Mơnuih ping gah H’Đàn Niê (45 thun, djuai ania Êđê) dŏ ƀơi ƀuôn Sut Hluốt, să Čư̆ Suê, tơring glông Čư̆ M’gar phrâo hơmâo ruah glăi ngă Khua ping gah plơi rơwang thun 2025-2027. Amai H’Đàn lăi, anai jing tơlơi pơ-ư pơ-ang prong biă mơ̆ng mơnuih ping gah amăng plơi, samơ̆ ăt gơmâo lu tơlơi kiăng gơgrong ngă mơn amăng rơwang bruă glăk pơplih phrâo ră anai. Rơngiao kơ hrơi mông wai lăng rông pla 1,2 ha đang kơphê, tiu, hơdôm hrơi anai, ñu hrŏm hăng ƀing apăn bruă amăng să, amăng plơi nao pơ rim boh sang hơduah tơña mă tơlơi pơgôp hiăp kơ bruă pơplih glăi Phiah phiăn, pơblang rơđah tơlơi pơtrun mơ̆ng Ping gah, Kơnuk kơna kiăng neh met wa thâo hluh hăng tŭ ư kơ bruă pơmut hrŏm să, tơring čar, ƀu hơmâo dong tah gưl tơring glông. Amai H’Đàn brơi thâo:“Kâo nao pơ rim boh sang anŏ amăng plơi čih pơtô, pơblang kơ bruă pơmut hrŏm să, akŏ pơdong să hăng phường phrâo. Mông anai dong ăt lăi pơthâo hăng neh met wa kơ bruă čih pơkra pơplih glăi Phiah Phiăn, kiăng abih bang thâo hluh tơlơi pơtrun lăp djơ̆, djơ̆ hăng tơlơi kiăng đĭ kyar mơ̆ng lŏn ia ta mông anai”.

Suê brơi thâo, amai H’Đàn Niê jing pô pơtrut ngă pơhưč, jing pô ba jơlan hlâo kiăng ƀing hlăk ai ngă tui:“Amai H’Đàn pơƀuh brơi kiăng kâo mut amăng Ping gah laih anun hơmâo pơmut ping gah laih, jing ping gah aka ƀu sit nik. Abih bang yua hơmâo tơlơi djru, pơtô ba mơ̆ng amai H’Đàn Niê. Kâo amra gir ngă bruă pơđĭ kyar bơwih ƀong huă kiăng hơmâo prăk lu ƀiă, pơhlôm bruă mă amăng să, amăng plơi”.

Ƀơi buôn Sút M’Đưng, să Čư̆ Suê, tơring glông Čư̆ M’gar, mơnuih ping gah H’Đao Êban (38 thun, djuai ania Eđê) ăt phrâo hơmâo ruah ngă Khua ping gah plơi. Hlâo kơ anun ñu ngă Khua hlăk ai plơi, Khua plơi, ñu thâo hluh djŏp tơlơi tơnap, laih anun ĕp hơdră djru ană plơi hrưn đĭ. Thun 2018, ñu hơmâo akŏ pơdong Grup mơñam mrai ƀuôn Sút M’Đưng, pơhưč 35 čô đah kơmơi ngă hrŏm. Yua hơmâo pơkra gơnam na nao, hơdôm čô mơnuih amăng grup hơmâo prăk pơhrui hơđong mơ̆ng 3-6 klăk prăk rim blan. Hrŏm hăng anun, ñu hơmâo ngă hrŏm hăng ƀing khua mua wai lăng gru grua să akŏ pơdong grup atông čing hơmâo 15 čô, juăt hyu atông brơi ană plơi lăng. Khua ping gah plơi amai H’Đao ră ruai:“Kâo jak iâu adơi amai, ƀing đah rơkơi wơ̆t hăng ƀing neh wa amăng plơi akŏ pơdong grup mơñam mrai hăng grup atông čing. Abih bang lêng kơ hor ngă soh. Kâo čang rơmang mơ̆ng bruă anai, gru grua djuai ania Êđê ƀing gơmơi amra hơmâo djă pioh hăng bang hyu pơ ƀing hlăk ai”.

Să Čư̆ Suê, tơring glông Čư̆ M’gar hơmâo rơbêh 220 čô ping gah, amăng anun hơmâo 71 čô jing mơnuih djuai ƀiă, jơnum pơ 2 grup ping gah plơi djuai ania Dao hăng 4 grup ping gah plơi pla djuai ania Êđê. Amăng anun hơmâo dua čô Khua ping gah plơi djuai ania Êđê anun lĕ amai H’Đàn Niê hăng H’Đao Êban. Ơi Phan Xuân Lực, Khua ping gah să Čư̆ Suê lăi nao kơ dua čô đah kơmơi lêng kơ pơtrut tui tơlơi gơgrong “Mơnuih ping gah nao hlâo, ană plơi kiăo klôn”, tui hăng tơlơi pơtô mơ̆ng Wa Hồ:“H’Đàn Niê lĕ mơnuih thâo pơmin dlăm biă, lêng kơ pơtô pơblang, iâu pơthưr neh met wa amăng plơi mă yua boh thâo ia rơgơi amăng bruă rông hlô, pla kơphê, tiu, hăng djŏp djuai boh troh yơyôm. Bơ hăng H’Đao Êban jing mơnuih hor djă pioh răk lui gru grua hiam mơ̆ng đưm. Pô ñu hơmâo iâu pơthưr neh met wa djă pioh bruă mơñam mrai, akŏ pơdong grup atông čing klă biă, mơ̆ng anun djru djă pioh gru grua boh thâo hăng bruă atông čing adoh suang mơ̆ng mơnuih djuai ania Êđê amăng plơi pla. Gơñu lêng kơ khua ping gah plơi rơgơi hloh, jing mơnuih pơtruh brơi Ping gah hăng ană plơi”.

Amăng plơi pla djuai ania Êđê, đah kơmơi ƀu kơnong jing mơnuih wai lăng bơwih bơwang amăng sang anŏ đôč ôh mơ̆ ăt jing mơnuih pioh pran jua bang hyu tơlơi hiam klă amăng plơi pla. Hơdôm čô đah kơmơi ngă khua ping gah plơi kah hăng H’Đàn hăng H’Đao jing mơnuih pơtrut pran jua kơ bruă pơđĭ kyar bơwih ƀong huă - mơnuih mơnam, pơtrut tui gru grua hiam mơ̆ng djuai ania, ngă brơi plơi pla jai hrơi pơdrong sah klă hiam./.