Tsaz yênhx paz uô tsêr nhoz trâu têx chuôz zis pluôs ntơưv Sơn La- Uô tâu yênhx côngz khov sơưr đơưk sik thôngx siêz

            Zuôr xar 60 shông, pos Trần Thị Thật thiêz zơưv Nguyễn Hữu Cường 2 niêv txir nhoz jok Liên Hưng, xã Tô Múa, huyện Vân Hồ, Sơn La thiêx tâu pov zuk luz tsêr nhiv kruôr cxiv uô tâu muôx suôz luôs, cêr shir phaz uô cuô muôs pôngz nthar. “Ruôr tsêr, njêik yêv têx đra zos tsôngv cưr tix nênhx tsa, chor canr bôv nhoz cxuô ban ngênhx hâur xã, hâur jok tuôx paz hur si. Zuk muk tsêr kho moz lok, pov chôngz lênhx ntâu tus cưr tix nênhx tsa tuôx siz paz uô, zuk lok six jông siêz thiêz shir phaz, uô tsâus ntâu txos sơưr đơưk têx cêr paz”.

            Pos Thật chuôz zis zos ziv chuôz zis pluôs; pos trâus moz plơưr, moz trâuv; 6 shông lok no iz ciêz zơưv muôz yêz meir thâux xa pos 3 jiês muk tsêr kho moz liv trâuv đêz 40 ntâu cêik, phiv liv thiêz txov nhêv ntâu li ntơư, iz hlik đhâu iz hlik, iz shông đhâu iz shôngk tưz uô tsi tâuk vax tsêr truôx khor nhoz. Nhiv no tâu têz qơưk moz siêz paz nhiêx txiêx uô tsêr yiêz nhoz, tsuôk hâur 10 hnuz xưz, tưz uô tâu tiêr pos chuôz zis luz tsêr cấp 4. Seiz njiê pov luz tsêr yiêz truôx khor, pos Thật 2 niêv txir xar chuôs li zos bâu suôr. Nhiv no, pos 2 niêv txir tưz muôx têx nox nhoz tso siêz lus, thiêz zuôr muôx jông đas jos jux juk chiê đros tsôngv niêv txir cưr tix nênhx tsa sơưr đơưk huôv tsar uô nox, cxiv tsa luz nênhx yiêz. “Zênhx xar tsi txos tiêk, zuôr muôx tâu iz luz tsêr truôx khor li no nhoz. Thâuv ntêx, iz jiês lok nas puôr lênhx xâu, ntuz tas têx qơư pư thiêz hâur tsêr, tsuv muôz fiêz, thôngz lok chus. Nhiv no muôx tsêr yiêz lơưv, yar ntux lok nas lok tsi trâus cxơưx, tso siêz nox nhoz, xênhz huôx”.

            Pos Lừ Thị Dương thiêz zơưv Lò Văn Thảo nhoz jok Ngùa, xã Chiềng Pằn, huyện Yên Châu, Sơn La 2 niêv txir luz tsêr cxiv uô truôx khor đar muôx 60 ntâu xưv phaz zos hâu nov ntơưv qơư thiêz tsôngv cưr tix nênhx tsa sơưr đơưk hâur jok siz paz uô cux jux juk uô tiêr.  

            Zuôr xar 20 shông pos Dương chơưv kho moz plơưr thiêz moz tso jik kaz jiz, iz hlik tas 2, 3 tsov nhiêx yuôx, uô luz nênhx tưz txov lok ziv trâus txov đuô nzir. Pos 2 tus tuz tưz muôx chuôz zis thiêz pheiz chuôz lơưr muk nhoz lơưr tas, txơưv paz niêv txir ntâu taz sik puôr lênhx khưr uô liêx têz, phênhv sâu tâu tsi truôx tuk, viv li cux paz tsi tâu niêv txir uô tsêr truôx khor nhoz. Chênhr zos li heik co, iz jiês lok nas chuô lox zos iz jiês pos Dương thiêz zơưv Thảo pư tsi tâus jos, uô nênhx nyei trưs. “Thâuv ntêx cur chuôz zis lav cxiv uô nhoz tax xưz, muôx 2 qar mê grêiv, nhoz ntêr tưz trâus puôk tsuôx, tsi truôx khor tas lơưv, thâuv tưs lok nas mak kror tưs cux xâu njuôs njêz, luz tsêr nhoz iz saz lơưr nyei tsav kêix vâu trâus lơưr tsêr, viv li tsuv muôz ruôr”.

