Meng akaok tuk page, di Pasak ngak bruk karja xa Hòa Phú, tinh Dak Lak, rahra mai tal ngak harak gar karja biak rilo. Salah blaoh bruk brei thau tantu harak gar tapa online saong mek harak tuk bayar gilac, ong Nguyễn Thế Lâm, daok di palei 9, xa Hòa Phú, tinh Dak Lak brei thau, yaom lac harei akaok meti ngak bruk tui bruk bahrau min hu dom bruk salih bahrau biak lagaih dalam bruk ngak langyah dom harak gar karja.

“Bruk gheih di abih di nyu hu lac dahlak hulin mboh karei dut saong dahlau, nan lac dahlau daih brei cang, blaoh dom harak gar karja cuang kandah blaoh salih nao ngak di labik ini, salih nao ngak di labik daih min urak ini ye jaik yau bruk salih lek taka so daok rah tabiak dalam bruk ngak, yaok bruk ngak yaok harei di khol drei. Pandar lek taka so  tame ye harak bi-ar hu langyah biak samar saong siam lagaih ralo.

Di Pasak ngak bruk karja phuong Buon Ma Thuot, ong Vũ Đức Hưởng, daok di phuong Ea Kao brei thau, dom harak gar meda hu ngak tapak di phuong drei daok, min kayua bruk randap nan ong jeng nao tal jabat pasak karja klak di ban Buôn Ma Thuột dahlau daih piah ngak dom harak gar. Ong njauk hatai kayua dom harak gar jeng hu ngak lek taka so, meng bruk tame lek taka so danak tal tuk urang ngak taduan mek harak gar, bayar gilac harak.

 “Dahlak hulin tagok tal ini piah salih tapuk harak bhong meraih tapa tapuk bhong. Kayua labik ini dahlak hu ngak randap blaoh urang ngak biak samar drah nan dahlak hulin mai tal ini ngak. Mboh lac baoh panuac nyu karei ha sit, bruk ngak nyu jeng karei ha sit min rah rah jeng randap haong nyu. Hadei ini meda lac urang jakar tacei ba ye drei thau lac daok di labik halei drei ngak di labik nan ye mbuan jang. Daok urak ini bahrau harei akaok meti ye dahlak hulin jeng mai tal labik klak piah ngak harak gar karja min”.

Dom harak gar karja jaik taphia rahra yau ye: hukum tame angan hộ tịch, harak akhan harei menek, harak akhan metai, harak daong bao hiem y te, tut angan bac megru, brei thau labik daok, harak tut angan taneh riya jeng brei rah tabiak yaok harei. Kayua nan dom urang jakar, urang ngak bruk di pasak karja jeng hu kham merat ngak, ngak randap ngan haong majam ngak hoang gauk dalam bruk ngak karja palei 2 pakat.

Ong Nguyễn Đăng Huy, urang ngak di Pasak karja xa Hòa Phú brei thau, dalam dom harei ini, dom urang jakar di pasak ngak bruk tal lavik malam piah ngak samu dil dom harak gar, pabak hatai caong khin di rahra.

“Taong abih dom urang ngak bruk di Pasak karja xa Hòa Phú bahrau mai meng rilo urang jakar nan bruk thau samar, ngak bruk ngak iek dahlau ye anak meta mboh tani tanat min tuk tame ngak meng page tal urak ini ye jeng hu dom kadha yau lac du lieu pambuak tal he thong harak gar karja daok bahrau nan bruk thau samar, langyah jeng gaok kan kandah, min adei sa-ai jeng daok biak kham merat pasiam”.

Di taong abih dom xa, phuong, dom kapul urang ngak bruk gah phan mem saong urang ngak jamraik ky thuat di Vien thong Dak Lak tuk halei jeng hu mbaok piah daong urang jakar ngak jitvu karja, daong rahra mai ngak tui hukum adat dom harak gar.

Tui ong Nguyễn Nam Quốc, Yam ndok Vien thong Dak Lak, tui tinh Dak Lak bahrau, bruk pasram, tacei ba urang jakar, urang majam pandar saong gauk hu peih ngak meng dahlau, abih di nyu nan lac ngan haong dom xa, phuong daok dalam tinh Phu Yen klak dahlau daih, piah tuk salih tapa pandar majam pandar haong gauk bahrau ye dom urang nan meda pabak hu samar di labik ngak bruk./.