Mâo mnuih amâo kral truh ti sang, ung mô̆ amai Y Nhua, ƀuôn Kon Rôn, să Ngok Rĕo, čar Quảng Ngãi drông hŏng klei mđing răng. Leh thâo mta kñăm mơ̆ng phung mă bruă klei mrâo čiăng hưn brei răng kơ klei truh jhat mơ̆ng matuĭ, amai Y Nhua hưn yơh anak êkei ñu dôk hlăm mnă tŭ 9 mlan krư̆ kđăl kyua klei soh ba yua matuĭ. Mmông arăng mă anak ñu, jih gŏ sang bi kngăr, ruă ai tiê. Ară anei anak ñu dôk hlăm mnă, mtâo mniê ñu ba anak nao wĭt ti sang amĭ ama leh, klei hdĭp gŏ sang Y Nhua mtŭk mtŭl, klah hjăn hŏng riêng gah.

“Khải dơ̆ng mơ̆ng điêt djăp pô thâo sơaĭ, ară anei kdjăt mơh ñu ngă snăn. Mmông nao phat mkra, ñu hia lač huĭ snăk. Kâo ăt djiê huăt tinăn mơh. Ară anei pưk hma lui snăn amâo lŏ mâo ai tiê mă bruă ôh.

Ƀuôn Kon Rôn mâo 236 gŏ sang, păt čiăng jih jing mnuih djuê ana Sedang hdĭp mda. Krĭng ƀuôn sang hơĭt ênang hŏng lu boh tŭ yuôm dhar kreh djuê ana mơ̆ng đưm, mnuih ƀuôn sang kreh kriăng kơ bruă, jăk ênang ară anei  tlă anăp hŏng klei truh ba yua matuĭ, bi rai jih klei hơĭt ênang tinei.Aduôn Y Nhĩ, 60 thŭn, mĭndah dul ƀiă klei dleh dlan kyua mâo 2 čô anak prŏng leh, ƀiădah ară anei hĭn mơh dleh knap, hlăk anak êkei 23 thŭn arăng mă krư̆ kyua klei soh ba yua matuĭ.

“Amĭ kăn thâo, ama kăn thâo lei. Mmông arăng mă pap êdi dlăng. Kâo dôk ti sang ruă duam mơh, čang hmăng anak dưi wĭt hnưm. Phung hđeh hlăm ƀuôn đăm lŏ hluê êlan anei ôh, Gĭr dôk ti sang đru amĭ ama kơ bruă.

Dŭm krĭng ƀuôn sang mơ̆ng čar Quảng Ngãi (Kon Tum hđăp) mâo êbeh 100 čô ră rañ, êbeh 600 čô ba yua matuĭ lehanăn êbeh 3.300 đing ba yua mta kăm anei. Anei ăt jing sa hlăm dŭm mta phŭn bi rai klei hơĭt ênang ti krĭng ƀuôn sang lehanăn ba lu klei truh jŭ jhat hlăm ala ƀuôn. Ƀuh klă klei truh jŭ jhat anei, mlan 4 leh êgaĭo, Anôk bruă sang čư̆ êa čar Kon Tum ba mdah leh Klei klah čŭn mrô 1118 kơ bruă mkŏ mjing
“Să, ƀuôn hgŭm, wăl krah doh amâo mâo matuĭ” lehanăn dŭm să dôk mđĭ bruă hluê ngă gru hmô anei. Aduôn Phạm Thị Mây, Khua hđăp anôk bruă sang čư̆ êa să Ngok Rĕo brei thâo, hdră anei hlăk lehanăn dôk hluê ngă kñăm gang mkhư̆ boh klei jhat anei hlăm krĭng ƀuôn sang.

“Să ăt pŏk ngă gru hmô alŭ amâo mâo matuĭ. Iêu mtrŭt djăp êpul, anôk bruă hrăm mbĭt mtô mblang mtrŭt mjhar phung êdam amâo yua matuĭ. Să ăt akâo hŏng anôk bruă djŏ tuôm mđĭ hdră mtô mblang, kriê dlăng, bi hgŭm hŏng alŭ wăl thâo klă mnuih đing ba yua, boh nik tui ksiêm, bi mklă lehanăn msir mghaih jih klei pioh, tlĕ čhĭ lehanăn ba yua matuĭ soh hdră bhiăn”.

Matuĭ hlăk dôk mŭt hlăm krĭng ƀuôn sang, ba klei ruă êka lehanăn bi rai klei hơĭt ênang ti lu alŭ wăl mơ̆ng čar Kon Tum. Êa ală phung amĭ ama, aduôn aê, dŭm klei phat mkra mơ̆ng phung mda asei lĕ hlăm matuĭ, jing sa klei hưn răng prŏng kơ êpul êya. Hdră gang mkhư̆ matuă ti dŭm krĭng ƀuôn sang Quảng Ngãi (Kon Tum hđăp), dôk mâo klei hgŭm kjăp mơ̆ng dŭm gưl, dhar bruă ƀiădah yuôm bhăn hĭn jing klei răng mơ̆ng grăp čô mnuih ƀuôn sang./.