Hruê 3/7, Anôk bruă sang čư̆ êa čar Dak Lak mkŏ mjing leh Klei bi kƀĭn hưn mthâo dŭm klei bi mklă mơ̆ng Khua Anôk bruă sang čư̆ êa čar kơ hdră knuă druh. Hŏng dŭm klei bi mklă mrâo, anôk bruă knŭk kna ti Dak Lak leh bi mŭt mbĭt dưi mkŏ mjing djăp ênŭm, rơ̆ng hdră ngă bruă kluôm. Ti anôk bi kƀĭn, Anôk bruă sang čư̆ êa čar Dak Lak hưn mthâo leh klei bi mklă tŭ mă, ruah lehanăn bi mklă bruă klam hŏng phung khua kiă kriê lu anôk bruă, êpul êya hlăm alŭ wăl čar. Klă klơ̆ng, ruah Trần Văn Tân – Khua knơ̆ng bruă Ngăn prăk čar Phú Yên (hđăp) păn ngă Khua knơ̆ng bruă Ngăn prăk čar Dak Lak.

Ruah Cao Đình Huy – Kơiăng khua bruă Đảng ƀuôn prŏng, Khua Anôk bruă sang čư̆ êa ƀuôn prŏng Tuy Hòa, čar Phú Yên (hđăp) păn ngă Khua knơ̆ng bruă Rŭ mdơ̆ng čar Dak Lak. Aduôn Lê Thị Thanh Xuân – Khua knơ̆ng bruă Sang hră mơar mtô bi hriăm čar Dak Lak (hđăp) lŏ păn ngă Khua knơ̆ng bruă Sang hră mơar mtô bi hriăm čar Dak Lak (mrâo). Nay Phi La – Khua knơ̆ng bruă mdrao mgŭn čar Dak Lak (hđăp) lŏ păn ngă Khua knơ̆ng bruă mdrao mgŭn čar Dak Lak (mrâo)…. Blŭ hrăm ti knăm anei, Khua Anôk bruă sang čư̆ êa čar Tạ Anh Tuấn čih yap, bi mni kơ hdră mă bruă, duh myơr lehanăn ai tiê đua klam mơ̆ng phung knuă druh mâo ruah mdưm, mbĭt anăn mtă kơ phung knuă druh, khua kiă kriê mâo ruah lŏ dơ̆ng mđĭ lar klei thâo, klei jhŏng lehanăn bi hgŭm mguôp čiăng mkŏ mjing anôk bruă tŭ dưn, mkăp djŏ hŏng bruă klam hlăm wưng đĭ kyar mrâo mơ̆ng čar./.