Tlam mbruê (2/7), Êpul gơ̆ng bruă ƀuôn sang čar Dak Lak mkŏ mjing leh klei bi kƀĭn tal sa Êpul gơ̆ng bruă ƀuôn sang čar gưl X, wưng 2021-2026, leh ngă klei bi mŭt čar. Hlăm klei bi kƀĭn, Êpul gơ̆ng bruă ƀuôn sang čar Dak Lak hưn mdah Hdră mtrŭn mơ̆ng Dhar bruă kƀĭn ala kơ bruă tiŏ nao phung mă bruă  ngă khua gĭt gai kmeh gơ̆ng.

Cao Thị Hoà An,  K’iăng Khua dlăng bruă Đảng, mâo jao ngă Khua Êpul gơ̆ng bruă ƀuôn sang čar Dak Lak wưng 2021-2026; Trần Phú Hùng, Khua hlăm bruă Đảng čar leh anăn Đỗ Thái Phong, Khua hlăm bruă Đảng čar, mâo jao ngă K’iăng Khua Êpul gơ̆ng bruă ƀuôn sang čar; Phạm Thị Phương Hoa ngă  Khua Anôk bruă Hdră bhiăn; Phan Thị Hà Phước ngă Khua Anôk bruă duh mkra - ngăn prăk; Lê Văn Cường  ngă Khua Anôk bruă Dhar kreh -ala ƀuôn; Đỗ Thị Như Tình ngă Khua Anôk bruă djuê ana. Blŭ hrăm ti anôk bi kƀĭn, Cao Thị Hoà An, Khua Êpul gơ̆ng bruă ƀuôn sang čar Dak Lak mñă klă, hŏng ênhă lăn ala êbeh 18.000 km², ênoh mnuih ƀuôn sang êbeh 3,34 êklăk čô, Dak Lak jing sa hlăm tlâo čar prŏng hĭn kluôm ala kơ hnơ̆ng lăn ala, sa alŭ wăl mâo djăp klei găl čiăng mđĭ kyar kluôm dŭm bruă jing klei găl čiăng mjing boh kdrŭt mrâo, wăl đĭ kyar mrâo kơ čar Dak Lak hlăm wưng đĭ kyar kơ anăp.