Mrâo anei, mnuih ƀuôn sang Jarai ti ƀuôn Kep 1, să  Ia Ly, čar Gia Lai mkŏ mjing knăm ba yua sang rông mrâo, hlăm ai êwa hơ̆k mơak hŏng ênai čing kwang. Mnuih ƀuôn sang tinei ktưn hưn kơ sang rông dlông, êdah êdi ti krah êa mtah mơ̆ng kphê. Knăm yua sang rông mrâo dưi mkŏ mjing hluê hdră bhiăn mnuih Jarai, hlăm anăn mâo knăm ƀơ̆ng kbao. Khua gĭt gai čar Gia Lai, lu phung tuê leh anăn mnuih ƀuôn sang ƀuôn Kep 1 nao hơ̆k mơak mbĭt. Linh Nga Niê Kdăm - pô ksiêm duah dhar kreh Lăn Dap Kngư brei thâo:

 “Kâo dưi hmư̆ leh dŭm ênhiang jăk êdi mơ̆ng čing Jarai. Anăn jing dŭm ênhiang čing dưi bi êdah hŏng klei hơ̆k mơak êdi. Phŭn dhar kreh ăt mâo nanao hlăm ai tiê mnuih ƀuôn sang ƀuôn Kep 1. Anăn jing klei yuôm bhăn, sĭt mâo wưng, mâo klei găl, pô dưi bi râo dhar kreh yuôm bhăn anăn. Mơ̆ng mnơ̆ng huă ƀơ̆ng, sang dôk, sang msat…truh ti dŭm knăm mơak. Anăn jing dŭm klei năng mpŭ êdi”.

Sang Rông ƀuôn Kep 1 dôk hlăm hdră rŭ mdơ̆ng bruă hiu čhưn ênguê êpul êya să Ia Ly, čar Gia Lai, mâo ênoh duh bi liê êbeh 12 êklai prăk, hŏng lu mta phŭn, hlăm anăn mâo sang krum, sang msat, pin êa, êlan klông hŏng dŭm ƀuôn jĕ giăm. Tinei, phung tuê dưi dlăng dŭm mta mnơ̆ng dhar kreh, hƀuê ênuk, dhar kreh. dei Khang - sa čô hriăm gưl prŏng bruă Hiu čhưn ênguê, sang hră gưl krah Gia Lai wĭt hriăm bruă ti ƀuôn, hŏng bruă klam jing pô atăt tuê brei thâo:

 “Kâo hưn mdah hŏng phung tuê ksiêm hriăm kơ dhar kreh mnuih Jarai jăk êdi. Kâo atăt phung tuê nao dlăng pin êa, dlăng phung amai adei nao djăp êa, lač kơ diñu thâo phung mniê Jarai thâo pơ̆k mñam, êkei thâo mñam bŭng, êi. Êjai ruah mô̆, pô êkei dlăng kơ giêt êa jŭ boh giêt leh anăn blah mnal pơ̆k mñam boh mnga siam srăng mă jing mô̆. Phung mniê dlăng kơ êkei thâo mñam bŭng, mñam êi čiăng ruah ngă ung. Êngao kơnăn kâo čiăng mtô kơ phung tuê thâo lu hĭn kơ klei hdĭp đưm mơ̆ng mnuih ƀuôn sang Jarai”.

Ƀuôn Kep 1, să Ia Ly, čar Gia Lai jing anôk phung tuê dưi ƀuh ênŭm knhuah dhar kreh mơ̆ng mnuih Jarai. Rčom Xuân - Khua bruă phung mniê ƀuôn Kep 1 brei thâo, mơ̆ng thŭn 2026, ƀuôn pŏk mlar thiăm đa đa bruă ktuê dlăng dhar kreh Jarai. Phung tuê amâo djŏ knŏng nao dlăng ti sang Rong dlăng dŭm mta mnơ̆ng rang mdah ƀiădah dưi grăp boh sang mnuih ƀuôn sang čiăng lông mă bruă knuă, tŭk mkra dŭm mta mnơ̆ng ƀơ̆ng knhuah gru mơ̆ng mnuih Jarai:

“Phung tuê hriê čuă dlăng diñu hưn êlâo dŭm mta mnơ̆ng ƀơ̆ng knhuah gru, hmei bi mbha tŭk knă. Phung tuê mơ̆ng kbưi hruê, hmei drông hơ̆k mơak, hưn mdah kơ phung tuê kơ ƀuôn sang, kơ hdră bhiăn, klei hdĭp mnuih ƀuôn sang. Kyua mâo phung tuê mơ̆ng djăp anôk đru mđĭ hnư hrui wĭt kơ phung amai adei ngă bruă hiu čhưn ênguê, mbĭt hŏng bruă čhĭ mnơ̆ng mkăn ăt mâo hnư hrui wĭt. Phung tuê hriê dlăng dŭm knăm sang msat, amâodah klei djiê brŭ, tông čĭng, kdŏ čhuang, amâodah nao hma, pĕ djam, tŭk knă. Hluê anăn phung tuê ƀuh jăk êdi, hmei ăt ƀuh hơ̆k mơak mơh”.

