba glăi laih lu pơplih klă. Ha rơtuh bôh sang anô̆ neh wa dưi gum djru hmao tlôn lŏn dô̆, lŏn ngă đang hmua, ia hơdjă yua, sang dô̆, bruă mă... Hăng giăm truh 40 klai prăk mă yua, Čư̆ Jut jing tơring glông ngă tui ba glăi bôh tơhnal hloh, djru ngă brơi lu să truh akô̆ plơi pla phrâo. Tui hăng ơi Trần Mai Việt-Kơ-iăng Khua Anom gơgrong bruă djuai ania hăng tơlơi đăo tơring glông Čư̆ Jut, Jơlan hơdră pơkă mơ̆ng lŏn ia hrŏ trun ƀun rin amra jai ngă tui ba glăi bôh tơhnal hloh dong lơm gong gai dua gưl sit nik mă bruă. Gưl să amra ƀơi anăp wai lăng, git gai ngăn rơnoh, bĕ ngă raih daih, raih hyu đơr hơr:

“Hlâo adih hmâo truh kơ 10 akô̆ bruă, pơpha brơi lu anom pok pơhai, amuñ ngă raih daih, tơnap lăng tui hăng kơƀah ha amăng plĕ. Pơ̆ anăp anai jao kơ sa bit wai lăng amra gêh gal hloh amăng ngă tui. Biă ñu, tâ̆o hloh jao ƀơi anăp kơ gưl să pok pơhai, pioh mơnuih ƀôn sang dưi tŭ mă ƀơi anăp, bĕ bơrơkua kah hăng hlâo, laih anun amuñ tŭ mă, laih anun ngă tui ba glăi bôh tơhnal rơđah rơđông hloh”.

Bôh nik brơi ƀuh, Jơlan hơdră pơkă mơ̆ng dêh čar pơđĭ kyar bơwih ƀong-mơnuih mơnam kual neh wa djuai ania ƀiă hăng čư̆ siăng ƀơi tơring glông Čư̆ Jut hmâo hăng glăk hmâo ba glăi bôh tŭ yua phun, bơdjơ̆ nao dơlăm prong truh hăng neh wa djuai ania ƀiă dô̆ tơnap tap. Anai lĕ hơdră pơtrun sit nik, djơ̆, djru yôm phăn pơđĭ kyar bơwih ƀong-mơnuih mơnam hăng hrŏ trun rin rơpa ƀơi Dak Nông. Lơm anom mă bruă čar 2 gưl dưi ngă giong, bruă pok pơhai jơlan hơdră dưi đing nao hloh pioh ba glăi bôh tơhnal sit nik, tui tơlơi rơkâo mơ̆ng anom bruă./.