Ba gru hlâo, ba jơlan hlâo amăng pơđĭ kyar bơwih ƀong, mơnuih ping gah Tòng Văn Lải, grŭp ping gah plơi Co Phung, să Hua La, plơi prong Sơn La, tơring čar Sơn La ruah laih hơdră pla kơphê, rông hlô mơnong pioh ngă rah gru hlâo kơ neh wa nao hrăm tui, pơđĭ kyar rah bruă bơwih ƀong sang anô̆.

Kơnang kơ mă yua hơdră bôh thâo phrâo kah hăng kơmok pruai, čre than djơ̆ hrơi pơkă hăng phun pla; tlâ̆o vaccine hăng kơtưn djop mơnong ƀong ngă bơbuă kơ pŭ hlô rông, truh ră anai, hơdră bơwih ƀong hmâo 1,5 ektar lŏn mơ̆ng sang anô̆ rim thun sĭ hmâo rơbêh 40 drơi un; 15 tơn bôh kơphê, pơsir abih prăk mă yua, prăk kơmlai pơhrui glăi hmâo 300 klăk prăk.

Ping gah Tòng Văn Lải lăi pơthâo, mơ̆ng bôh tơhnal bơwih ƀong rơđah rơđông mơ̆ng hơdră, drơi pô ñu juăt djru gum, djru hơdôm bôh sang anô̆ amăng plơi, amăng să hơdră bôh thâo phrâo rông hlô, tơjŭ pla, djuai phun pla kiăng pơhrui glăi lu gơnam, pơplih hơdră phun pla, pơđĭ dong prăk pơhrui glăi:

 “Kâo pơsur adơi ayong ngă tui kâo, kâo dưi ngă hơget lĕ lăi pơthâo kơ gơñu ngă tui anun. Adơi ayong hơpă kơƀah prăk tuh pơplai lĕ pô ăt brơi čan mơn, kah hăng kiăng blơi un rông, ƀudah rơmô ba glăi rông thơ kâo ăt djru brơi mơn kơ adơi ayong”.

Ngă tui Jơlan hơdră pơdŏng plơi pla phrâo, grup ping gah Co Phung, să Hua La, plơi prong Sơn La, tơring čar Sơn La hmâo pơsur hơdôm bôh sang anô̆ pơčrông sai hrŏm, tŭ ư hrŏm pơphun ngă tui ba glăi bôh tơhnal hơdôm tơhnal ba tơbiă, biă ñu bruă pơkra jơlan nao rai amăng plơi pla, djă pioh grŭp lăi pơthâo nao rai wai lăng hơđong rơnuk rơnua plơi pla, pơdŏng pơjing tơlơi hơdip mơda tâ̆o yâo phrâo...

Mơ̆ng thun 2021 truh ră anai, grŭp ping gah plơi hmâo pơsur laih neh wa gum pơčruh hmâo 650 klăk prăk, pĕ pha rơbêh kơ 500 met kơ rê lŏn, giăm truh 2.000 hrơi bruă; lu sang anô̆ amra ruh lui, pơplih pơkra, pơplih anih dô̆ pioh pơkra 1,6km jơlan ƀê tông; 4km atur jơlan amăng plơi, djru bruă nao rai, dŭ pơgiăng gơnam tam. Yă Lèo Thị Tiển, grŭp mơnuih ƀôn sang wai lăng mă pô mrô 5, plơi Co Phung brơi thâo:

 “Hlâo adih jơlan nao rai anhep biă, ră anai dưi hmâo Kơnuk kơna pơkra jơlan phrâo pioh neh wa nao rai gêh gal, sang anô̆ kâo ăt tŭ ư mơn lơm khom pŭ đuăi sang pô”.

