Tàm hìu pa lơh dờng niam, ồng Y Tơn, kòn cau M’nông ơm tàm ƀòn Dăk Săk, sàh Dăk Săk chờ hờp ngan tài rài kis hìu bơnhă neh tam gơl pa. Ồng Y Tơn pà git, do là cồng nha bơh broă lơh lik klàs rƀah kơ̆ dơn bal mờ bơta dong kờl bơh gơnoar atbồ tàm ƀòn lơgar dê, ngan là bơta dong kờl jơh nùs ngan bơh ală đảng viên tàm ci ƀộ ƀòn dê. Nđờ nam lài, rlau 2 lồ mìr uă ngan là tam bùm blàng, ờ jai ròng jơh dùl hìu bơnhă geh nđờ nă cau. Mơya tŭ do, kung mờ 2 lồ mìr do, geh ala mờ tờm kơphe, sầu riêng, pơnat, den tàng hìu bơnhă geh priă jền lơh geh kơ̆ kơljap jŏ jòng sùm: “Geh dà lơgar sền gròi geh ci ƀộ ƀòn pơlam mờ geh càn priă bơh ngân hàng dong kờl cau rƀah den tàng hìu bơnhă geh tai bơta ƀuơn nàng bơtàu tơnguh lơh sa. Tŭ do neh tam geh kơphe mờ uă bơta chi sa plai, bàr pe bơta tờm chi neh tac geh priă jền, rài kis neh bơtàu tơnguh rlau, geh tai bơta nàng brồ guh”.

Bal mờ ală broă lơh, rơndap broă tơn jơh jơgloh, tơrmù rƀah, ală bơnah priă bơcri dong kờl cau rƀah, broă ală kâp ủy đảng mờ jơh gùt anih lơh broă cíñ trị lơh bal dong kờl ală hìu bơnhă rƀah mờ ală broă lơh ngan ngồn neh dong broă lơh tơrmù rƀah lơh geh cồng nha. Là đảng viên, cau ling yau geh bơngă pin dờn, ndrờm bè ngai lơi ồng Y Bleng, kòn cau M’nông ơm tàm ƀòn 9, sàh Krông Nô kung bal mờ mpồl atbồ is lòt còp ală hìu bơnhă rƀah tàm ƀòn, cribơyai mờng chài tàm rài kis mờ broă lơh sa. Ồng Y Bleng pà git, tàm 5 nă đảng viên, 5 hìu bơnhă pas sơm den rơp bal mờ gơp dong kờl 1 hìu bơnhă rƀah. Ală hìu bơnhă rƀah geh pơlam tơn, ờ mìng geh bơta gơn kơnòm bè phan bơna mờ gam geh pơn jờng bè nùs nhơm nàng brồ guh: “Oh mi pal tàm pơn jờng gơp, hòi jà làng bol tam klac bal, bơtàu tơnguh lơh sa. Ờ di cau ling yau mìng là 1 nă añ lơm gời, cau ling yau là pal hòi jà làng bol, kung pal lòt sền hìu bơnhă rƀah, he sùm lơh bè hơ̆. Hìu bơnhă lơi kal ke den he kung pal tơrgùm nàng tàm hòi jà gơp, oh mi pas sơm, geh phan bơna priă jền den kung dong kờl hìu bơnhă rƀah hơ̆”.

