Tàm ală ngai do, hìu ồng K’ Thiệu, kis tàm thôn 1, sàh Bảo Lâm 4, càr Lâm Đồng chờ hờp ngan tài hìu pa geh lơh dờng niam neh geh ai mŭt ơm.

Ồng pà git, hìu geh lơh mờ khà priă 220 tơlăk đong, tàm hơ̆ Dà lơgar dong kờl 50 tơlăk đong, priă gam tai geh hìu nhă tềm pềr bal mờ priă dong kờl bơh ală cau tàm jơi nòi tờm: “Chờ hờp ngan tŭ geh Đảng mờ Dà lơgar sền gròi uă tus mờ rài kis bơh làng bol jơi bơtiàn ờ gal cau rơƀah tàm tiah ngài bè bol añ dê. Geh hìu dờng niam bè do bloh den añ lơh ngan rơcang tàm broă lơh sa, ờ ngòt mìu càl, ñhăt dà mìu bè lài do tai”.

Kờp tus ngai 30 nhai 6, càr Lâm Đồng (lài do) neh lơh gơs broă lơh niam wơl mờ lơh pa 2 rơbô 44 nơm hìu ai hìu cau rơƀah, hìu pa lik klàs rơƀah in jăt Broă lơh tơn jơh hìu sèt, hìu ồm ñhăt dà mìu. Ờ mìng lơh gơs gờñ rơlao 2 nhai, càr do gam sơrlèt mờ jơnau geh ai 236 nơm hìu pơn drờm mờ broă rơndăp lơh geh ai.

Kung lơh gơs gờñ broă lơh tơn jơh hìu sèt, hìu ồm ñhăt dà mìu lài 2 nhai sơl, càr Gia Lai neh hòi jà geh ală bơta pràn nàng lơh jăt geh cồng nha broă lơh. Bal mờ kes priă geh ai, uă mpồl lơh broă neh lơh broă bal mờ nùs nhơm “cau lơi geh phan tă phan, cau lơi geh tơngai ai tơngai”. Tàm hơ̆, mpồl kwang àng gàr gơnoar tờm tàm broă pơn diang, dong kờl lơh tàm uă tiah. Ală mpồl lơh broă ling klàng bè Ling mpồl 34, Ƀiñ đoàn 15 neh tă pơgồp kờp jơh mờr 40 rơbô ngai lơh, pơgồp bal tàm broă lơh geh ală hìu kơl jăp, ram nùs ling klàng mờ làng bol. Đại tá Khuất Bá Cao, Ƀí thư Đảng ủy, Phó Kwang lam bồ Ƀin đoàn 15 đơs nền: “Broă tơn jơh hìu sèt, hìu ồm ñhăt dà mìu geh kwơ màng ngan tài dong kờl làng bol tàm hơ̆ uă ngan là làng bol jơi bơtiàn ờ gal cau kis tàm càr geh tơl bơta niam nàng geh anih niam ơm, anih sa ƀuơn; dong kờl làng bol bơtàu tơnguh lơh sa. Bơh tŭ hơ̆, Ƀiñ đoàn 15 pơgồp bal mờ càr bơ̆t bơtàu ƀòn lơgar pa mờ gàr kơl jăt bơta lơngăp lơngai cíñ trị, mpồl bơtiàn tàm tiah nhàr lơgar”.

Bè đah cau geh dờp, càr Gia Lai (lài do) neh lơh gơs 100% broă rơndăp lơh dong kờl hìu ơm ai hìu nhă geh sră dong kờl, cau geh màng mờ dà lơgar; hìu rơƀah, hìu pa lik klàs rơƀah in. Mờ ală tiah gam lơh jăt ală broă dong kờl rài kis broă lơh sa, dong kờl làng bol mùl màl lik klàs rơƀah kơl jăp. Mò Ksor H’ Phương, Ƀí thư lài do sàh Ia Rtô (lài do), tŭ do là sàh Ia Sao yal: “Tơnơ̆ mờ tŭ lơh gơs broă lơh tơn jơh hìu sèt, hìu ồm ñhăt dà mìu tàm sàh, bol añ pơn jăt tai sền wơl nàng dong kờl ală hìu bơtàu tơnguh lơh sa, bè jào kơnrồ ròng, phan ròng mờ tơrbŏ bal ală khà priă dong kờl”.

Ală ngai bồ nhai 7 do, càr Gia Lai lơh gơs jơh rơlao 8 rơbô 100 nơm hìu dong kờl ală hìu kal ke, gờñ 2 nhai pơn drờm mờ broă rơndăp lơh geh ai. Do ờ mìng là anih kơl dìng mìu, mờ gam pờ geh jơnau kơ̆p kờñ bè dùl rài kis hờm ram rơlao, dong kờl git nđờ rơbô hìu geh tơl bơta niam nàng brồ guh, sòl àng nùs nhơm kơ̆p kờñ bè rài kis niam bơnĕ rơlao. Ồng Rah Lan Chung, Phó Ƀí thư Tỉñ ủy, Củ tịc Anih duh broă Làng bol càr Gia Lai pà git: “Do là broă lơh geh nùs nhơm dong kờl kòn bơnus kwơ màng ngan. Hơ̆ là tơrgùm broă sền gròi tus mờ ală cau rơƀah, cau geh sră dong kờl bal mờ ală cau ờ pràn tàm gùt càr. Broă lơh do neh hòi jà geh broă tus bal bơh gùt mpồl lơh broă cíñ trị, ală kấp, ală gah lơh broă, mpồl ling bal mờ làng bol tus bal. Den tàng, càr Gia Lai neh lơh wơl mờ  tơrmù tơngai nàng git lơh gơs broă lơh tơn jơh hìu sèt, hìu ồm ñhăt dà mìu tàm càr”.