Mâu hâi hdrối, rơpŏng pôa K’Thiệu, a thôn 1, cheăm Bảo Lâm 4, kong pơlê Lâm Đồng, phiu ro khât xua toăng hngêi nếo lĕm kâk hiăng châ mot ối. Pôa ăm ‘nâi, toăng hngêi ki kố ai tâi tâng kơxô̆ liăn pro cho 220 rơtuh, tung mê Tơnêi têa gum 50 rơtuh, kơxô̆ liăn ki u ối cho dêi rơpŏng kơdĭng tơ’nôm ƀă tơdroăng veăng gum tơ’nôm dêi vâi krâ kuăn pơlê hdroâng hdrê.

“Phiu ro khât drêng châ Đảng ƀă Tơnêi têa tơmâng ngăn tŏng gum hên troh tơdroăng rêh ối dêi vâi krâ kuăn pơlê hdroâng kuăn ngo kơtiê, kơpong hngế hngo, môi tiah ngin kố. Ai hngêi ối lĕm kâk môi tiah kố mê á bu tơmiât mơ-eăm pêi cheăng xo, ôh ti tơmiât xếo tơdroăng ki drêng kong mêi khía ôh tá ai hngêi ối, xua hngêi tơ’nhiê xi kơchoh môi tiah hdrối nah xếo”.

Riân troh hâi lơ 30/6, kong pơlê Lâm Đồng (ton) hiăng pêi klêi tơdroăng ‘mêng rơnêu ƀă pro 2.044 toăng hngêi nếo ăm rơpŏng kơtiê, rơpŏng vâ chê kơtiê tiô Tơdroăng pơkâ têa tah hngêi tơ’nhiê xi kơchoh. Ôh ti xê rĕng pro klêi lối 2 khế, cheăm kố ối pêi tơkâ luâ 236 toăng hngêi ối tâng pơchông ƀă túa pơcháu.

Xuân pêi klêi tơdroăng têa tah hngêi tơ’nhiê, xi kơchoh hdrối tâ 2 khế, kong pơlê Gia Lai hiăng mơhnhôk veăng tơlo châ mâu kơxô̆ liăn vâ pêi tơƀrê tơdroăng kố. Rơtế ƀă liăn ngân ki hbru ăm, hên tíu pêi cheăng hiăng rơtế prôk ƀă hiâm mơno “kơbố ai liăn gum liăn, ai hnoăng gum hnoăng”. Tung mê, khu kŏng an rak vế hnoăng cheăng cho ngế ki xiâm tung pơtroh, tŏng gum pro a hên kong pơlê. Mâu tíu cheăng mố đô̆i môi tiah Kuân đoân 34, Ƀinh đoàn 15 hiăng veăng gum tâi tâng vâ chê 40.000 hâi pro, veăng gum pro chiâng mâu toăng hngêi krá kâk, hơtôu pơxúa pơla khu lêng-kuăn pơlê. Đăi tă Khuất Bá Cao, kăn pơkuâ hnê ngăn Đảng, phŏ kăn pơkuâ Ƀinh đoân 15 tối rơdêi:

“Tơdroăng têa tah hngêi tơ’nhiê, xi kơchoh ai pơxúa kal khât xua vâ gum vâi krâ kuăn pơlê, ki hên cho hdroâng kuăn ngo a cheăm ai hngêi ối tơniăn; gum vâi krâ kuăn pơlê mơjiâng thôn pơlê nếo ƀă rak vế tơniăn tơdroăng gâk kring kal kí, tơniăn tung pơlê pơla a cheăm tơkăng kong”.

 ‘Na mâu ngế ki châ tŏng gum, kong pơlê Gia Lai (ton) hiăng pêi pro klêi tâi tâng túa pơcháu gum pro hngêi ối ăm rơpŏng châ tơnêi têa gum, ngế ki ai hnoăng; rơpŏng kơtiê, rơpŏng vâ chê kơtiê. Tơdrêng amê, mâu cheăm ối tơbleăng pro mâu tơdroăng tŏng gum tơdroăng rêh kâ ối, gum kuăn pơlê hluăn ing kơtiê khât tiô túa krá ton. Jâ Ksor H’Phương, kăn pơkuâ hnê ngăn Đảng cheăm Ia Rtô (ton) hneăng hdrối, nôkố cho cheăm Ia Sao tối:

“Klêi kơ’nâi hiăng pêi pro klêi tơdroăng têa tah hngêi tơ’nhiê xi kơchoh a cheăm, ngin pơtối séa ngăn vâ tŏng gum mâu rơpŏng mơnhông cheăng kâ, môi tiah diâp hdrê ro, mơnăn păn ƀă tơdjêp mâu kơxô̆ liăn mung tŏng gum”.

Mâu hâi apoăng khế 7 kố, kong pơlê Gia Lai hiăng têa tah tâi tâng lối 8.100 toăng hngêi gum mâu rơpŏng xơpá, rĕng tâ 2 khế tâng pơchông ƀă túa pơcháu. Kố ôh ti xê cho tíu ki ối tơniăn, mê ối po ăm tơdroăng tơngah ‘na môi tơdroăng rêh ối tơniăn tâ, gum lối rơpâu rơpŏng kuăn pơlê ai hngêi ối vâ mơ-eăm pêi cheăng kâ, séa bâ eăng tơdroăng tơngah ‘na tơdroăng rêh ối tơniăn lĕm tâ. Pôa Rah Lan Chung, phŏ kăn pơkuâ ngăn Đảng, Kăn hnê ngăn Vi ƀan kong pơlê Gia Lai ăm ‘nâi:

“Kố cho tơdroăng pêi ai pơxúa hlê plĕng khât. Mê cho tơkŭm tŏng gum ăm mâu kơtiê, mâu ngế ki châ tơnêi têa gum ƀă mâu ngế ki xơpá tung lâp kong pơlê. Tơdroăng kố hiăng tơ’mot châ mâu khu pơkuâ tơdroăng kal kí, mâu khu râ kăn, mâu kơvâ cheăng, khu lêng kring vế ƀă kuăn pơlê veăng pêi. Xua mê, kong pơlê Gia Lai hiăng ‘mâi rơnêu kơdroh hâi khế pro klêi vâ mơnhên hiăng pro klêi tơdroăng têa tah hngêi tơ’nhiê xi kơchoh a kong pơlê”.