Ti să Thanh Yên, knăm khăm bản – knăm mơak sač êa mơ̆ng mnuih djuê ana Lao dưi mkŏ mjing amâo djŏ jing hdră klei mĭn đăo akŏ thŭn, ƀiădah ƀrư̆ ƀrư̆ dưi mkŏ mjing hluê hdră kluôm ênŭm hĭn mguôp hŏng bruă hưn mthâo kơ hdră hiu čhưn ênguê. Knăm mơak lŏ bi êdah wĭt dŭm klei bhiăn djuê ana mơ̆ng đưm msĕ si ngă yang akâo kơ mnguh mngăt, kă mrai ti kngan, ngă yang êa… jiă knhuah klei hdĭp, ai tiê klei mĭn mơ̆ng êpul êya. Amai Nguyễn Thị Nguyệt, mnuih ƀuôn sang ƀuôn hgŭm Điện Biên Phủ, čar Điện Biên brei thâo:

Gưl tal êlâo dưi thâo lehanăn nao ti knăm mơak sač êa ti Thanh Yên, khădah êlan kbưi dleh dlan ƀiădah truh tinei kâo ƀuh jăk êdi, mơak êdi dlăng lehanăn kâo ƀuh tơdah knăm mơak anei dưi mkŏ mjing nanao snăn mnuih ƀuôn sang srăng mâo tač hlăp jăk čiăng kriê pioh knhuah dhar kreh djuê ana mơ̆ng mnuih Lao”.

Trần Thế Hoàn, Kơiăng khua Anôk bruă sang čư̆ êa să Thanh Yên, čar Điện Biên brei thâo, mơ̆ng klei čang hmăng mơ̆ng mnuih ƀuôn sang hlăm bruă mđĭ lar boh tŭ yuôm dhar kreh lehanăn klei čiăng tui ksiêm mơ̆ng phug tuê hiu čhưn ênguê, bruă knŭk kna să Thanh Yên dôk tă hdră ba knăm mơak anei jing sa hdră hiu čhưn dhar kreh ai tiê klei mĭn mdê hjăn, siă suôr hŏng bruă kriê pioh knhuah gru amâo êdah klă ti alŭ wăl.

Anôk bruă sang čư̆ êa să mâo hdră kčah kriê pioh lehanăn mđĭ lar dŭm boh tŭ yuôm jăk siam mơ̆ng knăm anei čiăng jing knhuah dhar kreh lehanăn knhuah gru amâo êdah klă jăk siam mơ̆ng să. Anei dưi bi mklă jing bruă phŭn hlăm hdră kčah kriê pioh knhuah gru dhar kreh amâo êdah klă ti alŭ wăl hlăm wưng ti anăp.

Ƀuôn hgŭm Mường Lay jing anôk bi mklin wăl anôk dhar kreh mơ̆ng mnuih Thái Kô̆ ti djiêu krông Đà Giang, gru hmô hiu čhưn ênguê êpul êya dôk brei ƀuh boh tŭ klă sĭt. Dŭm boh sang krum djuê ana đưm amâo djŏ knŏng jing anôk hdĭp mda, ƀiădah lŏ jing anôk mdei săn, đih đăm, dŭm mmông huă ƀơ̆ng aguah tlam jing leh anôk tui ksiêm mnơ̆ng ƀơ̆ng; dŭm ênhiang kdŏ xòe, klei bhiăn klei mưng jing leh hdră dhar kreh mkăp kơ tuê hiu čhưn ênguê. Amai Lò Huyền Giang, mnuih ƀuôn sang ƀuôn Chi Luông 1, ƀuôn hgŭm Mường Lay, čar Điện Biên brei thâo, klei hgŭm klă anăp mơ̆ng mnuih ƀuôn sang lehanăn hdră hiu čhưn ênguê mjing leh hnư hrui wĭt hơĭt kjăp.

Tơdah nao hgŭm hlăm hdră hiu čhưn ênguê êpul êya, kâo hŏng gŏ sang mâo leh hnư hrui wĭt kjăp mơ̆ng bruă drông tuê, tŭk knă mnơ̆ng ƀơ̆ng lehanăn hưn mthâo mnơ̆ng jăk alŭ wăl. Mbĭt anăn, kâo ăt dưi hriăm lu klei thâo hlăm klei blŭ hrăm drông tuê, ngă bruă hiu čhưn ênguê. Mơ̆ng anăn, kaoa ƀuh ktưn hưn dưi đru mguôp kriê pioh, hưn mthâo dhar kreh djuê ana pô truh hŏng ƀĭng găp hlăm lehanăn êngao ala čar.

