Hlôngr yiêz sôr-qơư paz jos huôv tsar kôngz nuv nhoz Yên Bái

            Zơưv Nguyễn Văn Định nhoz jok Minh Thân, xã Đại Minh, huyện Yên Bình, tỉnh Yên Bái chuôz zis iz txưv zos chuôz zis chos đreiv chor txir lưk pax. Nhiv no zơưv chuôz zis muôx iz ha ntâu txir lưk pax đros thiêz 350 tsoz, xav kror đruôz đraz chos tâu muôx 30 txos 50 shông, hâur co kênh tsoz tưz chos tâu 70 ntâu shông. Iz shông, vax txir lưk pax gra lok phênhv sâu tâu truôx tuk trâu zơưv chuôz zis 250 tsov đeiv, kênh shông mak tâu 500 tsov đeiv.

            Taz sik, chiê tu tâu têx tsoz txir lưk pax lâul tsi trâus tuôs, txi txir jông, nox kaz, lar heik zos tu tâu huv đros mak tas lok six ntâu six hơưv, côngz đas jos.

           Têx shông jê lok no, tâu tỉnh, huyện thiêz tsêr cơưv Đại học Kôngz-jôngr nuv, Đại học Thái Nguyên paz kriê tsưr ziv tu, zơưv Định tưz quyết định yưv muôx 70 tsov đeiv nhiêx chiê đhok car đêx zưs trâu tsoz chos. Nhiv no, txơưv nhoz hâur tsêr lok sik kror tưs, zos muôx sóng xor tôngx, mạng internet, zơưv tưz muôx têx tso tâu đêx zưs trâu tas nro vax txir lưk pax. Zơưv Nguyễn Văn Định heik: “Thâuv ntêx zos tiêk zưs đêx trâu tas nro luz vax mak muôx têx pôngz nhos 4-5 hnuz. Taz sik nhiv no iz hnuz xưz cur tưz zưs tâu tas hur si. Thiêz cux tsi tas tuôr hluô, tuôr car đêx muk zưs iz kro, iz tsoz jux juk, tsuôk niêk meir, tso đêx nưk zưs nưk xưz, zuk muk uô lưv zav hâux lưv txơưr đuô. Cur qơư zưs đêx co zos zưs tsuôs chiê ar têz max mav ntuz jux juk, txuôs tâu đêx thiêz zưs tâu sei viv li cux tsi tas ntâu tênhv. Li ntơư, cux jông thiêz muôx ntâu liv trâu zuk”.

              Đros trâu cxuô chuôz zis, hlôngr yiêz sôr cux tsênhv tâu ntâu doanh nghiệp, HTX nhoz Yên Bái sir jos uô trơưk hâur huôv tsar, tsiv uô, qênhz shuôs qơư chos thiêz sâu zuôr têx xiv huv.

            Zơưv Nguyễn Việt Hưng, Giám đốc Công ty muôv muôs thiêz ju lix Hưng Việt-taz viv huôv tsar uô ju lix thiêz côngz têx xiv huv kôngz nuv jông hâur Yên Bái li: Trox ciêv fix, yuôx zêx Shan tuyết, njêl kra kruôr pak đêx Thác Bà, cuz thaz kok kriêr....heik pâuz: “Xuz thơưx zos xav tinhv tsưr ziv xar uô trơưk khoa học, công nghệ mak chiv chir zok nriêr, cơưv shâuv xưz; tiv 2 zos ndax trâu ntu têz qơưk moz siêz paz max tsôngv pêx xênhv, doanh nghiệp huôv tsar uô nox, viv li pêz tâu cơưv cxaz têx txux chi tsưr ziv thiêz tâu paz sir zôngv têx meir phưx vưv uô hâux lưv. Xưk li thâuv ntêx, luôs hâux lưv thôngz sâu, pov cov, yax kriê pêz pôngz lok six ntâu six hơưv, hnuz nhôngs, pâuz tsi thôngz, tsi cxix cxuô zav mak txix thâuv uô  lơưr công nghệ yiêz, pêz tưz txuôs tâu ntâu six hơưv, hnuz nhôngs thiêz tsi yuô khưr, uô tâu ntâu hâux lưv đuô”.

