Hnêč hruê knhal jih hruê kăm čiăng ktrâo lač kơ anak êkei kluč ñu hriăm klei tông čing kram, ayŏng Y Duyệt Niê, ti ƀuôn Phơng, să Êa Tul, čar Dak Lak brei thâo, anei jing mmông yuôm bhăn čiăng kơ ayŏng ksul mbŭ klei khăp hŏng phung anak. Jih ung ung mô̆ ñu jing nai mtô hđeh, ƀiădah nao mtô kbưi sơaĭ, mă bruă nanao ngă kơ bruă kriê dlăng anak čô dleh mơh. Ayŏng Y Duyệt brei thâo, mtô kơ anak tông čing amâo djŏ čiăng krơ̆ng kjăp dhar kreh djuê ana Êđê ƀiădah đru bi kjăp klei khăp mơ̆ng dŭm ênuk gưl hlăm gŏ sang.

 “Gŏ sang kâo bi kah mbha nanao klei mơak lehanăn bọ nik dŭm bruă phung anak dưi ngă snăn hmei ngă mbĭt mơh. Kâo mtă nanao kơ phung anak čô hdĭp ênuah ênô. Mâo mmông wăn, boh nik yan mdei prŏng, gĭr mtô anak hriăm tông čing boh nik čing kram čiăng kơ phung anak dưi mjĕ mjuk hŏng ƀĭng găp mkăn, hŏng mnuih khua thŭn, boh nik yuôm bhăn hĭn jing dưi thâo săng kơ boh tŭ yuôm mơ̆ng knhuah dhar kreh djuê ana Êđê.

Hŏng pô mă bruă klei mrâo Đàm Thị Thuần, ti ƀuôn hgŭm Tân Lập, bruă mă ngă kơ amai kreh nao mă bruă kbưi, mmông dleh mơh dưi thâo êlâo. Hŏng klei đru lehanăn klei thâo săng mơ̆ng mnuih hlăm gŏ sang kyua anăn amai dưi bi knar plah wah bruă mă lehanăn bruă hlăm gŏ sang. Amai Thuần mơak brei thâo: Bruă ngă mơ̆ng amai jing leh sa mta mnơ̆ng bi mguôp mnuih hlăm gŏ sang, mjing boh tŭ yuôm bhăn êdi.

 “Kâo mâo klei đru lu êdi mơ̆ng mnuih hlăm gŏ sang, kyua kâo mâo sagŏ sang khăp êdi kơ mă bruă klei mrâo. Ung kâo kreh nao mă bruă mơh, anak êkei kâo hnêč mmông wăn hlăm yan mdei prŏng ăt nao hgŭm čih dŭm klei čih yăl dliê lehanăn yua prăk mâo anăn blei mnơ̆ng ñu khăp. Dŭm gưl nao hiu mơ̆ng gŏ sang amâo djŏ knŏng jing gưl hiu čhưn mang ôh ƀiădah anăn jing gưl hiu tui ksiêm kơ boh sĭt. Dŭm klei yăl dliê anei jăk êdi, pŏk klei găl hlăm dŭm mta phŭn akŏ klei čih mơ̆ng dŭm mta bruă klei mrâo.

Hluê si amai Nguyễn Minh Trang, ti ƀuôn hgŭm Tân An, Dak Lak, hlăm ya ênuk gưl snăn bruă klam rơ̆ng kjăp klei yâo mơak brei mâo klei đru mguôp mơ̆ng jih dua tĭng, amâo djŏ bi mklă anei jing bruă klam mơ̆ng hjăn phung mniê. Mâo sa mta klei hlăm klei hdĭp ênŭk anei, phung mniê brei mkŏ dăp bruă djŏ guôp, yuôm bhăn jing gŏ sang thâo bi đru mbĭt.

 “Kâo mĭn hlăm ya mta bruă mă brei phung mniê brei klei tĭng mkă lehanăn kah mbha bruă klam djŏ guôp hlăm gŏ sang, anăn yơh jing klei yuôm bhăn. Kâo ăt myun mâo sa gŏ sang thâo bi đru. Dua ung mô̆ bi đru mơh bruă hlăm pưk sang. msĕ si klei kơ êsei huă djam ƀơ̆ng, piăt pưk sang… mmông mô̆ amâo wăn ung mă, ung amâo wăn mô̆ mă, anak čô prŏng ăt thâo bi đru mơh.

Lê Phúc Long, Kơiăng khua Knơ̆ng bruă Dhar kreh, mjuăt ktang asei mlei lehanăn Hiu čhưn ênguê čar Dak Lak, lač snei, klei hdĭp ară anei mbĭt hŏng lu klei kpĭ dôk bi mlih klei hdĭp grăp gŏ sang. gru hmô lu ênuk gưl hdĭp mbĭt knŏng ƀiă snăn, klei blŭ hră, mjĕ mjuk mơ̆ng grăp čô hlăm gŏ sang ăt ƀiă mơh kyua kdrăp mrâo, bruă mă lehanăn klei bi kpleh lăn ala. Ti anăp klei anei, Đảng lehanăn Knŭk kna ba mdah leh lu hdră mtrŭn čiăng mđĭ hĭn bruă mkŏ mkra gŏ sang ênuk gưl mrâo.

Lê Phúc Long, lač, grăp gŏ sang brei mjing hdră ngă bruă mbĭt čiăng kơ grăp čô lŏ mâo klei bi mguôp lu hĭn.

 “Ară anei čiăng 3 – 4 ênuk gưl hdĭp mbĭt hlăm sa gŏ sang jing dleh snăk. Kyua anăn, brei drei mâo dŭm bruă ngă klă klơ̆ng čiăng kơ grăp čô khădah mă bruă mdê dưn, hŏng yang ƀuôn đĭ kyar msĕ ară anei ăt mâo mmông kơ gŏ sang. Hluê hŏng dŭm klei bi lông hlăm gŏ sang, srăng ba klei mơak, thâo bi đru. Mơ̆ng anăn, mnuih hlăm gŏ sang srăng mâo klei bi mguôp, gŏ sang srăng yâo mơak, trei mđao snăn yang ƀuôn srăng đĭ kyar.

Krơ̆ng kjăp klei yâo mơak hlăm gŏ sang amâo djŏ jing bruă prŏng prĭn ôh, ƀiădah kbiă hriê mơ̆ng klei điêt, thâo bi đru, bi kah mbha lehanăn klei khăp hlăm grăp hruê plah wah grăp čô hlăm gŏ sang. Khădah ti krĭng ƀuôn sang taih kbưi, amâo dah krĭng ƀuôn prŏng mčhĭt mơuăt, knŏng čiăng grăp čô thâo bi đru, thâo bi khăp, thâo mđing dlăng snăn gŏ sang srăng yâo mơak, jing anôk jưh kang kjăp hlăm ktuê êlan klei hdĭp mơ̆ng grăp čô.