Điện Biên Phủ-qơư jông trâu tsôngv kruô tuôx ndis seiz têx qơư tir ntâuk tros châuz thâuv ntêx

Trôngz A1-Iz hâur têx qơư cuz nxor yax hâur cxiv tsav tir ntâuk tros châuz thâuv ntêx, têx hnuz hâur hlik hli 5 no, yênhx paz yênhx kruô siz txuôk jưk tuôx ndis shuôs têz qơưk uô si, seiz chor qơư tir ntâuk tros châuz đrav ntêx ntơư. Phạm Diệu Linh, shux xênhz khoa Sư phạm, tsêr cơưv Đại học Hải Phòng heik: Jiês xuz thơưx tuôx txos trâu qơư tir ntâuk tros châuz thâuv ntêx, iz lênhx hluôk nênhs tưz jêik tsi tâu cêr shir phaz, jông siêz thiêz uô tsâus ntâu txos chor lâul thâuv ntêx têx côngz đas jos lox tir ntâuk tros châuz tsưx phưv têz qơưk:“Thâuv cur sơưr nhoz ntơưv no, chuôs li cur pov thiêz pâuz tâu tsênhz chor lâul thâuv ntêx têx cêr txov, phiv liv, sir jos tsưx phưv têz qơưk chiê pêz muôx tâu qơư nhoz truôx li niêx hnuz nhiv no. Chênhr viv li, cur zos iz lênhx shux xênhz, cur chos luk zuôr sir jos cơưv txux chi cov tiêr chiê yênhx lênhx cưk kriê ntơưr, sir jos kriê têx txux chi, tsưr ziv trâu nhuôs shux xênhz”.

Đros thiêz chor tuz lênhv lâul-têx lênhx tưz muôx jiês tâu đros tir ntâuk tros châuz, tror tuôx txos Điện Biên tsi tiêk seiz shuôs đuô têx qơư tir ntâuk tsav thâuv ntêx, tsênhv khav tinhv têx muôx grik thiêz jông hâur ntu têz qơưk truôx tuk tưz tâu chor tuz lênhv, têx lâul thâuv ntêx sir đas jos, trox nyar tir ntâuk tros châuz, tsưx phưv têz qơưk. Zơưv Lê Văn Huynh, tuz lênhv lâul tỉnh Hưng Yên shir phaz heik:“Tror nthuôr uô đuô têx cêr tir ntâuk tros châuz Điện Biên Phủ mak cur pov lok six jông siêz thiêz shir phaz lok chor tuz lênhv thiêz pêz tsôngv pêx xênhv Việt Nam têx sik thôngx siêz, tsưr ziv sir tir ntâuk zênhx tros châuz Điện Biên Phủ”.

Đros trâu ntâu lênhx kruô, tuôx Điện Biên Phủ tsi zos tuôx uô si, tsênhv zos ndo txos chor lâul, tuz lênhv thâuv ntêx têx côngz đas jos lox tir ntâuk tros châuz tsưx phưv têz qơưk. Zơưv Phan Quang Tuấn, nhoz tỉnh Quảng Nam thiêz zơưv Nguyễn Xuân Thân nhoz đrôngs Hà Nội tuôx heik:“Cur lok six shir phaz lok têx hâux lưv chor lâul thâuv ntêx uô tâu, tir ntâuk zênhx tros châuz Điện Biên Phủ, uô ntiêx têz kênhs gơưk, cxuô lênhx cxuô tus pâuz txos. Đhâu têx đuôz xik mêk txos trâu tsênhv tsênhz ntơưv Điện Biên Phủ, cur pov Điện Biên Phủ nhiv no huôv tsar, hlôngr yiêz lok six jông. Sâu jênhv, ndo txiêx njis txos chor lâul têx côngz đas jos lox, tưz sir jos tir ntâuk zênhx tros châuz, tsưx phưv truôx têz qơưk li nhiv no".

“Jiês no tuôx, cur pov Điện Biên Phủ hlôngr yiêz lok six ntâu, đrôngs huôv tsar jông thiêz cxuô tsar zav hlôngr yiêz, txơưr tas lok six ntâu trơưk ntu têz qơưk huôv tsar. Ciês ntơưv trôngz A1 no, lok sik jê no kror tâuz Đờ cát cur nhiv kruôr tror muk ndis seiz mak cux cxiv kho, uô đuô iz cxiê têx cêr tir ntâuk tros châuz thâuv ntêx, heik lol Đảng, têz qơưk cêr moz siêz txos thiêz cxơưz ju lix huôv tsar, jông đuô”.

Chiê phưx vưv ntâu tus chôngz lênhx kruô tuôx ndis seiz têz qơưk uô si hâur ntu no, tỉnh Điện Biên tưz fuô uô ntâu hâux lưv piêr kriê têx đuôz, chuôz zênhx, ntâuz ntơưr uz no heik lol Đại tướng Võ Nguyên Giáp, cxiv tsav tros Điện Biên Phủ ntơưv qơư por hưv tsês chiê iz cxiê qơư di tích. Têx txux chi vênhx huôv côngv thôngx li: Nthuôr uô cêr lov jêv tâus cêr, tso đuôz xik mêk, muk lol yax kriê hâur thax tsav….cux tâu fuô uô, muôz cêr lov jêv, hu zâuv chôngz lênhx ntâu tus pêx xênhv thiêz tsôngv kruô cxaz chuôz.

Trơưk li thôngz sâu, txix hnuz 25/4 txos hnuz xiêz 03/5, tưz muôx 75 cxênhz ntâu lênhx kruô tuôx ndis shuôs têz qơưk uô si ntơưv tỉnh Điện Biên, tsar ndê ntâu đuô pir li shông uô ntêx; hâur co muôx 14.500 lênhx kruô tuôx nhoz, so, xav hur si phênhv sâu txix ju lix tax 122 tyv đeiv. Têx li heik co ziv khav tinhv ju lix lịch sử Điện Biên nhiv no jông trâu sơưr đơưk tuôx ndis seiz uô si.

Txix iz qơư tir ntâuk tsav cuz nxor, Điện Biên nhiv no tsênhv jux juk hlôngr yiêz, huôv tsar. Tưz đhâu 72 shông, taz sik têx suôz kư, suôz luôs shir phaz, jông siêz tir ntâuk zênhx tros châuz Điện Biên Phủ cux tsênhv nhoz đreiv hâur sơưr đơưk đruôz siêz tsi plox. Cêr sik thôngx siêz, sir jos, siz paz txix cơưv shâuv chor lâul thâuv ntêx ntơư tror tâu uô trơưk, yênhx hâux lưv cxơưz cxiz Điện Biên huôv tsar sei thiêz truôx. Txix thax tsav tưz muôx jiês zos qơư tir ntâuk tsav cuz nxor yax, iz Điện Biên tsênhv jux juk hlôngr yiêz, huôv tsar jông đros 2 chas thax tsav qơư./.

                                                                                                        Vũ Lợi-Riê Lâux cxeik, nhênhv