Yap truh akŏ thun 2025, đơ đam đang pơtơi pla ƀơi tơring čar Gia Lai truh 7.300 ha, boh pơtơi koh ba sĭ hơmâo năng ai 237.000 tơn. Kông ty pơčruh ngăn Ngă hmua ba yua ia rơgơi phrâo Hưng Sơn hlăk pla rơbêh 550 ha pơtơi ƀơi hơdôm tơring glông Đak Đoa hăng Čư̆ Prong, tơring čar Gia Lai. Rim thun, kông ty sĭ pơ dêh čar tač rơngiao năng ai 20.000 tơn pơtơi, lu biă ñu ba nao pơ dêh čar Japan hăng Hàn Quốc. Him lăng, thun anai hăng thun pơ anăp amra đĭ truh 35.000 tơn. Ơi Nguyễn Quang Anh, Khua Khul git gai kông ty brơi thâo, yua hơmâo ba yua boh thâo ia rơgơi phrâo, ngă đing pruih ia tơdjôh, tui ia rơgơi mơ̆ng dêh čar Israel, ba yua ia rơgơi drone pioh ĕp lăng hlăt pơčram hăng pơdong hơjai ngă pơrơ-ot djă pioh sui huăi  brŭ pơtơi, pơtơi mơ̆ng kông ty hơmâo ba sĭ pơhưč anih blơi yua jing anih ruah biă mă ăt dưi mut laih.

“Kuăl lŏn drơ̆t mriah Bazan djơ̆ găl hăng bruă pla pơtơi, phun pơtơi ba glăi boh tŭ yua lu, tơdah tŭ yua lu lĕ khom hơmâo hơdră, tơlơi pơtrun rơđah rơđong tum teč, khom ngă djơ̆ tong ten, sem lăng, pơgang arong aruač hlăt pơčram, anŏ pơđĭ kyar phun pơtơi. Ră anai, ƀing gơmơi hlăk ba sĭ pơ dêh čar Hàn Quốc, Japan, Khač hăng kual Trung Đông. Kơnong 4 anih anom sĭ mơdrô anai ăt aka ƀu djop gơnam ba sĭ mơdrô ôh”.

Đơ đam tơring čar Gia Lai ră anai hơmâo pơhưč 50 kơčăo bruă pla pơjing hăng đơ đam truh 8.500 ha, abih tih rơnoh prăk tuh pơ alin lĕ 10.000 klai prăk. Amăng anun, group anom bruă sĭ mơdrô prong Hoàng Anh Gia Lai hơmâo pla hăng pơđĭ kyar lu hloh djop mơta phun coh čroh ƀong. Ră anai group hlăk pla truh 7000 ha đang pơtơi ƀơi Gia Lai, dêh čar Lao hăng dêh čar Kur dơ̆ng. Ơi Nguyễn Ngọc Mai, Khua kông ty pơčruh ngăn čem rông hlô mơnong Gia Lai, gah group Hoàng Anh Gia Lai brơi thâo, anŏ gêh găl mơ̆ng lŏn mơnai glai klô, phun pơtơi mơ̆ng kông ty boh hiam ƀong jơman biă mă.

“Kual pla pơtơi Nam Mỹ mơ̆ng kông ty djơ̆ amăng kual lŏn drơ̆t mriah Bazan, anih dlông pơkă hăng jơlah ia rơsĭ 800 met, tui anun ñu gêh găl hăng phun pơtơi mơ̆ng Nam Mỹ. Yua kơ anih dlông, lŏn mơnai klă, phun pơtơi hơdip sui mơ̆n, boh pơtơi ƀong jơman, lu ia hiam hloh pơkă hăng anih pla pơkŏn”.

Ră anai, gơnam sĭ mơdrô mơ̆ng pơtơi Gia Lai hơmâo ba hyu sĭ mơdrô pơ lu anih anom, ruah biă mă kah hăng Japan, Hàn Quốc, kual Trung Đông...brơi ƀuh, anŏ pơhno rơnoh hiam hăng anŏ jơman pơtơi ƀong tui hơnơ̆ng pơkă jar kmar djơ̆ lăp yơh. Yă Đào Thị Thu Nguyệt, Kơ-iăng khua Gơnong bruă wai lăng sĭ mơdrô tơring čar Gia Lai lăi pơtong:

“Hăng gơnam sĭ mơdrô pơtơi ră anai hlăk pơtong rơđah anŏ hiam, jơman mơ̆ng ñu laih anun djă anăn boh pơtơi mơ̆ng kual Dap Kơdư lăi hrŏm hăng Gia Lai hnun mơ̆n. Ră anai, anih sĭ mơdrô mơ̆ng Gia Lai ăt hlăk pơđĭ kyar ba sĭ gơnam pơtơi, hơduah ĕp dêh čar blơi pơmut hăng pok pơhư prong anih blơi”.

Hăng anŏ gêh găl hơmâo mơ̆ng hlâo hăng anŏ pơsit anăp pơđĭ kyar bruă ngă hmua tui boh thâo ia rơgơi phrâo, pla pơtơi hlăk pơsit anŏ gêh găl gơnam sĭ mơdrô mơ̆ng đang hmua ƀơi Gia Lai ba nao pơ dêh čar tač rơngiao. Bruă tuh pơ alin pơkra jơlan, sang bruă pơgang pioh, pok prong anih ba sĭ mơdrô, lir hơbit hăng pơđĭ tui rơnoh pơhno bruă sĭ mơdrô ƀơi hơdôm dêh čar ruah biă mă jing sa bruă mă phun yom, djru kơ anom bruă pla pơtơi dưi pơđĭ kyar hơđong kơjăp, djru hrŏm hiam klă pơtrut rơnoh pơđĭ kyar bruă ngă hmua pla pơjing, pơđĭ kyar kual plơi pla ƀơi tơring čar.