           Đros trâu chor hluôk nênhs, tsôngv pox niêv thiêz cưr tix nênhx tsa sơưr đơưk hâur jok côngz đas jos paz, đhâu 02 hlik sir jos cxiv uô, pos Dương thiêz zơưv Thảo luz tsêr tưz uô tâu tiêr.

             Pos Dương, pos Thật chuôz zis tsuôk zos 2 hâur yênhx cxênhz chuôz zis pluôs, chuôz zis zuôr xar pluôs thiêz chuôz zis muôx côngz têz qơưk nhoz tỉnh Sơn La tâu paz uô tsêr nhoz hâur têx luz hlik hâur shôngk shông no. Zơưv Nguyễn Duy Dũng, Phưv Giám đốc Sở Mênhx cxưx thiêz Tôn giáo tỉnh Sơn La heik pâuz: “Lok six ntâu huyện tưz muôx tsưr ziv fuô uô tâu jông luôs hâux lưv co, iz zav li: Txeik nhiêx txiêx hâur thax tsav qơư uô uô ntêx, thâuv tưs muôx tỉnh thiêz têx nhiêx paz txơưr đuô tuôx mav muôz lok nzir. Muôx nhiêx paz nzor mak tsôngv pêx xênhv muôx đas jos, muôx pênhr chiê cxiv uô tsêr thiêz nzor tâu sơưv côngz trênhx têz qơưk paz. Txos nhiv no muôx têx khav tinhv, Sơn La tưz uô tiêr luôs hâux lưv vênhv tôngv sơưr đơưk sik đros paz uô tsêr nhoz trâu têx chuôz zis pluôs, chuôz zis txov nhêv hâur thax tsav tỉnh trơưk hâux lưv tso tơưv”./.

VOV-Riê Lâux cxeik, nhênhv

Ntus đriv uô truôx jông lơưr têx luk jênhv tsês

              “Zos lênhx chiến sĩ cách mạng, thor sơưr hêik hâur tuk qix têz qơưk. Iz, Sir tas txox siêz viv Têz qơưk Việt Nam, muôx Đảng cộng sản Việt Nam lênhx tov, sir jos viv têz qơưk Việt Nam hux fênhx, tiêx tuk thiêz xar hôiv chủ nghĩa, paz sir jos trâu tsav txênhz sâuv ntiêx têz, viv hux fênhx, tiêx tuk mênhx cxưx, dân chuv thiêz chủ nghĩa xar hôiv”.

            10 lo luk jênhv zos kuz Đại tướng Võ Nguyễn Giáp cxiv sâu thiêz tror piêr txos, tâu Đôiv Việt Nam Yax kriê giải phóng quân hêik luk jênhv uô trơưk hnuz 22/12/1944 ntơưv thax tsav jôngr nhoz tỉnh Cao Bằng tưz đhâu muk muôx 80 shông, hnuz no ho tror tâu chor chiến sĩ binh nhất pênhz phax ntơưv Lai Châu hêik txos. Binh Nhất Lò Văn Chung, Trung đôiv Vũ trang, Zênhx Pênhz phax Trôngx đriv Ma Lù Thàng hêik pâuz: “Cur pov lok six shir phaz thâuv tâu hnar têx tsôngk yo tuz lênhx pênhz phax. Lok six shir phaz thâuv tâu hêik txos quân nhân 10 lo luk jênhv tsês no. Cur zuôr sir jos uô tiêr jông lênhx chiến sĩ têx jênhv vưv, hâux lưv tâu choz, uô truôx jông Quân đôiv li têx chêi, chỉ thị, uô jông lơưr cêr chêi têz qơưk”.

