Nar 7/5, ta phường Buôn Ma Thuột, n’gor Dak Lak, Ban Tuyên giáo n’hanh Dân vận Trung ương kan nsum Bộ Công an, Bộ Dân tộc n’hanh Tôn giáo ndrel Tỉnh ủy Dak Lak ƀư tâm nchră đăm gĭt jru, an ƀư ăp siƀŭt njuăl bah Ban Bí thư mpeh pah kan rnoi mpôl đê̆, chroh rƀŭn tâm rơh mhe.

Tâm nchră rgum n’hao nău gĭt êng, nău dơn kan bah gưl ủy, mpôl kan đảng tâm rđău đă, tĭng ƀư pah kan rnoi mpôl đê̆, nchroh rƀŭn nkre đah hun hao wăng sa- rêh jêng kon nuĭh, rnă njrăng neh dak, đăp mpăn n’hanh mât nâp đăp mpăn chính trị. Lah ta rnôk rđău đă, wa Phạm Tất Thắng, Ủy viên Trung ương Đảng, Groi Kruanh Ban Rnâng kan Ban Tuyên giáo n’hanh Dân vận Trung ương lah rjăp, pah kan rnoi mpôl đê̆, chroh rƀŭn lah nkô̆ nău têh jong, rgop rdâk nâp tay tâm rnglăp rnoi nuĭh. Ăp gưl, n’gâng kan ân ơm ƀư jêng ngăn ngăn bôk nău kan, ntik n’hao nău khlay kan nuĭh geh nsing nơm, kruanh chroh, nuĭh kơl kan chroh rƀŭn tâm rgŏ jă nsum mpôl.