Di Pasak duh ka bruk karja xa An Ninh, yaom lac hu rilo mikva mai ngak harak gar, tui bruk srap gap tani tanat meng ndap nda kaya ngui, menuac urang meng dahlau nan, nan abih harak gar karja di mikva hu langyah samar drah. Ong Huý Điền Siêng, rahra daok di xa An Ninh, brei thau: “Drei mai tal ini blaoh oh thau ye hu urang jakar tacei ba , drei, drei ngak, drei ngak samar lagaih”.

Xa An Ninh, ban raya Can Tho hu brei pagam mai meng dua xa An Ninh saong xa An Hiệp (huyen Châu Thành, tinh Soc Trang klak). Xa hu 16 puk palei, taong abih taneh praong jaik 7.000 ha. Dalam xa hu labaih 8.000 baoh sang ngan haong 40.000 urang. Dalam nan, urang bangsa Khmer hu jaik 58%. Amuk Châu Ngọc Hồng, Phaok Akaok UB Bhap bini xa An Ninh brei thau: "Gam saong mikva urang bangsa Khmer ka bruk salih lek taka so ye mikva jeng hu ngak lagaih, min tapi jeng daok dom mikva praong thun ye oh ka tui samu, oh thau tani tanat sap Viet. Kayua yau nan ye, daok Pasak duh bruk karja di xa, langiu di ramik caga urang jakar ngak bruk yaok gah piah daong ka mikva ye jeng hu ramik caga sa urang piah tacei ba, daong ka mikva".

Daok di xa Thuận Hòa, bhum palei hu labaih 75% mikva urang bangsa Khmer diukrai, hu pagam mai meng xa Phú Tân saong xa Thuận Hòa (huyen Châu Thành, tinh Soc Trang dahlau) dalam dom harei ini, di Pasak duh bruk karja di xa jeng hu rilo mikva mai tal piah ngak dom harak gar.

Diuk pasang ong Kim Sài Huil, urang bangsa Khmer mai ngak harak gar, yaom lac hu biak rilo mikva, min tapi urang jakar pasak hu abih hatai jai daong bruk, tacei ba, daong ngak tani tanat harak gar saong langyah blaoh biak samar drah tui lek taka danak di mikva. Pasak jeng buh jien tame ngak jabat hu praong laneng lanoi, ndap nda kaya bahrau, ong biak bui sambai.

"Mboh biak abih tung tian, rilo meng lac urang bangsa takik, daok oh ka tani tanat bhian cambaic sap Viet ye ba abih hatai jai brei daong, tacei ba mikva drei, yau ngak dom harak gar, tapuk bhong harak gar taneh riya…mboh ba biak abih tung tian daong".

Tui ong Trương Quốc Điền, Bi thu Ndang uy xa Thuận Hòa, Pasak duh bruk karja xa hu sangka buh jien tame ngak, pasiam bahrau, rilo di dalam nan hu dom ndap nda kaya, khik kajap pabak dom bruk bahrau di xa. Dahlau di nan bhum palei jeng tagok bruk pathau khan tal rahra thau Pasak duh bruk karja xa bahrau urak ini hu taduan, langyah taong abih dom janih harak gar, oh rabha labik ngak bruk karja, oh rabha bruk ngak karja.

"Pasak duh bruk karja xa hu rami ramik srap gap ba tame ngak biak tani tanat piah oh ngak klaih klaoh, gar tavak di gah halei, pabak hu hatai caong khin di mikva bhap bini rahra. Hadei sa tukvak ngak bruk, xa brei peih bruk pasang iek gilac, dom asal kadha karei hu rah tabiak atau hu bruk halei oh lagaih ye brei pasiam samar drah, ka njauk, khik kajap bruk ngak lagaih".

Gam saong bruk srap gap rami ramik tani tanat ka jabat, labik dhua hu ngak bahrau, urang jakar, urang ngak bruk ba abih hatai jai tung tian, karja dom bhum palei xa, phuong bahrau di ban raya Can Tho, dalam nan hu bhum mikva urang bangsa Khmer hu khik kajap bruk ngak lagaih, langyah samar dom harak gar karja, ngak jeng bruk chreih chrai sambai brei ka mikva./.