            Yênhx lo luk jênhv tâu hêik trâu têis cik hnuz thưr 2 yênhx ciêz ntơưv tiêx chor Zênhx Pênhz phax sâuv thax tsav ntus đriv Lai Châu tưz paz trâu chor chiến sĩ  thiêz pêx xênhv nhoz ntơưv têx jêx jok trơưk ntus đriv muôx nzir đas jos. Paz trâu lơưr  hâur yênhx jiês qênhz yuôx, tsik cxơưx txos têx phiv liv sir jos uô cov tâu truôx jông têx hâux lưv. Thượng tá Lầu Xênhv Vax, Chinhr triv viên, Zênhx Pênhz phax Trôngx đriv Ma Lù Thàng, huyện Phong Thổ puz pâuz: “Pêz xar txos quân đôiv Việt Nam li 10 lo luk jênhv tsês mak pêz lok six tso siêz thiêz shir phaz. Zos chor chiến sĩ sêiz jor ntơưv ntus đriv, por vêv truôx jông trâu têz qơưk, pêz pâuz tiêk tsuv uô cov tâu truôx jông côngz xưv cxiv tsa quân đôiv hênhr thiêz uô tau jông côngz xưv đối ngoại côx phax”.

             Qơư ntus đriv Thu Lũm, huyện Mường tè (Lai Châu), bôv đôiv Pênhz phax tsưr tsix chor jiês sik thav đros pêx xênhv tưz zos yênhx kror hâux lưv tsik so tâu kriz uô thiêz paz trâu quân thiêz pêx xênhv siz sưv jê, njênhs siêz đuô. Trung tá Lù Lù Chừ, Zênhx Pênhz phax Thu Lũm nhoz huyện Mường Tè puz pâuz: “Pêz tsik so bax jông thiêz sik côngv chie uô tiêr tâu jông têx jênhv vưv, paz trâu pox nhuôs truôx tuk luz nênhx, njênhs njôngr trâu bôv đôiv pênhz phax li côngz xưv sêiz car por vêv ntus đriv”.

              Chênhr txix sik côngv jông co, đros têx hâux lưv uô tsênhv tsênhz, mak Bôv đôiv Pênhz phax kriz uô tưz paz trâu pox nhuôs nhoz ntus đriv njênhs siêz đuô trâu cấp ủy, chinhr quyền cxuô cấp li lênhx tov, tso siêz khưr uô nox thiêz đros đrêiv chor lưx lươngv sêiz car jông thax tsav ntus đriv Têz qơưk. Tix lâus Sì Sì Hừ, thôn đôiv tsar jok Thu Lũm 2, xar Thu Lũm, huyện Mường Tè hêi pâuz: “Cur zos dân quân hâur xar, sik côngv đros bôv đôiv Pênhz phax tsik so qênhz yuôx ntus đriv. Thiêz cux hêik trâu pox nhuôs xar muk sêiz shuôk têx cưr tix, fôngx zưs nhoz saz têz qơưk đrâur mak tsuv uô cov cxix cxuô têx ntâuz ntơưr”.

            Đại tá Lê Công Thành, Phưv Chinhr ủy, Bôv Chỉ huy Bôv đôiv Pênhz phax tỉnh Lai Châu puz pâuz, hâur canr bôv, chiến sĩ lưx lươngv Pênhz phax li siêz xar thiêz huôx tôngv, “10 lo luk jênhv tsês” zos têx luk jênhv trâu Đảng, Têz qơưk thiêz pêx xênhv: “Đhâu 10 lo luk jênhv tsês tưz paz kriê trâu yênhx lênhx canr bôv, chiên sĩ muôx siêz nhiêv têz qơưk, muôx txơưx jênhv, jênhv vưv jông trâu têz qơưk, trâu quân đôiv. Thiêz yênhx lênhx canr bôv, chiến sĩ tsuv sir jos uô cov tâu jông zuk txơưx jênhv, cux li cxiv tsa trâu zuk muôx txux chi, tsưr ziv uô hâux lưv cov truôx jông đuô”.

           Sâuv thax tsav ntus đriv, Bôv đôiv Pênhz phax Lai Châu yênhx truôv tơư muk lok tưz paz nriêr pâuz, tuôr truôx jông qênhx shênhx txix nzor, txix đêz; đros tsôngv box nhoz ntus đriv sir jos uô tâu ntâu kror hâur por vêv truôx jông thax tsav ntus đriv têz qơưk./.

Khắc Kiên-Lik thox cxêik nhênhv