Tom brơi (22/6) ƀơi Ƀirô mă bruă Gong gai, Khua dêh čar ơi Phạm Minh Chính git glăi mông jơnum tal 5 Grŭp črâo ba pok pơhai lŏm lui sang tơ̆i, sang răm dêh čar ta amăng đơ đam dêh čar; Mông jơnum tal 18 Grŭp črâo ba Kơnuk kơna hơdôm ring bruă, rơwang bruă yôm phăn dêh čar, phun ñu gơnong bruă dŭ pơgiăng jơlan nao rai hăng Jơnum tal 2 pơtrut pơsir ngăn rơnoh tuh pơplai bruă hrŏm thun 2025.

Bơdjơ̆ nao pok pơhai “Lŏm lui sang tơ̆i, sang răm” amăng đơ đam dêh čar: Khua dêh čar brơi thâo, kơčăo bruă blung a pơkă hlâo ngă giong amăng thun 2030, khă hnun hai, bôh nik pok pơhai, hơdôm ding jum, gơnong bruă, tơring čar, ƀôn prong thâo biă, ngă tui klă biă, biă ñu amăng hơdôm hrơi anăp nao Hơdor glăi 80 thun hrơi pơdŏng Lŏn ia djop mơnuih dưm kơnar Việt Nam, yua anun khom pơsit pran jua ngă tañ giong jơlan hơdră. Pơsit yôm hơdôm ding jum, gơnong bruă, tơring čar, ƀôn prong, hơdôm bôh anom bơwih ƀong pok pơhai klă bruă pơphun “lŏm lui sang tơ̆i, sang răm” amăng đơ đam dêh čar, Khua dêh čar rơkâo tŭ ư hrŏm ngă tañ bruă “lŏm lui sang tơ̆i, sang răm” kơ mơnuih djru ngă hơkrŭ đưm, hrưn đĭ truh lơ 27/7 thun anai amra lŏm lui abih sang tơ̆i, sang răm hăng mơnuih djru ngă hơkrŭ đưm, sang anô̆ hmâo ling tơhan pơsăn drơi kơ lŏn ia./.