Ti gŭ êyui kyâo hlăm tač sang bi kƀĭn êpul êya ƀuôn Ky, ƀuôn hgŭm Thành Nhất, čar Dak Lak, ênai rĭng rai mñê ktang tĭt. Mơ̆ng aguah ưm, phung hlăm ƀuôn mâo ƀô̆ mta ênŭm ênap čiăng mprăp klei ngă yang akâo hjan. Pô dăp mnơ̆ng ngă yang, pô êmiêt anôk ngă yang, pô lŏ hriăm tông čing, kdŏ čhuang. Ayŏng Y Zoang H’Đơ̆k, sa čô ti ƀuôn Ky brei thâo, êlâo kơnăn dŭm hruê, phung mduôn khua hlăm ƀuôn leh anăn phung êkei êdam mprăp djăp leh mnơ̆ng yua leh anăn bi mdơ̆ng pưk leh anăn mkra dŭm mta rup bi hmô kơ klei ngă yang: “Nao hlăm klei ngă yang ƀuôn pô mkŏ mjing, jih jang bi hrăm mbĭt, mâo mnơ̆ng mguôp mnơ̆ng mâo ai đru ai čiăng bi leh klei ngă yang”.

Truh mmông jăk, bruă mprăp ăt bi leh, mnuih ƀuôn sang hlăm kdrăp djuê ana, ênŭm ênap ti tač sang êpul êya. Ênai čing čhar kwang, knăm ngă yang mphŭn pŏk. Knăm ngă yang mâo dua kdrêč: akâo adiê hjan leh anăn ngă yang asei kơ khua mduôn. Pô riu yang ngă klei bhiăn djuê ana, mơĭt klei riu yang kơ phung yang, akâo kơ adiê hjan, yan boh mnga jăk siam.

Khua mduôn Y Bang Byă, pô dưi ngă yang asei hlăm  hdră brei thâo, klei ngă yang asei amâo dưi kƀah ôh hlăm klei bhiăn mnuih Êđê, akâo kơ phung dưi riu yang leh anăn phung nao hlăm knăm mơak srăng mâo lu klei suaih pral, myun leh anăn êđăp ênang.

 “Hruê anei jing hruê akâo adiê hjan, ăt jing hruê ngă yang asei kơ khua mduôn. Anăn jing klei myun kơ kâo pô, čang hmăng mâo klei suaih pral kơ thŭn êdei ngă jăk hĭn klei bhiăn djuê ana pô, mă bruă kơ mnuih ƀuôn sang”.

Leh kdrêč ngă yang, dŭm bruă pla mjing lŏ dưi mkŏ mjing, mơ̆ng pla mjing truh kơ hiu lua mnah. Rup adiê hjan dưi mjing hlăm knăm msĕ si sa klei mơĭt klei čang hmăng kơ sa yan mrâo êđăp adiê hlĭm hjan, boh mnga jăk siam.

 Klei ngă yang mjưh ruĕ, kdrêč mơak lŏ mkŏ hŏng klei kdŏ mmuñ, mnăm kpiê čeh leh anăn bi huă ƀơ̆ng mbĭt. Ai êwa ƀuôn sang thiăm klei mơak mñai, bi mguôp. Amai H Zê Na Byă, mnuih ƀuôn sang hlăm ƀuôn lač: “Hruê anei jing sa hruê mơak leh anăn yuôm bhăn snăk. Hlăm ai êwa mơak mñai hŏng klei kdŏ, hŏng ênai čing čhar. Hlăm ênuk đĭ kyar kdrăp mrâo ară anei hŏng dŭm kdrăp tông ayŭ mdê mdê, snăn knhuah gru anak Êđê brei dưi kriê pioh kơ ênuk êdei msĕ si hmei leh anăn dŭm ênuk mkăn mơh”.

 Hlăm ai êwa mơak mñai mơ̆ng knăm mơak, tue hiu čhưn hlăm ala čar leh anăn ala tač êngao ăt ênưih hlai hlue si ênhiang kdŏ čhuang, ênai čing leh anăn mnâo kpiê čeh hơuh mđao ƀuôn sang. Knăm ngă yang amâo lŏ jing sa klei bhiăn klei đăo mdê mnuih ƀuôn sang ôh, ƀiădah jing wăl pŏk mlar kơ mnuih ƀuôn sang leh anăn tue hiu čhưn ƀuh êlam hĭn kơ klei hdĭp dhar kreh anak Êđê.

Antonie, tue hriê mơ̆ng čar Prăng, nao hlăm knăm ngă yang akâo hjan ti ƀuôn Ky hlăm gưl anei. Dŭm ênhiang čing čhar, êa mil kdrăp djuê ana leh anăn ai êwa bi mguôp êpul êya ba leh kơ ñu sa klei jăk siam. “Kâo mĭn  anei jing sa klei bhiăn jăk siam snăk. Kâo hmư̆ leh lu klei mmuñ jăk, lu klei kdŏ siam, mnuih ƀuôn sang hơô kdrăp djuê ana mdê hjăn snăk. Kâo bi mĭn mnuih  Êđê ti alŭ wăl jăk snăk. Kâo ƀuh khăp snăk kơ knăm mơak anei.”

Giăm pluh thŭn êgao, knăm akâo hjan dưi lŏ mkŏ mjing grăp thŭn ti ƀuôn Ky hlăm knhal jih mlan 3 amâodah mlan 4. Ti krah ai hdĭp mrâo mrang, čiăng mđĭ lar nanao klei bhiăn anei jing klei gĭr mơ̆ng jih êpul êya leh anăn bruă sang čư̆ êa alŭ wăl.

Hlue si Nguyễn Đình Tâm, Khua Knơ̆ng bruă sang čư̆ êa ƀuôn hgŭm Thành Nhất, tơdah wăl dhar kreh ƀrư̆ hruê ƀrư̆ điêt, bruă kriê pioh klei bhiăn sui thŭn mơ̆ng mnuih ƀuôn sang brei mâo klei hrăm mbĭt, đru klă klơ̆ng hĭn mơ̆ng alŭ wăl. Kyua anăn, ƀuôn hgŭm Thành Nhất dôk grăp knhuang hŏng mnuih ƀuôn sang mkŏ mjing hdră kčah sui čiăng mđĭ lar klei bhiăn djuê ana, mbĭt anăn mkŏ hŏng dŭm bruă ngă dhar kreh - hiu čhưn ênguê. Nguyễn Đình Tâm brei thâo: “Ƀuôn hgŭm ăt bi mklă mâo hdră kčah sui hĭn čiăng êdei aneo bi mguôp, mkŏ knăm mơak, klei bhiăn. Mơ̆ng dŭm hdră, dŭm hla pŏk web ala ƀuôn čiăng mkŏ mjing grăp gưl mđĭ lar, kriê pioh leh anăn mđĭ kyar hiu čhưn ênguê alŭ wăl.”

Mjưh ruĕ hŏng ênai čing kwang leh anăn mnâo kpiê čeh ƀâo mngưi, knăm ngă yang akâo hjan ti ƀuôn Ky amâo djŏ knŏng mơĭt klei čang hmăng kơ adiê hlĭn hjan jăk ôh, ƀiădah lŏ mñă hdơr kơ phŭn agha anak Êđê. Hlăm klei hdĭp hruê anei, ênai čing ti ƀuôn Ky amâo djŏ knŏng akâo adiê hjan ôh ƀiădah lŏ iêô wăt klei bi hdơr kơ phŭn agha.