Hu UB Bhap bini tinh ba Ria – Vung Tau (klak) hu mbaoh tangin di bilan 3/2023, Danak dak “Roh duah saong pandar bruk ngak mbang payeng duh ka bruk patagok kinh te – xa hoi karo kajap di huyen Con Dao tukvak meng thun 2022 – 2025, yam tagok tal thun 2030” daok ngak tabiak dom bruk salih bahrau dalam jalan khik iek saong bruk pandar drap ar di bhum palei.

Jalan ngak kuhria taong abih di danak dak brei langyah dom bruk daok kandaong saong bruk kan kandah ka alam langik tasik, nang luong bhum pulao Con Dao daok gaok. Tapa di nan daong padang bruk karja, jalan mbak, gom truac, sang bac, balai saong bruk rik daong di rahra pamaong tal bruk patagaok karo kajap.

Tui ong Ngô Hữu Thống, Jabat Roh duah Pandar saong Salih bahrau hadah krah bruk ngak mbang pablei salih, bruk pandar bruk ngak mbang payeng saong Net Zero lac sa kadah patagok njauk ngak anak dom bruk kanjah jhak dak harei dak praong di bruk kinh te xa hoi tal alam langik tasik.

" Net zero lac sa kadha bahrau piah khik kajap bruk patagok bruk ngak mbang gam khik kajap bruk diuk rai di anek menuac. Karei di nan, anek menuac jeng brei paglaong ilamo piah patakik dom kanjah jhak meng bruk ngak mbang, xa hoi tal alam langik".

Cambaih laih lac, bhum pulau Con Dao hu ngak saong daok khik tani tanat, peih praong dom bruk lagaih yau ye: Danak dak Harei sanecar hijao – hacih sa-at – gheih ghang; salih hareik katak mek pandap kaya; salih labik klak hareik jeng labik pala phun jru; langyah hareik huu co jeng khak drak ka dom labik daok rahra…Abih di nyu nan lac, bruk ngak jirah takik hareik lac hu mbaok di taong abih 100% labik ngak bruk di ini, gah ngak mbang gah jirah rivang, jitvu bruk ngak pajeng ba.

Sa-ai Phạm Nguyễn Chương, lambaok ka sa labik ngak bruk di ini, brei thau, ngak tui bruk salih bahrau hu hacih sa-at, ngak mbang hacih sa-at, ngak payeng dom labik ngak mbang di ini di sa-ai hu salih taong abih gai glaoh tagei, tasi katak pandar sa mbang tapa dom ndap nda hu ngak meng kayau, kreim; gam haong di nan pandar kanduh li-u piah ngak khak drak ka phun kayau:

" Di Con Dao – Resort daok jhul bruk pataom mek saong neh rabha, langyah dom tathuak nerak hreik sinh hoc. Cambaih laih lac, khol dahlak hulin pataom mek kanduh li-u mai piah ramik nyu, pasiam jeng khak drak sinh hoc piah duh ka bruk pala phun, drak phun kayau dalam mblang taneh di Resort".

Dalam danak dak anak tal, Con Dao brei patui veik peih praong dom bruk daok hu, jhul khang pato megru truyen thong, pachreih gah ngak mbang pablei salih hu mbaok tame saong roh duah piah pandar dom ilamo ngak kong bahrau dalam bruk pasang iek hareik harom saong jirah rivang hadah krah. Ong Lê Anh Tú, Bi thu Ndang uy Dac khu Con Dao brei thau, brei pataom tame ngak iek dom bruk hu angan yau ye oh pandar kadung nilon, pandap kaya katak pandar sa mbang saong daong jien ka dom bruk ngak pasiam:

" Côn Đảo brei sangka iek praong bruk parilo urang ngak bruk, salih bahrau danak dak pato pakai ka bruk ngak mbang payeng, buh jien tame ka labik ngak bruk pasiam, ramik hareik jeng yau pathau khan paglaong ilamo bhap bini ka bruk pandar karo kajap. Ngan haong bruk nan, Con Dao kham merat padang bruk ngak mbang paying siam lagaih, njauk haong jalan ngak patagok bruk ngak mbang hacih sa-at, pagam haong bruk khik ramik alam langik saong rilo sinh hoc".

Dom bruk ngak jak jeng akaok meti ini daok dak harei dak brei mboh sa bhum pulao Con Dao hijao – hacih sa-at – patagok siam mekre, hu angan saong thau ka bruk di drei. Jak jeng di danak dak sarak oh lac kadha karei di Con Dao, bo daok brei mboh lac salih jeng hacih sa-at oh lac pilih ruah, bo daok lac jalan njauk ngak, brei ka hu bruk hu mbaok tame di karja saong bruk daong di rahra, gah ngak mbang pablei salih./.