Tui hăng ơi Lò Văn Hội, Khua git gai Ping gah plơi, Khua plơi Co Phung, giăm hmâo 10 thun rơgao, grŭp ping gah pơsit hơdôm bôh yôm pơplih phrâo, anun lĕ: pơđĭ bruă jơnum grŭp ping gah; pơplih phrâo jơlan gah git gai; pơdŏng tơlơi hơdip tâ̆o yâo ƀơi kual mơnuih ƀôn sang dô̆; pơsur mơnuih ƀôn sang pơplih phrâo hơdră phun pla, hlô rông lăp djơ̆... Truh ră anai, phun ñu hmâo 240 bôh sang anô̆, rơbêh kơ 1.100 čô mơnuih, amăng anun kơnong kơ dô̆ 5 bôh sang anô̆ ƀun rin, ƀu hmâo sang anô̆ ƀun rin; pơhrui glăi hơnong ñu him lăng hmâo 50 klăk prăk sa čô mơnuih sa thun; amăng plơi hmâo lu hơdră ngă đang hmua ba glăi lu prăk kak:

 “Pơ̆ anăp anai, grŭp ping gah ăt kah hăng ƀing mơnuih ping gah amra hrăm tui dong gru hiam pran jua, kơnuih Hồ Chí Minh, pơsur neh wa mơnuih ƀôn sang pơđĭ kyar dong bruă bơwih ƀong, agaih anih anom dô̆, pơđĭ kyar plơi pla phrâo pơplih phrâo. Đing nao kơtưn pơđĭ kyar bơwih ƀong sang anô̆, mă yua bôh thâo phrâo măi mok, rông hlô mơnong, pla djop djuai phun pla pơkon hmâo nua yôm".

Ơi Lò Văn Chính, Khua git gai Ping gah să Hua La, plơi prong Sơn La brơi thâo, ngă tui tơlơi črâo ba mrô 5 mơ̆ng Ding jum kơđi čar, Grŭp Ping gah plơi Co Phung hmâo pơpha mơnuih ping gah kiăo tui tơlơi pơtrun pơsit mơ̆ng grŭp ping gah, gơgrong bruă pok pơhai ƀơi hơdôm grŭp, ƀut mơnuih ƀôn sang dô̆. 40 čô mơnuih ping gah amăng grŭp ping gah leng kơ neh wa djuai ania Thái, ba jơlan hlâo na nao ngă giong bruă hmâo pơpha hmâo jao, pơhlôm bruă git gai mơ̆ng grŭp ping gah, hơdôm bruă mă mơ̆ng plơi, hơdôm grŭp khul leng kơ djă pioh hăng ngă tui tơlơi tâ̆o yâo:

 “Biă ñu lĕ ƀing mơnuih ping gah amăng grŭp ping gah hmâo gơgrong laih bruă pơphun pok pơhai truh hơdôm grŭp sang anô̆ ăt kah hăng hơdôm ƀut mơnuih ƀôn sang dô̆ mơng pô kơ hơdră pơtrun, hơdră bruă mơ̆ng Ping gah, tơlơi phiăn mơ̆ng Kơnuk kơna, biă ñu tơlơi pơtrun pơsit mơ̆ng grŭp ping gah ba tơbiă rim blan amăng pơđĭ kyar bơwih ƀong mơnuih mơnam, ăt kah hăng tơlơi hơdip mơda tâ̆o yâo mơnuih mơnam mơ̆ng plơi pla anun. Mơ̆ng anun neh wa thâo hluh, laih anun gum hrŏm hơbit, pơdŏng, ba tơbiă hơdôm tơlơi gum pơhiăp, jơlan pơsir, bruă mă pioh ngă hiưm hơpă pơđĭ dlông tơlơi hơdip mơda gơnam tam pran jua mơ̆ng neh wa mơnuih ƀôn sang”.

Hrăm hăng ngă tui Wa hăng hơdôm bruă mă rơđah, sit nik, ngă tui pran jua gum hrŏm hơbit, gum djru nao rai tơdruă, triăng amăng bruă mă, ngă đang hmua, plơi Co Phung hmâo hăng glăk hmâo pơplih amăng ƀrư̆, ƀô̆ mơta plơi pla jai hrơi jai pơplih phrâo; hơdôm mơta phiăn sô hơđăp ƀu tŭ yua amăng pơdô̆ rơkơi bơnai, pioh atâo ăt lŏm lui mơn; lu gru hiam bôh thâo đưm dưi pơgang hăng ngă tui. Na nao amăng lu thun, grŭp ping gah plơi Co Phung jing grŭp ping gah mơbruă mơ̆ng plơi prong Sơn La./.