Kbưi hŏng ƀuôn Kep 1, să Ia Ly hlăm brô 15km ti êlan dơ̆ng mrô 661 jing truh ti ƀuôn Mrông Yô̆ 1, să Ia Phí, čar Gia Lai. Hlăm wăl anôk êđăp ênang ƀuôn sang, phung tuê dưi hmư̆ ênai brô̆ Dung mơ̆ng phung thâo mbruă, mduôn ƀuôn Rơ Châm Nha leh anăn dŭm klei yăl dliê jăk kơ dhar kreh mnuih Jarai. Giăm 85 thŭn, ñu ăt adôk êngăl, ñu amâo djŏ knŏng mkra mjing, rang mdah kdrăp pĕ tông djuê ana ƀiădah lŏ jing pô yăl dliê khan kơ mnuih ƀuôn sang hlăm ƀuôn leh anăn phung tuê hmư!

“Ară anei dhar kreh jing mnơ̆ng dhơ̆ng bruă hiu čhưn ênguê, kyuanămn êjai grăp blư̆ phung tuê hriê, pô srăng drong, rang mdah kơ phung tuê, bi êdah klei hdĭp đưm mơ̆ng mnuih Jarai si jing. Dhar kreh phŭn mơ̆ng mnuih Jarai msĕ si čing, đĭng gông, đĭng buôt, brei kơ phung tuê dlăng. Đa đa čing, anei jing Bró Amâm, Bró Ót, Brŏ Dung, Ting ning, Đing Glơih... Phung tuê hriê dlăng, drei drông, dăp djăp dŏ mâo, iêo huă ƀơ̆ng, leh anăn pô pĕ tông kơ phung tuê dlăng, hưn mdah dŭm kdrăp pĕ tông djuê ana, đa đa brei tuê lông yua, lông tông mbĭt

Mnuih Jarai ti ƀuôn Mrông Yô̆ 1, să Ia Phí adôk djă pioh sang krum đưm. Lu gŏ sang dôk ngă bruă pơ̆k mñam leh anăn hur har nao hgŭm hlăm klei tông čing. Êjai mmông wăn, phung mniê lŏ dôk pơ̆k mñam, mkŏ mjing dŭm boh mnga dhar kreh nao mbĭt hŏng klei hdĭp leh anăn klei đăo. Bi hŏng phung êkei ăt ngă bruă hrĭ mñam, krah rup leh anăn mtô kơ phung mda asei. Aduôn Rơ Châm H’Ken – k’iăng khua adŭ bruă Đảng să Ia Phí, čar Gia Lai klam ngă khua êpul bruă hiu čhưn ênguê êpul êya să Ia Phí, khua kiă kriê êpul bi hgŭm bruă pơ̆k mñam ƀuôn Mrông Yô̆ 1 brei thâo:

 “Mnuih ƀuôn sang buh pla, mtâo briah mdiê, hrui pĕ djam mtam jing boh mnga doh leh anăn brei kơ phung tuê ƀơ̆ng amâodah blei ba wĭt. Mnơ̆ng dhar kreh jing bruă hrĭ mñam čiăng mkra bŭng êi, knguôr, lip mơ̆ng kngan phung êkei. Bi dŭm blah mnal, kdô djă pơ̆k mñam mơ̆ng phung mniê mñam ti sang leh anăm êpul bruă hiu čhưn ênguê yang ƀuôn mơ̆ng ƀuôn. Kyua mâo phung tuê hruê dlăng, phung amai adei mâo hnư hrui wĭt leh anăn bi mbha kơ hdơ̆ng pô. Êngao kơnăn lŏ mâo dŭm mta mnơ̆ng ƀơ̆ng knhuah gru, êpul tông čing - kdŏ čhuang mjĕ mjing hŏng phung tuê mâo hnư hrui wĭt sơăi”.

Mơ̆ng anôk tông čing, sang rông truh kơ bruă pơ̆k mñam, hrĭ mñam leh anăn dŭm knăm mơak knhuah gru, dhar kreh mơ̆ng mnuih Jarai dưi bi râo, mđĭ lar jing dŭm mta mnơ̆ng hiu čhưn ênguê êpul êya. Amâo djŏ knŏng mdei hŏng dŭm mta bruă mơ̆ng Thŭn hiu čhưn ênguê ala čar ti Gia Lai, êlan nao anei dôk pŏk hdră duh ƀơ̆ng hơĭt kơ mnuih ƀuôn sang, êjai diñu jing phŭn djă pioh, hưn mdah leh anăn pŏk yua boh tŭ dhar kreh pô./.