Broă lơh ală đảng viên dong kờl hìu bơnhă rƀah brồ guh neh geh lam lơh uă tàm uă ƀòn, thôn bơh càr Dăk Nông yau, càr Lâm Đồng pa dê. Git nđờ rhiang hìu bơnhă rƀah gam geh ală mpồl lơh broă đảng tàm kâp hơ đơm, ală ci ƀộ, ală đảng viên tàm thôn, ƀòn dong kờl nàng mhar jơh rƀah. Mò Vương Thị Hiền, Phó Củ tịc Anih duh broă mặt trận dà lơgar sàh Dăk Ndrung, kơnhoàl Dăk Song yau lài do pà git, mờ bơta tus bal bơh ală đảng viên tàm uă kâp dê, bơh thôn tus sàh, kơnhoàl, bal mờ bơta lơh bal bơh ală mpồl lơh sa kă bro, cau geh nùs nhơm niam, den tàng priă jền lời ai tơl hìu bơnhă in ndrờm loh làng, geh tơngume tờm jơh: “Mùl màl rài kis làng bol dê gam uă ngan kal ke, khi gam ờ tơl bè uă bơta den tàng mờng chài bol hi dê là ờ lòt jat khà mờ pal tơrgùm tàm bơta niam. Tài dùl hìu bơnhă rƀah den he pal dong kờl uă bơta, ờ di mìng dong kờl priă bơcri là khi gơtùi jơh rƀah. Nàng pleh gơbàn rƀah wơl den sàh đah git neh dong den pal dong tus gùng tus dà, dong uă bơta nàng khi ngan ngồn jơh rƀah”.

Lam lơh broă lơh jơnau kờñ dà lơgar bè tơrmù rƀah, nhai 12 nam 2021, Tỉñ ủy càr Dăk nông yau yal Jơnau lơh nền tàm pơrjum sồ 13 bè tơrmù rƀah tơngai bơh nam 2021 tus nam 2025, gùng dà ai tơlik lài tus nam 2030. Jơnau lơh nền tàm pơrjum ai tơlik jơnau kờñ tơrmù bơh 3% hìu bơnhă rƀah pah nam, gơ wèt mờ tiah jơi bơtiàn dồ êt nă cau là 5% pah nam, uă rlau 2 dơ̆ broă jàu bơh broă lơh dà lơgar dê. Ngui niam gơnoar broă bơh ală kâp ủy Đảng, ală mpồl lơh broă Đảng tàm kâp hơ đơm dê, ală ci ƀộ, đảng viên geh càr sền gròi uă ngan. Kơnờm bơh hơ̆, 5 nam do, càr Dăk Nông yau sùm lơh gơtùi mờ sơrlèt rlau broă rơndap lơh tơrmù rƀah, là càr tơrmù rƀah mhar ngan rlau jơh tiah Tây Nguyên mờ là dùl tàm ală tiah tơrmù rƀah mhar ngan rlau jơh gùt lơgar. Ồng Ngô Thanh Danh, Ƀí thư Tỉñ ủy càr Dăk Nông yau lài do pà git: “Pơgồp bal ală bơta priă jền, lam lơh niam ală broă lơh dong kờl kòn cau, broă lơh dong kờl tơrmù rƀah kơ̆ kơljap, bơt bơtàu thôn ƀòn jat gùng dà bơtàu tơnguh kơ̆ kơljap. Lam lơh niam ală broă lơh jơnau kờñ dà lơgar bè bơtàu tơnguh lơh sa mpồl bơtiàn tiah jơi bơtiàn dồ êt nă cau mờ tiah kơh bơnơm, tơrgùm lài priă jền ai bơcri priă bơtàu tơnguh mờ lơh sir rơndap tap sèng phan bơna, hìu ơm, ù ơm, ù lơh sa”.

Jơnau sồr sồ 5 nam 2021 bơh Mpồl đơng lam Đảng dê đơs loh, broă lơh tơrmù rƀah kơ̆ kơljap là gùng dà broă lơh dờng, kuơmàng, ờ tam gơl, geh lơh sùm tàm jơh gùt tŭ tơngai lam lơh broă lơh tam gơl pa, bơt bơtàu mờ bơtàu tơnguh dà lơgar. Tŭ lam lơh tàm càr Dăk Nông pa do ai gŏ, bơta kràñ cê bơh Jơnau lơh nền tàm pơrjum bơh Tỉñ ủy càr dê tus ală broă lơh ngan ngồn tàm kâp hơ đơm, tàm ƀòn lơgar neh dong broă lơh tơrmù rƀah lơh geh cồng nha. Bơta tam gơl pa bơh gơnoar broă đơng lam bồ bơh mpồl lơh broă Đảng kâp hơ đơm dê neh lơh gơ rề tus ală đảng viên mờ cèng wơl cồng nha ngan ngồn tàm broă lơh tơn jơh rƀah.