Hur har pơhrăm suang hăng ƀing gơyut ƀơi Sang bôh thâo hlăk ai čơđai muai Dak Lak, adơi Nguyễn Thục Quyên, 13 thun ƀơi phường Ea Tam, plơi prong Buôn Ma Thuột brơi thâo, tơdơi kơ pơđut thun hrăm, ñu hmâo gơgrong hlâo kơčăo bruă pioh hmâo hơdôm hrơi pơdơi prong mơ-ak hăng tŭ yua. Ră anai, Quyên hmâo rơkâo hrăm dong 2 anih bôh thâo dong ƀơi sang bôh thâo:

“Amăng blan anai kâo amra hyu ngui pah blâo mơnŭ hăng bruă mă ƀơi anai, bơ̆ 2 blan tơdơi lĕ kâo amra hrăm hră amăng bơyan pơdơi prong dong, hrăm Toán hăng Tơlơi Anglê. Truh blan 8 kâo amra hyu ngui ƀơi Gia Lai. Thun anai kâo dưi hmâo amĭ kâo ngă hră rơkâo lông lăng 5 hrơi 4 mlăm ƀơi sang phơ̆t Liên Trì pơ̆ Gia Lai, djru kâo plai ƀiă hruaih ƀiă akô̆ glô tơdơi kơ sa thun hrăm”.

Kiăng ană bă hmâo sa bơyan pơdơi prong tŭ yua, lu amĭ ama čơđai ăt hơduah ĕp lăng klă mơn hăng djru rơkâo gum hrŏm hơdôm bruă mă, Bruă mă bơyan pơdơi prong ƀơi Dak Lak ƀu kơnong kơ pơjing tơlơi mơ-ak, pơhrăm drơi pô ôh mơ̆, dô̆ anăp nao djru čơđai plai ƀiă mă yua măi mok hăng bĕ ataih tơlơi rơka ruă. Amai H’ Duyệt Niê, ƀơi phường Tân Lập, plơi prong Buôn Ma Thuột, tơring čar Dak Lak brơi thâo:

“Pơdơi prong ăt kiăng ngă gal brơi mơn kơ čơđai ngui ngor, mơ-ak suaih pral, khin hơtai hloh, hmâo lu gơyut hăng dưi hrăm tui lu mơta. Ñu dô̆ pơ̆ sang ră anai glăk hrăm  anih hrăm Dance-kids, hrăm suang mơ̆ng thun hlâo truh kơ ră anai, ñu ăt hor suang mơn anun kâo ăt brơi ñu hrăm suang mơn”.

Ƀơi sang bôh thâo Hlăk ai čơđai muai Dak Lak, hmâo rơbêh kơ 2.000 čô tơdăm dra čơđai muai glăk gum hrŏm hơdôm anih hrăm bôh thâo kah hăng suang, adôh, kač rup, lăi pơthâo črăn hơdră, bơkơjăp drơi jăn, pơhrăm taih... Biă ñu, jơlan hơdră “Hrăm tal amăng khul tơhan” djru hơdôm rơtuh čô čơđai mơ̆ng 8 thun truh 15 thun hmâo tơhnal lông lăng anih anom pơhrăm amăng ling tơhan, ƀu tivi, ƀu telephone. Amai Nguyễn Thị Thúy Hiền, Kơ-iăng Khua gơgrong bruă Sang bôh thâo Hlăk ai čơđai muai Dak Lak lăi pơthâo:

“Bơyan pơdơi lĕ bơyan mơ̆ sang mă bruă čơđai muai hur har biă. Rơbêh kơ 30 mơta anih pok pơhrăm pơphun mơ̆ng 5h30 truh 9 mông mơmot, lăp djơ̆ hăng lu gưl mơnuih hrăm mơ̆ng 2 thun hăng lu hloh. Thun anai, rơngiao kơ djă pioh hơdôm mơta tơlơi hrăm juăt hrăm kah hăng hlâo adih gah bôh thâo đưm, adôh suang, bơkơjăp drơi jăn, bôh thâo hơdip lĕ ƀing gơmơi dô̆ đing nao bruă mă brơi đôč, hơdôm anih anom ngui pơčeh phrâo, găn rơgao lăng bôh thâo ia rơgơi, đing nao pơgang, pơgăn ia ƀlung hăng tơlơi truh rơka ruă kơ ƀing čơđai”.