             Zơưv Nguyễn Thúc Mạnh, Phưv Giám đốc Sở Khoa học thiêz Công nghệ tỉnh Yên Bái heik pâuz: “Hâur ntu zuôr txos, pêz zuôr đros têx sở, ngênhx cik txos chiê nhênhz chơưv trâu HĐND tỉnh tso tơưv iz cxiê tsênhv chei paz, cxơưz cxiz uô lơưr têx công nghệ sôr hâur cxuô luôs hâux lưv. Đhâu ntơư, chor qơư tsiv uô, doanh nghiệp, HTX xar uô lơưr công nghệ zuôr tâu têz qơưk paz mê njik chiê uô trơưk hâur tsênhv tsênhz cov uô tâu truôx jông đuô têx hâux lưv huôv tsar uô nox”.

             Hlôngr yiêz sôr hâur kôngz nuv tsi tiêk uô lơưr công nghệ, tsênhv zos hlôngr yiêz tsưr ziv huôv tsar uô nox chiê muôx tâu iz ngênhx kôngz nuv truôx jông. Tỉnh tsênhv jux juk đơưk uô têx phiv liv txix ntâu faz tsưr ziv, lar heik zos moz siêz cxiv kho, chaz mạng internet muk trâu thax tsav tox siêz đêz đrôngs, kriê txux chi, tsưr ziv yiêz trâu pêx xênhv, cxơưz cxiz doanh nghiệp yưv pênhr công nghệ thiêz sir jos siz paz huôv tsar-sâu zuôr têx xiv huv uô tâu. Đros trâu têx sir jos thiêz fuô uô huv đros, Yên Bái vav chiê siêz zuôr jux juk cxơưz paz kôngz nuv ntơưv qơư huôv tsar hâur ntu têz qơưk hlôngr yiêz./.

Thừa Xuân-Riê Lâux cxeik, nhênhv

Chor nênhs lâul tsik muôx nhiêx hli zuôr tâu paz 500 cxênhz đêiv iz hli txix hnuz 1/7/2025

             No zos kror kriz uô zov chênhr hâur paz ngaz tuk xar hôiv, paz trâu yênhx triệu lênhx nênhs lâul tsik muôx phênhv sâu truôx thâuv ntu lâul.

            Tổng Liên đoàn Lox tôngv Việt Nam ntâuk gri, muôx nhos 5 triệu lênhx nênhs lâul muôx hnuz nhôngs siêz đuô 60 shông thiêz tsik tâu muôx 80 shông, tsik zos chuôz zis pluôs, tsik trâus sêv khiz luz chêr, tsik tâu sơưv phênhv paz yênhx hli, zuôr njiz trâus têx cêr txov thâuv ntu lâul.

            Tsưr tsix công đoàn puz pâuz, ntâu luz têz qơưk xav jênhv paz trâu chor nênhs lâul zos iz kror zov chênhr tsuv kriz uô hâur cxiv luôs bảo hiểm xar hôiv. Viv li, zênhx hangx têz qơưk tsuv muôz iz phênhv chiê paz trâu chor nênhs lâul tsik muôx nhiêx hli lok sik paz lơưr bảo hiểm xar hôiv yênhx hli.

            Muk ntêr, công đoàn njuôk xav zuôr kriz uô tsênhv chêi huiz tôngv xar hôiv paz trâu chor nênhs no đros phênhv tâu sơưv siêz đuô thiêz muôx tsưr ziv txo grêk tsơưs chor nênhs lâul tâu sơưv nhiêx hli xar hôiv huv đros.

           Chêi Bảo hiểm xar hôiv 2024 (tâu uô trơưk txix hnuz 1/7) cui tênhv paz nhiêx hli so lâul xar hôiv zos zav bảo hiểm xar hôiv tâu nhiêx txiêx têz qơưk muôz paz, tâu cxiv tsa uô trơưk têx kror zênhx muôx uô ntêx thiêz huôv tsar iz phênhv txix cui tênhv lok phênhv paz xar hôiv yênhx hli trâu chor nênhs lâul.

           Lơưr co, thâuv Chêi tâu uô trơưk, hnuz nhôngs tâu sơưv phênhv paz nhiêx hli so lâul xar hôiv zuôr grêk 5 shông pir đros hnuz nhôngs tâu sơưv phênhv paz xar hôiv yênhx hli trâu chor nênhs lâul nhiv no (80 shông). Viv li, chor nênhs Việt Nam txix txưv 75 shông tror sâur tsik muôx nhiêx hli so lâul lok sik phênhv paz bảo hiểm xar hôiv yênhx hli zuôr tâu sơưv phênhv paz nhiêx hli so lâul xar hôiv./.

Tòng Anh BT-Lik Thox cxêik nhênhv