Măi rơndeh măi dŭi đì mhar ngan tàm gùng lòt lă cài ring ngan, pơndiang rlau 2 rơbô tờm kơphê mờ 300 tờm mắc ca sơntìl bơh suơn ờng rê nàng tam tam gơl bă ù suơn điều ờ hoan geh cồng nha, ồng Điểu Đi, ơm tàm ƀòn Bu Păng 2, sàh tiah nhàr lơgar Quảng Trực, càr Lâm Đồng brơn brài ngan. Kơnờm geh bơta bơcri priă lơh bơh Dà lơgar dê mờ gơl gùng dờng niam, kă bro phan ƀuơn ƀoài ngan. Ală broă lơh bơt bơtàu phan bơna rơ hời lơh sir, ală rơndăp broă lơh dong kờl lơh broă sa geh lam lơh, hìu bơnhă ồng Điểu Đi mờ làng bol tàm sàh kung jat mờ hơ̆ mờ bơtàu tơnguh rlau: “Ưn ngài Đảng, ưn ngài Dà lơgar neh dong kờl làng bol geh piang sào ào soh mờ lơh hìu đam. Rài kis neh bè ờs niam ngan, tŭ do mìng kơlôi rcang lơh sa bơtàu tơnguh lơh sa lơm, làng bol sùm lơh jat gùng dà broă lơh bơh Đảng mờ adat boh lam bơh Dà lơgar dê lơm”.

Ồng Nguyễn Văn Anh, Củ tịc Anih duh broă Làng bol sàh Quảng Trực, pà gĭt, pơgồp bal lam lơh ală broă lơh, rơndăp broă lơh, ală tiah neh tơrgùm bơto pơlam làng bol rơ hời tam gơl rơndăp tăp sèng phan tam, phan ròng, di pal mờ bơta is ồn ù tiah, nhờm trồ tiah dê. Bơh priă jền bơcri priă bơh Dà lơgar, mờ ală broă lơh di pal bal mờ bơta lơh ngan brồ guh bơh làng bol tiah nhàr lơgar dê neh tơrmù mhar khà hìu bơnhă rƀah. Ồng Nguyễn Văn Anh, đơs: “Sàh pơn jat tai bơsram lơh jat jrô ơnàng làm uă Jơnau lơh nền Pơrjum dờng Đảng ală kấp dê, jat tàm bơta hơ̆ lam lơh dồ ròt bal ală broă lơh, broă rơndăp lơh, rơndăp broă lơh bơcri priă mờ pơn jat tai mblàng yal, hòi jà làng bol jơh nùs lơh broă sa, tơn jơh gloh, tơrmù rƀah. Jơh nùs lơh ngan bơt bơtàu gơ gơs tiah bơtàu tơnguh, lik klàs rƀah tàm nam 2025”.

Bè cồng nha lơh geh tàm rlau 20 nam tơnggơs càr Dăk Nông (yau), ồng K’Khét Atô, lài do là đơng lam bồ Sờh Jơi bơtiàn mờ gah pin dờn jăt Yàng, pà gĭt, tơngai bơh nam 2004 tus nhai 6 nam 2025, Dăk Nông (yau) geh Dà lơgar bơcri priă pơgăp 2 rơbô 800 tơmàn đong ai 3 broă lơh jơnau kờñ Dà lơgar. Bal mờ khà priă lơh bal rlau 820 tơmàn đong, ală priă jền bơcri priă geh pà tus di cau, di broă, neh dong broă lơh tơrmù rƀah lơh geh cồng nha uă:“Geh bơta sền gròi bơh Đảng, Dà lơgar mờ Quôk hội neh ai tơlik gùng dà broă lơh lam lơh jat 3 broă lơh jơnau kờñ Dà lơgar tàm tiah làng bol jơi bơtiàn dồ ết nă cau, tiah kơh bơnơm. Làng bol ală jơi bơtiàn neh lơh ngan tàm pơrlòng lơh broă, lơh sa, tơn rŭc ală bơta kal ke, jơgloh rơƀah, nàng ƀòn lơgar in lik klàs bơta càr rƀah kal ke”.

Tơngai bơh nam 2021 tus tŭ do, pah nam tiah nhàr lơgar càr Lâm Đồng (Dăk Nông lài do) tơrmù rlau 3% hìu bơnhă rƀah mờ tus bồ nam 2025, khà hìu bơnhă rƀah mìng gam rlau 3%. Broă sùm lam lài tiah Tây Nguyên mờ ơm tàm mpồl lam lài bơh gùt lơgar dê bè tơrmù rƀah, neh pà gŏ nùs nhơm lơh ngan mờ ală broă lơh geh cồng nha bơh tiah do dê tàm lam lơh ală broă lơh jơnau kờñ Dà lơgar, bơtàu tơnguh kơ̆ kơl jăp jŏ jòng tiah làng bol jơi bơtiàn dồ ết nă cau mờ tiah kơh bơnơm.