A Hneăng hôp, pôa Trương Văn Đạt, Phŏ kăn hnê ngăn Hô̆i đong kong pơlê Gia Lai, hiăng tơbleăng mâu tơdroăng ki kal tơdjâk troh pơkâ thế mâu ngế cheăng. Tiô pơkâ dêi Vi ƀan pơkuâ Kuô̆k hô̆i, kong pơlê Gia Lai hơnăm 2021 – 2026 ai tâi tâng 119 ngế. Tơdrêng amê, mâu tíu cheăng xiâm dêi Hô̆i đong hnê ngăn kong pơlê xuân châ tơbleăng. Ki nhên: Pôa Rah Lan Chung, phŏ kăn pơkuâ ngăn Đảng, châ rah xo pro kăn hnê ngăn Hô̆i đong hnê ngăn kong pơlê Gia Lai. Mâu phŏ kăn pơkuâ Hô̆i đong ƀă ngế pơkuâ mâu khu râ kơvâ cheăng xuân châ xo pêi cheăng tung kơ koan cheăng kăn pơkuâ nếo. Pơtối mê, Hô̆i đong hnê ngăn kong pơlê hiăng tơbleăng pơkâ dêi Ngế pro xiâm hnê ngăn Chin phuh ‘na mâu ngế cheăng pơkuâ Vi ƀan hnê ngăn kong pơlê Gia Lai hơnăm 2021 – 2026. Tung mê: Pôa Phạm Anh Tuấn, phŏ kăn pơkuâ ngăn Đảng, châ xo pro kăn hnê ngăn Vi ƀan kong pơlê Gia Lai; 6 ngế phŏ kăn hnê ngăn Vi ƀan pơkuâ tung mâu kơvâ cheăng châ xing xoăng.

Tơpui a ngiâ Hô̆i đong hnê ngăn, pôa Phạm Anh Tuấn, kăn hnê ngăn Vi ƀan kong pơlê Gia Lai tơhrâ:

“Pâ tơhrâ pêi cheăng ƀă hiâm mơno ki rơkê plĕng, tơdrăng, tŏng gum, pôu râng hnoăng ƀă tơƀrê, tung mê xi túa pơkâ pro ngế ki djâ troăng ahdrối, kơtăng, kal mơnhông pro pơkâ tơmiât rơkê tung pơla pơkuâ hnê mơhno. Rơtế ƀă dêi rơpó tơdjuôm ivá, môi hiâm mơno, pêi kơtăng tơdâng tơ’mô tơƀrê xua môi tơdroăng cheăng tung la ngiâ mơnhông tơxâng ăm Gia Lai nếo tơmiât troh pơkâ pêi mơjiâng Gia Lai chiâng kong pơlê mơnhông krá tơniăn, hơniâp lĕm, rơkê plĕng, kro mơdrŏng ki rơkê plĕng ƀă tơrŭm tơroâ, kơpong tơnêi ki rêm khu mơdró kâ, kuăn pơlê pơrá ai tơdroăng ki rơhêng vâ veăng gum ăm tơdroăng mơnhông dêi pơlê xheăm tơná”.

A hneăng hôp, mâu kăn hiăng tơpui tơno, ăm rơkong tơpui tối hên hĭn kơxop mơéa pơkâ ki kal, tung mê ai: Mơjiâng mâu kơ koan ối tung Hô̆i đong hnê ngăn kong pơlê Gia Lai. Túa pơkâ tơkŭm po mâu hneăng hôp tiah hmâ dêi Hô̆i đong hnê ngăn kong pơlê. Mơjiâng mâu kơ koan cheăng ƀă tôh tơrŭm pro mơéa ối tung Vi ƀan hnê ngăn kong pơlê Gia Lai. Mơnhên inâi séa ngăn pơkâ cho vêa prôk ki apoăng tung tơdroăng ki rah xo mâu ngế tung kơ koan cheăng dêi kong pơlê, rak vế tŭm tơdroăng cheăng pêi tơƀrê ƀă tơdâng tung hneăng ki nếo.

Tơpui a hneăng hôp, pôa Hồ Quốc Dũng, kăn pơkuâ ngăn Đảng Gia Lai, tối nhên:

“Á pơkâ thế mâu kăn pơkuâ tíu pêi cheăng kong pơlê ki nếo châ rah xo pêi cheăng athế pêi cheăng hlối tung tơdroăng mơjiâng túa pơkâ pêi pro nhên, tơdrăng tro vâ tơbleăng pêi pro pơhlêh khoa hok, tơƀrê ƀlêi chiâng mâu hnoăng cheăng châ pơcháu tung la ngiâ. Loi tiah kố ƀă khôi hmâ, khên tơnôu, hiâm mơno tơrŭm ƀă púi rơhêng vâ mơeăm dêi kong pơlê Gia Lai nếo, ƀă môi ivá khŏm mơeăm ‘na tơdroăng kal kí nếo mơeăm pêi pro troh môi kong pơlê pơkuâ djâ ahdrối kơpong Tây Nguyên ƀă kĭng têa kơxĭ peăng tơdế Tơnêi têa Nam trung bộ krá rơdêi rơtế ƀă lâp tơnêi têa mot tung chal ki nếo”.

Hneăng hôp má Môi Hô̆i đong hnê ngăn kong pơlê Gia Lai hneăng 12 pơxiâm pêi cheăng ki kal vâ Gia Lai tơmiât troh pơkâ pêi mơnhông krá tơniăn, chiâng môi kong pơlê djâ troăng ahdrối tung kơpong ƀă lâp tơnêi têa.