Mơ̆ng blan 6 thun 2023, Anom pơgang phun pla – Ding jum đang hmua hăng pơđĭ kyar ƀôn lan, ră anai lĕ Ding jum đang hmua hăng rơhuông adai lŏn mơnai gum hrŏm Bơkơtuai kơphê đơ đam rŏng lŏn tơnah ngă tui pơsit anô̆ bơdjơ̆ nao mơ̆ng bruă pla plah amăng đang kơphê truh mơnong ngă răm phun hăng pơtrut mă yua jrao pơgang phun pla hmâo pran gơgrong pioh pơđĭ kyar bruă pla pơkra kơphê kơjăp sui thun ƀơi hơdôm bôh tơring čar Dap Kơdư. Amăng anun, pel ĕp, lăng tui, wai lăng mơnong pơčrăm hăng mă yua jrao pơgang phun pla pioh kơ đang kơphê pla plah; pơđĭ dlông bôh thâo wai lăng hăng pơgang pơgăn mơnong pơčrăm phun pla kơ mơnuih apăn bruă măi mok hăng mơnuih pla kơphê; pơđĭ bôh thâo pel ĕp kơ mơnuih apăn bruă pơgang phun pla; pơđĭ bôh thâo hăng bruă gơgrong pơgang lŏn drŏn kơ hơdôm anih anom pơkra hăng sĭ jrao pơgang phun pla ƀơi Dap Kơdư.

Tui hăng Anom wai lăng bruă tơjŭ pla hăng pơgang phun pla, hơdră pla plah kơphê hăng tiu, sầu riêng ră anai glăk dưi hmâo mơnuih ngă đang hmua hơdôm bôh tơring čar Dap Kơdư mă yua pioh mă yua abih lŏn hmâo hăng đĭ prăk pơhrui glăi. Hơdră anai brơi ƀuh ba glăi bôh tơhnal rơđah biă, plai ƀiă arong hlăt pơčrăm hăng đĭ lu mơta mơnong hmâo yua. Khă hnun hai, ƀơi lu anih anom, mơnuih ƀôn sang ăt pla mă ha djuai phun kơphê mơn ngă phun pla amuñ bơdjơ̆ nao ƀơi anăp mơnong pơčrăm ngă. Bơ̆ hăng hơdră pla plah, ƀu ƀiă mơnuih akă thâo mă yua jrao pơgang phun pla kiăng kơ djơ̆. Ơi Nguyễn Quý Dương, Kơ-iăng Khua Anom wai lăng bruă tơjŭ pla hăng pơgang phun pla lăi lĕ, tơlơi anai kiăng tañ pơsir pioh gơnam pla klă hiam:

 “Ăt dô̆ mơn lu neh wa akă thâo hluh rơđah bruă mă yua jrao pơgang, biă ñu lơm pla plah tui anun khom mă yua jrao pơgang phun pla hiưm hơpă pioh tŭ yua wai lăng arong hlăt pơčrăm samơ̆ ăt pơhlôm mơn gơnam ƀong kơ phun pla phun ăt kah hăng phun pla plah mơn. Anai lĕ sa tơlơi lông prong lơm pơ̆ anăp anai pơsir gơnam ngă rai pioh pơhlôm kơphê pơđĭ kyar kơjăp sui thun”.

Pel ĕp mơ̆ng Anom wai lăng bruă tơjŭ pla hăng pơgang phun pla ƀơi 3 bôh tơring čar Kon Tum, Dak Lak hăng Lâm Đồng brơi ƀuh, jrao mă yua ăt hmâo lu mơn amăng wai lăng pơgang arong hlăt, lơm anun hơdôm bruă mă yua sinh học hăng măi mok yua kơ đang pla lu mơta phrâo hmâo yak blung a dưi mă yua. Amra hloh kơ rơnoh mrô pơkă mă yua jrao ƀơi hơdôm mơta phun pla kơphê, tiu, sầu riêng ăt dô̆ jing tơlơi bơngot kiăng đing nao wai lăng kơjăp hloh.

Kiăng pơplih tơlơi anai, ơi Phạm Quang Trung, Khua pơ ala bơkơtuai Kơphê đơ đam rŏng lŏn tơnah ƀơi Việt Nam, pơkôl amra gum hrŏm hăng hơdôm bôh ƀirô gơgrong gah bruă anai amăng lŏn ia ta pơtrut kơtang bruă pơjing jơlan pơtô brơi mă yua măi mok lăp djơ̆ hăng hơdôm tơhnal pơkă jar kơmar. Djru bruă pla kơphê Dap Kơdư amăng ƀrư̆ mut hrŏm dơlăm amăng jơlan pơlir hơbit đơ đam rŏng lŏn tơnah, pơđĭ dlông bôh thâo bơkơtưn hăng pơđĭ kyar kơjăp phik.

 “Kiăng pơtô pơhrăm hăng pơđĭ dlông tơlơi thâo kơ mơnuih ƀôn sang lĕ ƀing ta khom hmâo hơdôm tơlơi pơsit rơđah, hmâo tơlơi kơsem min pioh ba tơbiă jơlan pơsir pơ ala nao lăp djơ̆ hăng tơlơi ră anai. Pel ĕp, tŭ mă hăng pơplih pơkra glăi hơdôm hră pơ-ar lăi nao lăp djơ̆ hăng tơlơi kiăng phrâo anai. Hluai tui anun, pơphun hơdôm anih pơhrăm pok prong kơ neh wa ngă đang hmua pioh tŭ mă hơdôm bôh thâo phrâo, tơlơi kiăng phrâo mơ̆ng rŏng lŏn tơnah”./.