Ti alŭ wăl čư̆ čhiăng nah yŭ čar Quảng Ngãi, mnuih ƀuôn sang dŭm djuê ana mkŏ mjing knăm bi hdơr kơ hrue mtao Hùng Vương djiê, wĭt kơ phŭn agha djuê ana, mâo leh lu phung tue nao hgŭm. Mbĭt hŏng klei hiu dlăng lănmnga êa mơal, hiu dlăng dŭm dhar kreh djuê ana tinănlu phung tue mkiêt mmông đĭ nao kơ sang yang bi hdơr kơ mtao Hùng, msĕ si ti sang yang Lương Khế hlăm ƀuôn hgŭm Kon Tum, sang yang Tháp Kỳ Quang, ƀuôn hgŭm Đăk Hà, mđrăm mbĭt hŏng mnuih ƀuôn sang čuh diăn, lehanăn brui mngưi bi hdơr kơ phŭn agha djuê ana.  Amai Y Kha, ti ƀuôn hgŭm Đăk Mar, brei thâo:

 “Hmei hriê mdah klei tông čing čhar, kdŏ čhuang, lehanăn bi hdơr kơ aê aduôn atâo atiêt mâo leh ai tiê rŭ mdơ̆ng ƀuôn sang lăn čar.”

Ti knhuah gru dhar kreh sang yang  Đình Lạc Giao, ƀuôn hgŭm Buôn Ma Thuột, bruă sang čư̆ êa lehanăn mnuih ƀuôn sang čar Daklak mkŏ mjing klei bi hdơr kơ hrue djiê Hùng Vương kñăm bi hdơr kơ ai tiê phung mtao Hùng mâo leh bruă knuă rŭ mdơ̆ng lăn čar. Knăm mkŏ mjing mâo ngă hŏng klei kdrăm k’ah hlăm ênai hgơr, ênai čing hlue knhuah đưm, čuh brui mngưi myơr mnơ̆ng ngă yang mơ̆ng mnuih ƀuôn sang hlăm čar Daklak; hưn mdah, yăl dliê kơ hƀuê ênuk klei jhŏng ktang djuê ana. Tinei lŏ dơ̆ng mâo dŭm bruă msĕ si čih klei duê hŏng boh hră đưm, hưn mdah mnơ̆ng ƀơ̆ng djuê ana, mdah klei mmuiñ chèo, quan họ, bi lông pĕ brô̆ tính, mmuiñ then… lehanăn rang mdah dŭm mta mnơ̆ng  OCOP mơ̆ng čar Đắk Lắk.

 Ti sang yang Âu Lạc dlông čŏng čư̆ Phượng Hoàng hlăm alŭ wăl knhuah gru hiu čhưn ênguê drai Prenn Đà Lạt, čar Lâm Đồng kdrăm k’ah mkŏ mjing knăm bi hdơr kơ mtao Hùng Vương, mâo lu tue lehanăn mnuih ƀuôn sang nao hgŭm. Leh knăm ngă yang, phung khua kiă kriê, lehanăn mnuih ƀuôn sang čar Lâm Đồng mbĭt hŏng lu phung tue bi nao čuh brui mngưi bi hdơr. Tinei lŏ mâo dŭm bruă ngă mdah klei kdŏ muin hlue ênhiang djuê ana, mâo dŭm klei hlăp msĕ si  cờ tướng, đĭ gơ̆ng prăi, čăm gŏ lăn, rang mdah mnơ̆ng ƀơ̆ng huă, hưn mdah klei mnăm êa čê Việt Nam, čih klei duê hŏng boh hră đưm, lehanăn yuôl mdah rup... lŏ kơrŭ wĭt knhuah gru dhar kreh djuê ana.

Ti sang yang mtao Hùng hlăm krĭng knông lăn Tuy Đức, čar Lâm Đồng, mnuih ƀuôn sang djăp djuê ana kdrăm k’ah mkŏ mjing klei bi hdơr kơ Mtao Hùng Vương. Sang yang anei mâo mnuih ƀuôn sang mơ̆ng Phú Thọ rŭ mdơ̆ng mơ̆ng thŭn 2018 hlăm anôk prŏng êbeh 2.100 m² . Anei jing leh anôk mâo lu bruă ngă bi hdơr kơ phung agha, kriê pioh, lehanăn mđĭ bi lar klei thâo bi mguôp djuê ana ti knông lăn. Chử Anh Chương, mnuih hlăm êpul kiă kriê sang yang mtao Hùng ti Tuy Đức, brei thâo:

 “Jih jang mnuih bi wir kơ phŭn agha, mnuih ƀuôn sang mâo klei thâo săng jing: “khădah hlei pô ti anôk nao, hrue kơ hruê phung mtao djiê hrue 10 mlan 3 wĭt sơăi’. Mnuih ƀuôn sang mâo klei mĭn msĕ snăn.”

Hrue anei, mnuih ƀuôn sang mơ̆ng Phú Thọ hlăk dôk hdĭp hlăm dŭm boh ƀuôn hgŭm nah yŭ čar Gia Lai hlăk bi nao truh kơ sang yang mtao Hùng ti ƀuôn hgŭm Pleiku, bi hdơr, ngă yang.

Tinei, lŏ mâo klei bi hdơr kơ phŭn agha, mnuih ƀuôn sang lŏ bi mtă mtăn hdơ̆ng găp hlue gưt hdră êlan mơ̆ng Đảng, knŭk kna lehanăn bi ktuh êyuh rŭ mdơ̆ng klei hdĭp mda gŏ sang pô, rŭ mdơ̆ng dhar kreh alŭ wăl pô dôk. Đỗ Xuân Thu, Êpul bi mjĕ êrô jih jang mnuih mơ̆ng Vĩnh Phú ti čar Gia Lai brei thâo:

“Grăp thŭn hmei mkŏ mjing klei bi hdơr kơ mtao Hùng, mtao kơ jih jang djuê ana Việt Nam. Hmei myưng m’ang kyua pô jing mnuih mơ̆ng lăn phŭn, bŏ hŏng klei hơ̆k mơak.”