Hlue si Knơ̆ng bruă Dhar kreh, mjuăt asei mlei leh anăn hiu čhưn ênguê čar Lâm Đồng, hlăm 4 hruê mdei (30/4 – 3/5), kluôm čar đăo tĭng drông hlăm brô 620.000 gưl tue, đĭ 21 mkă hŏng wưng thŭn 2025; hlăm anăn tue ala tač êngao hlăm brô  21.000 gưl. Ênoh hrui wĭt mâo hlăm brô 1.420 êklai prăk. Hnơ̆ng tue đĭ ktang mơ̆ng akŏ yan mdei, lu anôk hiu čhưn ênguê leh anăn anôk dôk jưh ngă bruă jih hnơ̆ng. Hnơ̆ng adŭ dôk jưh kah knar mâo 70 – 80%, hjăn sang jưh 3 – 5 mtŭ mâo 85 – 96%, mâo wưng jih adŭ. Dŭm alŭ wăl, anôk bruă duh mkra, hiu čhưn ênguê pral mđĭ hdră bruă, lu jơr mnơ̆ng dhơ̆ng; bruă rơ̆ng kơ klei êđăp ênang, wăl hdĭp mda, hơĭt ênoh dưi hlue ngă hrăm mbĭt. Mơ̆ng anăn, lŏ dơ̆ng bi mklă ai iêô jak mơ̆ng hiu čhưn ênguê Lâm Đồng, mđing kơ mđĭ kyar hơĭt kjăp leh anăn mđĭ hdră bruă hiu čhưn ênguê.

Hluê si Knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak, hlăm 4 hruê mdei 30/4 – 1/5, hnư hrui wĭt mơ̆ng bruă hiu čhưn ênguê mơ̆ng čar mâo 347 êklai prăk, đĭ giăm 19% mkă hŏng thŭn 2025.

Boh tŭ dưn anei mâo mơ̆ng bruă hluê ngă dŭm hdră mtrŭt mđĭ, nao mbĭt hŏng dŭm mta bruă dhar kreh - hui čhưn ênguê jăk êdi. Êdah êdi mâo dŭm hdră msĕ si mđĭ kpŭng đung hŏng êwa čuh, anôk tông čing, mnơ̆ng ƀơ̆ng knhuah gru leh anăn rang mdah klei tŭ mkra kan ngừ êa ksĭ… đru mkŏ mjing ai iêo jak kơ Dak Lak.