Ayŏng Lường Văn Muôn, Khua ƀuôn hiu čhưn ênguê êpul êya Phiêng Lơi, ƀuôn hgŭm Điện Biên Phủ, čar Điện Biên brei thâo, dŭm mta mnơ̆ng ƀơ̆ng djuê ana mơ̆ng mnuih Thái, boh nik mnơ̆ng ăm mâo mnuih ƀuôn sang hlăm ƀuôn mkra jing mta mnơ̆ng jăk êdi, mơ̆ng hdră mkra truh kơ dăp, đru mđĭ hnơ̆ng tŭ jăk, jăk iêu lu tuê hiu chưn hriê tui ksiêm lehanăn hriê dôk tinei.

Hŏng dŭm mta mnơ̆ng hlăm ƀuôn ară anei hmei dôk mkra jăk êdi, boh nik mnơ̆ng ƀơ̆ng mnuih djuê ana Thái. Boh nik, brei mđing lu hĭn kơ mnơ̆ng ăm čiăng mkăp kơ tuê hiu čhưn. Lu mnuih hriê ƀơ̆ng diñu khăp sơaĭ.

Sa hlăm dŭm klei bi mlih năng mđing hlăm hdră ngă bruă hiu čhưn ênguê ară anei mơ̆ng čar Điện Biên jing bruă bi mlih dŭm hdră ngă bruă, hdră dhar kreh mơ̆ng wăl anôk phŭn truh kơ dŭm krĭng ƀuôn sang. Kyua anei jing anôk dôk djă pioh ênŭm lehanăn klă sĭt dŭm boh tŭ yuôm dhar kreh mbĭt anăn mjing klei găl kơ mnuih ƀuôn sang dưi nao hgŭm hlăm hdră hiu čhưn ênguê. Hluê si Trần Hải Hà, Khua knơ̆ng bruă Dhar kreh, mjuăt ktang asei mlei lehanăn hiu čhưn ênguê čar Điện Biên êjai, hdră anei amâo djŏ knŏng mđĭ klei tui ksiêm kơ phung tuê hiu čhưn, ƀiădah lŏ đru kriê pioh, mđĭ lar đru kơ mnuih ƀuôn sang tinei jing pô phŭn kriê pioh, ba yua dŭm boh tŭ yuôm dhar kreh pô.

Hlăm bruă mkŏ mjing dŭm hdră dhar kreh, hmei mkŏ mjing lu hĭn ti dŭm ƀuôn hiu čhưn ênguê êpul êya, ƀuôn dhar kreh čiăng mjing klei găl kơ dŭm ƀuôn hiu čhưn ênguê, ƀuôn dhar kreh, pô HomeStay mâo klei găl kơ bruă, hưn mthâo lehanăn mdid\ kyar bruă hiu čhưn ênguê ti ƀuôn sang pô. Phung tuê truh tinei, diñu mâo klei găl dưi tui ksiêm kơ dhar kreh, mnơ̆ng ƀơ̆ng, srăng mâo klei sa ai lu hlăm phung tuê.

Dŭm klei bi mlih mơ̆ng hdră hiu čhưn ênguê Điện Biên dưi bi êdah klă mơ̆ng dŭm mlan akŏ thŭn 2026, alŭ wăl drông hlăm brô 550 êbâo čô tuê, đĭ giăm 30% mkă hŏng wưng anei thŭn êlâo. 72 thŭn leh Hruê mblah tŭ dưi Điện Biên Phủ, ai êwa ktưn hưn hƀuê ênuk ăt dôk lar bra, jing leh anôk jưh knang ai tiê klei mĭn čiăng kơ Điện Biên hruê anei đĭ kyar hĭn. Hlăk dŭm boh tŭ yuôm dhar kreh djuê ana dưi ƀrơ̆k mdh, kriê kjăp lehanăn mjing hdră hiu čhưn ênguê mdê hjăn, krĭng lăn tuôm jing kdrăn mblah ktang phĭt ênuk đưm ară anei ƀrư̆ dưi mñă klă kơhưm jing anôk truh jăk siam, jiă knhuah gru djuê ana./.