Ƀơi hơdôm bôh plơi, čơđai muai Dak Lak ăt glăk pơphun bơyan pơdơi prong hur har. Adơi H Juliê Byă, 9 thun, ƀơi să Ea Tul, tơring glông Čư̆ Mgar lăi pơthâo, bơyan pơdơi prong lĕ tal pioh kiăo tui tơlơi pô hor. Ƀu nao hră pơ̆ sang hrăm anun kâo hmâo lu mông pioh hrăm dong hơdôm tơlơi hrăm bôh thâo hăng ngui tơlơi ngui pô hor:

“Amăng hơdôm hrơi pơdơi prong, kâo hrăm tơlơi Anglê, Toán, hrăm MC, hrăm čih bôh hră, hrăm pĕ gông Piano. Anun lĕ hơdôm tơlơi hrăm kâo hor. Rơngiao kơ anun hơdôm mông wăn, kâo pơđok tơlơi akhan hăng ngui tơlơi ngui hăng adơi kâo hăng ƀing gơyut amăng kual kâo dô̆”.

Truh bơyan pơdơi prong ăt lĕ bơyan pơphun Blan mă bruă yua kơ čơđai muai, yua anun, hơdôm bruă pơgang, bơwih brơi hăng pơtô pơhrăm čơđai muai jai dưi đing nao, lăng ba. Thun anai hăng anăn ñu “Đing nao ngăn rơnoh ngă giong hơdôm tơhnal pơkă yua kơ čơđai muai”, mơ̆ng krah blan 5, Jơnum min mơnuih ƀôn sang tơring čar Dak Lak hmâo mă yua kơčao bruă pok pơhai Blan mă bruă yua kơ čơđai muai. Amăng blan 6, Dak Lak pơphun “bơyan pơdơi yua kơ čơđai muai” hăng hơdôm bruă mă lăi pơhing pơtô pơhrăm hăng pơtô luai, pơgang pơgăn ia ƀlung kơ čơđai sang hră đơ đam tơring čar. Ƀơi hơdôm anih anom mơnuih ƀôn sang dô̆, khul hlăk ai ăt pơphun mơn bruă jơnum bơyan pơdơi prong kơ čơđai muai ƀơi anih dô̆ hăng lu bruă mă lu mơta, ngă pơhưč. Amai Phan Thị Trinh, Kơ-iăng Khua git gai Khul hlăk ai tơring čar Dak Lak, brơi thâo:

“Kơtưn gum hrŏm hăng hơdôm gơnong bruă pioh pok pơhai thâo hăng pơsir hơdôm bruă bơdjơ̆ nao čơđai muai. Kơtưn bruă pơgang hlôm hlâo ƀơi plơi pla pioh ƀing čơđai hmâo hơdôm bruă ngui ngor amăng tal pơdơi prong ngă hiưm hơpă pơhlôm klă hăng pơhlôm hơđong. Tô̆ tui pok pơhai bruă pơsur Yua kơ čơđai muai kiăng khăp, đing nao hơdôm bôh yôm gah ƀơk prăk hrăm hră ƀudah pơdŏng hăng pơkra glăi hơdôm ring bruă ngui ngor kơ ƀing čơđai muai, biă ñu ƀơi hơdôm kual asuek, ataih hăng hơdôm anih anom tơnap tap”.

Hăng tơlơi gum tơngan hrŏm mơ̆ng hơdôm gưl, hơdôm gơnong bruă, hăng mơ̆ng tơlơi gơgrong hlâo mơ̆ng ƀing amĭ ama čơđai, čơđai muai Dak Lak glăk hmâo sa bơyan pơdơi prong sit nik mơ-ak, pơhlôm hăng tŭ yua. Rim bruă mă, rim anih anom ngui ngor ƀu kơnong kơ tơlơi mơ-ak ôh mơ̆, ñu dô̆ jing bruă mă pioh ƀing čơđai phing kơ pran, kơjăp pran jua hloh tơdơi kơ rim hrơi pơdơi prong./.